ULevi 14 - iBhayibhili Elingcwele 1978

¹ INkosi yathi kuMose:

² Lo uzakuba ngumlayo ngomuntu olobulephero ngosuku lokuhlanjululwa kwakhe. Kalethwe kumpristi,

³ umpristi aphume ezihonqweni, amhlole. Uba umuntu olobulephero esesilile esifweni sobulephero,

⁴ umpristi alaye ukuba lowo ozahlanjululwa athathelwe inyoni ezimbili ezihlambulukileyo, lomkusu, lelembu elibomvu, lehisope;

⁵ umpristi alaye ukuba enye yezinyoni ihlatshelwe embizeni yebumba phezu kwamanzi agobhozayo.

⁶ Uzathatha inyoni ephilayo kanye lomkusu, lelembu elibomvu, lehisope, akucwilise egazini lenyoni ehlatshelwe phezu kwamanzi agobhozayo,

⁷ amfafaze ngalo kasikhombisa lowo ozakuhlanjululwa esifweni sobulephero, atsho ukuthi usehlambulukile, ayekele inyoni ephilileyo ukuba izihambele egangeni.

⁸ Lowo ozakuhlanjululwa uzagezisa ingubo zakhe, aphuce zonke inwele zakhe, ageze ngamanzi, ahlambuluke; emva kwalokho uzabuyela ezihonqweni, kodwa ahlale ngaphandle kwethente lakhe insuku eziyisikhombisa.

⁹ Ngosuku lwesikhombisa uzakuphuca zonke inwele zakhe, lendevu zakhe, lezintshiya zakhe, yebo, aphuce zonke inwele zakhe, agezise ingubo zakhe, ageze umzimba wakhe ngamanzi, ahlambuluke.

¹⁰ Ngosuku lwesificaminwembili uzathatha amawundlu amaduna amabili angelasici, lewundlu elisikazi elilomnyaka munye elingelasici, lomnikelo wempuphu elingana lengxenye yehefa empuphu ecolekileyo ixubene lamafutha, lamagcobo.

¹¹ Umpristi ohlambulula lowomuntu ozakuhlanjululwa uzambeka kanye lalezizinto phambi kweNkosi, ngasemnyango wethente lokuhlangana.

¹² Umpristi athathe elinye lamawundlu, anikele ngalo libe ngumnikelo wecala, kanye lamagcobo, akuzunguze kube ngumnikelo wokuzunguzwa phambi kweNkosi;

¹³ ahlabe iwundlu endaweni engcwele lapho kuhlatshelwa khona umnikelo wesono lomnikelo wokutshiswa; ngoba umnikelo wecala ungowompristi, njengomnikelo wesono, ungcwele kakhulu.

¹⁴ Umpristi kathathe igazi lomnikelo wecala, alininde oqwangeni lwendlebe yokunene yalowo ozakuhlanjululwa, lesithupheni sesandla sakhe sokunene, lasezwaneni elikhulu lonyawo lwakhe lokunene;

¹⁵ athathe amagcobo, athele amanye esandleni sakhe sokhohlo,

¹⁶ acwilise umunwe wakhe wokunene kuwo, afafaze ngawo kasikhombisa phambi kweNkosi ngomunwe wakhe.

¹⁷ Athathe kuwo amagcobo aseleyo asesandleni sakhe, awaninde oqwangeni lwendlebe yalowo ozakuhlanjululwa, lesithupheni sesandla sakhe sokunene, lasezwaneni elikhulu lonyawo lwakhe lokunene, phezu kwegazi lomnikelo wecala;

¹⁸ lamagcobo aseleyo asesandleni sakhe kawabeke ekhanda lalowo ozakuhlanjululwa. Ngalokho umpristi uzakumenzela indlela yokubuyisana phambi kweNkosi.

¹⁹ Umpristi kanikele ngomnikelo wesono ukuba amenzele indlela yokubuyisana lowo ozakuhlanjululwa ekungcoleni kwakhe, andubana ahlabe umnikelo wokutshiswa,

²⁰ anikele umnikelo wokutshiswa lomnikelo wempuphu ealtareni. Ngalokho umpristi uzamenzela indlela yokubuyisana, ahlambuluke.

²¹ Kodwake uba engumyanga, esahluleka ukuletha lokho, kathathe iwundlu eliduna libe ngumnikelo wecala ozazunguzwa ukuba amenzelwe indlela yokubuyisana, kanye lengxenye yehefa lempuphu ecolekileyo ixubene lamafutha kube ngumnikelo wempuphu, lamagcobo,

²² lamajuba amabili loba inkwilimba ezimbili, loba yilokho alakho, okunye kube ngumnikelo wesono lokunye kube ngumnikelo wokutshiswa.

²³ Ngosuku lwesificaminwembili kakulethe kumpristi, emnyango wethente lokuhlangana, phambi kweNkosi, ukuba ahlanjululwe.

²⁴ Umpristi kathathe iwundlu elomnikelo wecala, lamagcobo, akuzunguze kube ngumnikelo wokuzunguzwa phambi kweNkosi.

²⁵ Ahlabe iwundlu elomnikelo wecala, athathe igazi lomnikelo wecala, alininde oqwangeni lwendlebe yokunene yalowo ozahlanjululwa, lesithupheni sesandla sakhe sokunene, lasezwaneni elikhulu lonyawo lwakhe lokunene;

²⁶ athele amagcobo esandleni sakhe sokhohlo,

²⁷ afafaze ngawo kasikhombisa phambi kweNkosi ngomunwe wakhe wokunene,

²⁸ athatha kuwo amagcobo asesandleni sakhe, awaninde oqwangeni lwendlebe yokunene yalowo ozahlanjululwa, lesithupheni sesandla sakhe sokunene, lasezwaneni elikhulu lonyawo lwakhe lokunene, ezindaweni lapho kunindwe khona igazi lomnikelo wecala.

²⁹ Amagcobo aseleyo asesandleni sakhe umpristi awabeke ekhanda lalowo ozahlanjululwa, amenzele indlela yokubuyisana phambi kweNkosi.

³⁰ Uzakunikela ngamajuba amabili loba ngenkwilimba ezimbili, loba yilokho alakho,

³¹ okunye kube ngumnikelo wesono lokunye kube ngumnikelo wokutshiswa, kanye lomnikelo wempuphu. Umpristi uzamenzela ohlanjululwayo indlela yokubuyisana phambi kweNkosi.

³² Lowo ngumlayo ngaye olesifo sobulephero, owehluleka ukuletha iminikelo ukuba ahlambuluke.

³³ INkosi yathi kuMose loAroni:

³⁴ Lapho selifikile elizweni laseKanani engilinika lona libe ngelenu, uba ngisehlisela umuzi into ebolisayo elizweni lenu,

³⁵ umninimuzi keze ambikele umpristi, athi: Ngibona kungathi kukhona into ebolisayo emzini wami.

³⁶ Umpristi uzakulaya ukuba yonke impahla ikhutshwe endlini, engakangeni ukuhlola leyonto, ukuze konke okusendlini kungangcoli. Emva kwalokho umpristi uzangena ukukhangela indlu,

³⁷ ayihlole; uba ebona ukuthi imiduli yendlu ilamabala aluhlaza loba abomvu, futhi abonakala ukuthi atshonile kakhulu,

³⁸ uzakuphuma endlini eme emnyango, ayivale insuku eziyisikhombisa.

³⁹ Uzabuya ngosuku lwesikhombisa, ayikhangele; uba amabala eseqelile emidulini yendlu,

⁴⁰ kalaye ukuba izitina ezilamabala zikhutshwe, zilahlwe endaweni engcolileyo ngaphandle komuzi,

⁴¹ lendlu iphalwe phakathi inxa zonke, lodaka oluphaliweyo lulahlelwe endaweni engcolileyo ngaphandle komuzi.

⁴² Ezinye izitina kazithathwe, zifakwe endaweni yalezo, lendlu ibhadwe ngodaka olutsha.

⁴³ Uba leyonto ebolisayo ibonakala futhi endlini, nxa izitina sezikhutshiwe, lendlu isiphaliwe, ibhadiwe,

⁴⁴ umpristi uzakuhamba ayeyihlola. Uba leyonto isiqhelile endlini, kuyinto ebolisa kubi; indlu ingcolile.

⁴⁵ Kayidilizwe, izitina zayo, lezigodo zayo, lalo lonke udaka lwayo, konke kukhutshelwe endaweni engcolileyo ngaphandle komuzi.

⁴⁶ Futhike ongena kuleyondlu isavaliwe uzakuba ngongcolileyo kuze kuhlwe;

⁴⁷ lowo olala kuleyondlu kagezise ingubo zakhe; lalowo odlela khona agezise ingubo zakhe.

⁴⁸ Kodwa nxa umpristi esengenile, abone ukuthi leyonto ebolisayo kayiqhelanga endlini emva kokubhadwa kwendlu, uzakutsho ukuthi indlu ihlambulukile, ngoba leyonto isiphelile.

⁴⁹ Ukuba indlu ihlambuluke, uzakuthatha inyoni ezimbili ezincinyane, lomkusu, lelembu elibomvu, lehisope,

⁵⁰ abulalela enye yezinyoni embizeni yebumba elamanzi amahle,

⁵¹ athathe umkusu lehisope lelembu elibomvu, kanye lenyoni ephilayo, akucwilise egazini lenyoni ebuleweyo lasemanzini amahle, afafaze indlu kasikhombisa.

⁵² Ngokwenza njalo uzakuhlambulula indlu ngegazi lenyoni, langamanzi amahle, langenyoni ephilayo, langomkusu, langehisope langelembu elibomvu,

⁵³ ayiyekele inyoni ephilayo ukuba iphume emzini, iye egangeni. Ngakhoke uzakuyenzela indlu indlela yokubuyisana, ihlambuluke.

⁵⁴ Lo ngumlayo omayelana lezinhlobo zonke zobulephero, langoqweqwe olulumayo,

⁵⁵ langokubola okuthile okusengutsheni lokusendlini,

⁵⁶ ngethumba, langenxeba elibhibhidlayo, langesibhadlu,

⁵⁷ ukuba kwaziwe ukuthi kungcolile ingabe kuhlambulukile. Lowo ngumlayo omayelana lobulephero lokubola okunje.