ULevi 16 - iBhayibhili Elingcwele 1978

Usuku lokubuyisana

¹ INkosi yakhuluma loMose emva kokufa kwamadodana amabili kaAroni afa ekusondeleni eNkosini;

² yathi kuMose: Mtshele uAroni umfowenu ukuba angangeni njalo endaweni engcwele engaphakathi kweveli, phambi kwesihlalo somusa esiphezu komtshokotsho, ukuba angafi; ngoba ngizakubonakala eyezini phezu kwesihlalo somusa.

³ Kodwa uAroni kangene endaweni engcwele elenkunzi yomnikelo wesono, elenqama yomnikelo wokutshiswa.

⁴ Embathe ibhatshi elingcwele elenziwe ngelembu elihle, lebhulugwe elenziwe ngelembu elihle emzimbeni wakhe, azibophe ngebhanti elenziwe ngelembu elihle, athwale iqhiye eyenziwe ngelembu elihle; lezi yizambatho ezingcwele. Ageze umzimba wakhe ngamanzi, azembathe.

⁵ Athathe ebandleni labantu bakoIsrayeli impongo ezimbili zibe ngumnikelo wesono, lenqama ibe ngumnikelo wokutshiswa.

⁶ UAroni kazinikelele ngenkunzi ibe ngumnikelo wesono, azenzele lendlu yakhe indlela yokubuyisana.

⁷ Athathe impongo ezimbili, azibeke phambi kweNkosi ngasemnyango wethente lokuhlangana,

⁸ enze inkatho ngezimpongo ezimbili, enye inkatho ibe ngeyeNkosi lenye ibe ngekaAzazeli.

⁹ UAroni kanikele ngempongo edliwe yinkatho yeNkosi, ibe ngumnikelo wesono;

¹⁰ kodwa impongo edliwe yinkatho kaAzazeli kayibekwe phambi kweNkosi iphilile ukuba kwenziwe indlela yokubuyisana ngayo, ithunyelwe kuAzazeli enkangala.

¹¹ UAroni kazinikelele ngenkunzi ibe ngumnikelo wesono, azenzele yena lendlu yakhe indlela yokubuyisana; kahlabe inkunzi ibe ngumnikelo ngenxa yesono sakhe.

¹² Agcwalise umganu wokutshisela impepha ngamalahle omlilo asealtareni phambi kweNkosi, agcwalise lezandla zakhe ngempepha elephunga elimnandi icholisisiweyo, akulethe ngaphakathi kweveli,

¹³ abeke impepha phezu komlilo phambi kweNkosi, ukuze iyezi lempepha lisibekele isihlalo somusa esiphezu kobufakazi, ukuba angafi.

¹⁴ Athathe igazi lenkunzi, afafaze ngalo isihlalo somusa ngasempumalanga ngomunwe wakhe; langaphambi kwesihlalo somusa afafaze ngegazi kasikhombisa ngomunwe wakhe.

¹⁵ Abesehlaba impongo engumnikelo wesono ozanikelelwa abantu, alethe igazi layo ngaphakathi kweveli, enze ngegazi layo njengokwenza kwakho ngegazi lenkunzi, afafaze ngalo isihlalo somusa langaphambi kwesihlalo somusa.

¹⁶ Ngalokho uzakwenzela indawo engcwele indlela yokubuyisana, ngenxa yokungcola kwabantu bakoIsrayeli, langenxa yeziphambeko zabo, lezono zabo zonke. Futhi uzakulenzela njalo ithente lokuhlangana, elihlala labo liphakathi kokungcola kwabo.

¹⁷ Kakungabi khona umuntu ethenteni lokuhlangana, kusukela ekungeneni kwakhe endaweni engcwele ukwenza indlela yokubuyisana aze aphume. Nxa esenzele yena indlela yokubuyisana, lendlu yakhe, lebandla lonke labakoIsrayeli,

¹⁸ uzakuphumela ealtareni eliphambi kweNkosi, alenzele lalo indlela yokubuyisana, athathe igazi lenkunzi legazi lempongo, alininde empondweni zealtare inxa zonke;

¹⁹ afafaze ialtare ngegazi kasikhombisa ngomunwe wakhe, alihlambulule, alenze libe ngcwele ekungcoleni kwabantu bakoIsrayeli.

²⁰ Lapho eseqedile ukwenzela indawo engcwele indlela yokubuyisana, lethente lokuhlangana, lealtare, uzanikela ngempongo ephilayo;

²¹ uAroni abeke izandla zakhe enhlokweni yempongo ephilayo, avume bonke ububi babantu bakoIsrayeli, leziphambeko zabo, lezono zabo zonke, azibeke enhlokweni yempongo, ayithumele ngomuntu olungiselwe lokho, iye enkangala.

²² Impongo izakuthwala bonke ububi babo, iye endaweni elugwadule; izakuyekelwa ukuba izihambele enkangala.

²³ UAroni uzakungena ethenteni lokuhlangana, akhumule izambatho zelembu elihle azembethe ekungeneni kwakhe endaweni engcwele, azitshiye khona,

²⁴ ageze umzimba wakhe ngamanzi endaweni engcwele, agqoke izambatho zakhe, aphume, anikele umnikelo wakhe wokutshiswa lomnikelo wokutshiswa wabantu, azenzele yena labantu indlela yokubuyisana.

²⁵ Lamahwahwa omnikelo wesono uzakuwatshisa ealtareni.

²⁶ Lowo osa impongo kuAzazeli uzakugezisa ingubo zakhe, ageze umzimba wakhe ngamanzi, andubana angene ezihonqweni.

²⁷ Inkunzi yomnikelo wezono lempongo yomnikelo wesono, elangeniswa igazi lazo ukwenza indlela yokubuyisana endaweni engcwele, zizakhutshelwa ngaphandle kwezihonqo; izikhumba zazo, lenyama yazo, lomswane wazo kutshiswe ngomlilo.

²⁸ Okutshisayo kagezise ingubo zakhe, ageze umzimba wakhe ngamanzi, andubana angene ezihonqweni.

²⁹ Lokhu kuzakuba yisimiso esingelakuphela kini sokuthi ngosuku lwetshumi lwenyanga yesikhombisa lizakuzithoba, lingasebenzi, owokuzalwa elizweni lowemzini ohlala phakathi kwenu.

³⁰ Ngoba ngalolusuku lizakwenzelwa indlela yokubuyisana ukuba lihlanjululwe; lizahlambuluka kuzo zonke izono zenu phambi kweNkosi.

³¹ KuliSabatha lokuphumula kini; lizakuzithoba; kuyisimiso esingelakuphela.

³² Umpristi ogcotshiweyo, owahlukaniselwe ukuba ngumpristi endaweni kayise, uzakwenza indlela yokubuyisana, agqoke izambatho ezingcwele zelembu elihle,

³³ enzele indlu engcwele lethente lokuhlangana, lealtare, indlela yokubuyisana, enzele abapristi labantu bonke lomhlangano indlela yokubuyisana.

³⁴ Lokhu kuzakuba yisimiso esingelakuphela kini, ukuze indlela yokubuyisana yenzelwe abantu bakoIsrayeli kanye ngomnyaka ngenxa yazo zonke izono zabo. UMose wenzake njengokulaya kweNkosi.