ULevi 13 - iBhayibhili Elingcwele 1978

Imilayo emayelana lobulephero

¹ INkosi yathi kuMose loAroni:

² Nxa kukhona emzimbeni womuntu ithumba loba inxeba elibhibhidlayo, loba ibala, lokhu kubonakalisa ukuthi umuntu lo ulobulephero emzimbeni wakhe, kalethwe kuAroni umpristi ingabe kwenye yamadodana akhe angabapristi.

³ Umpristi uzakukhangela isifo esisemzimbeni walowomuntu; uba uboya obukhona sebuphendukile baba mhlophe, lesifo sesitshonile enyameni yakhe, kuyisifo sobulephero. Umpristi esemhlolile uzakutsho ukuthi ungcolile.

⁴ Kodwa uba ibala elisemzimbeni wakhe limhlophe, lingabonakali ukuthi litshonile, loboya obukhona bungaphendukanga baba mhlophe, umpristi uzakumvalela olesifo insuku eziyisikhombisa.

⁵ Ngosuku lwesikhombisa umpristi uzakumhlola; uba kubonakala kuye ukuthi isifo sisemi, singandanga emzimbeni wakhe, umpristi uzamvalela ezinye insuku eziyisikhombisa.

⁶ Ngosuku lwesikhombisa umpristi abuye amhlole; uba ibala lifiphele, lesifo singandanga emzimbeni, umpristi uzakutsho ukuthi usehlambulukile; kulibala nje. Kagezise ingubo zakhe, ahlambuluke.

⁷ Kodwa uba ibala lisanda emzimbeni wakhe emva kokuzibonakalisa kwakhe kumpristi ngokuhlambuluka kwakhe, kabuye azibonakalise kumpristi futhi,

⁸ umpristi amhlole; uba ibala landile emzimbeni, umpristi uzakutsho ukuthi ungcolile, ngoba kuyisifo sobulephero.

⁹ Lapho umuntu elobulephero, uzakulethwa kumpristi,

¹⁰ umpristi amhlole; uba kukhona emzimbeni wakhe ithumba elimhlophe, eliphendule uboya baba mhlophe, futhi uba ithumba lilomlomo,

¹¹ kuyibulephero obudala emzimbeni wakhe; umpristi uzakutsho ukuthi ungcolile, angamvaleli ngoba engcolile.

¹² Uba ubulephero busanda emzimbeni, buze bube semzimbeni wonke womuntu olesifo, kusukela ekhanda kuze kufike enyaweni, njengokubona kompristi,

¹³ umpristi uzakumhlola; uba wonke umzimba wakhe ulobulephero, umpristi uzakutsho ukuthi uhlambulukile; ngoba konke kuphendukile kwaba mhlophe, uhlambulukile.

¹⁴ Kodwa nxa kubonakala kuye inyama ebomvu, uzakuba ngongcolileyo.

¹⁵ Umpristi uzakuhlola inyama ebomvu, atsho ukuthi ungcolile; inyama ebomvu ingcolile, ngoba iyibulephero.

¹⁶ Kodwa uba inyama ebomvu iphenduka ibe mhlophe, uzakuya kumpristi,

¹⁷ umpristi amhlole; uba inyama ebomvu iphendukile yaba mhlophe, umpristi uzakutsho ukuthi olesifo uhlambulukile; uhlambulukile sibili.

¹⁸ Nxa kukhona emzimbeni womuntu ithumba eselipholile,

¹⁹ besekubonakala endaweni yethumba ibala elimhlophe lelibomvu loba elinye ithumba elimhlophe, kakutshengiswe umpristi,

²⁰ umpristi amhlole; uba libonakala ukuthi litshonile, lokuthi uboya obukhona buphendukile baba mhlophe, umpristi uzakutsho ukuthi ungcolile; kuyisifo sobulephero, sivele ethunjeni.

²¹ Kodwa uba umpristi ebona ukuthi uboya obukhona kabumhlophe, lokuthi kalitshonanga kodwa lifiphele, umpristi uzamvalela insuku eziyisikhombisa.

²² Uba lisanda emzimbeni, umpristi atsho ukuthi ungcolile, ngoba kuyisifo.

²³ Kodwa uba ibala limi endaweni yalo, lingandi, kulithumba eselipholile; umpristi atsho ukuthi uhlambulukile.

²⁴ Uba kukhona emzimbeni inxeba elenziwa yikutshiswa, lenyama ebomvu iphendukile yaba libala elimhlophe loba ibala elimhlophe lelibomvana,

²⁵ umpristi kalihlole; uba uboya obukhona buphendukile baba mhlophe, libonakala ukuthi litshonile, kuyibulephero; buvele enxebeni elenziwa yikutshiswa; umpristi uzakutsho ukuthi ungcolile, ngoba kuyibulephero.

²⁶ Kodwa uba umpristi ebona ukuthi uboya obukhona kabumhlophe, lokuthi kalitshonanga kodwa lifiphele, umpristi uzamvalela insuku eziyisikhombisa.

²⁷ Ngosuku lwesikhombisa umpristi uzakumhlola; uba lisanda emzimbeni, umpristi uzakutsho ukuthi ungcolile, ngoba kuyibulephero.

²⁸ Kodwa uba ibala limi endaweni yalo, lingandi emzimbeni, kodwa lifiphele, kulinxeba elenziwa yikutshiswa; umpristi atsho ukuthi uhlambulukile, ngoba kulinxeba lokutshiswa.

²⁹ Nxa owesifazana loba owesilisa elesilonda ekhanda loba esilevini,

³⁰ umpristi uzakuhlola isilonda; uba sibonakala ukuthi sitshonile, lezinwele lendevu ezikhona zimpofana zingakhuli, umpristi uzakutsho ukuthi ungcolile; ngoba eloqweqwe olulumayo oluyibulephero ekhanda loba esilevini.

³¹ Uba umpristi ebona ukuthi isilonda esilumayo kasitshonanga, lokuthi kakukho inwele ezimpofana kuso, umpristi uzamvalela lowomuntu olesilonda insuku eziyisikhombisa.

³² Ngosuku lwesikhombisa umpristi uzakuhlola isilonda; uba uqweqwe olulumayo lungandanga, futhi kungekho kuso inwele ezimpofana, loqweqwe lubonakala ukuthi kalutshonanga,

³³ umuntu uzakuziphuca, kodwa angaziphuci lapho kukhona uqweqwe, umpristi amvalele olesilonda lesi ezinye insuku eziyisikhombisa.

³⁴ Ngosuku lwesikhombisa umpristi uzakukhangela uqweqwe olulumayo; uba lungandanga emzimbeni, futhi lubonakala ukuthi kalutshonanga, umpristi uzakutsho ukuthi uhlambulukile, agezise ingubo zakhe, ahlambuluke.

³⁵ Kodwa uba uqweqwe lusanda emzimbeni emva kokuhlanjululwa kwakhe,

³⁶ umpristi uzakumhlola; uba uqweqwe lwandile emzimbeni, umpristi kangadingi inwele ezimpofana; ungcolile.

³⁷ Kodwa uba kubonakala kuye ukuthi uqweqwe lusemi, lenwele ezimnyama sezimilile khona, uqweqwe selupholile, lowomuntu uhlambulukile; umpristi katsho ukuthi usehlambulukile.

³⁸ Nxa owesilisa loba owesifazana elamabala amhlophe emzimbeni wakhe,

³⁹ umpristi uzakumhlola; uba amabala emhlotshana nje, kuyimpunza equbukileyo; uhlambulukile.

⁴⁰ Uba inwele zekhanda lomuntu seziphelile, ulempabanga, kodwa uhlambulukile.

⁴¹ Uba inwele ziphelile ebunzini lomuntu lasemaceleni, ulempabanga, kodwa uhlambulukile.

⁴² Kodwa uba kukhona ekhanda elisubukileyo loba ebunzini elisubukileyo ibala elimhlophe lelibomvana, kuyibulephero obuqubukile ekhanda lakhe loba ebunzini lakhe.

⁴³ Umpristi uzakumhlola; uba ebona ithumba elimhlophe lelibomvana ekhanda lakhe elisubukileyo loba ebunzini lakhe elisubukileyo, libonakale ukuthi lifanana lobulephero emzimbeni,

⁴⁴ ungumuntu olobulephero, ungcolile; umpristi katsho ukuthi ungcolile, ngoba elobulephero ekhanda.

⁴⁵ Umuntu olesifo sobulephero kagqoke ingubo ezidabukileyo, lenwele zakhe zithukuluke, ambomboze indebe yakhe yangaphezulu, akhale athi: Ngingcolile, ngingcolile!

⁴⁶ Uzakuhlala engcolile sonke isikhathi sesifo sakhe; ungcolile, ngakho uzakuhlala yedwa endaweni engaphandle kwezihonqo.

⁴⁷ Uba kukhona isibhadlu sokubola engutsheni yoboya bemvu, loba engutsheni yelembu elihle,

⁴⁸ loba elenjini elalukiweyo, loba esikhumbeni, ingabe entweni eyenziwe ngesikhumba,

⁴⁹ futhi uba sona siluhlaza loba sibomvu engutsheni, loba elenjini elalukiweyo, loba esikhumbeni, ingabe entweni eyenziwe ngesikhumba, kuyikubola okumele kutshengiswe umpristi.

⁵⁰ Umpristi uzakuhlola lokho okulokubola, akuvalele insuku eziyisikhombisa.

⁵¹ Ngosuku lwesikhombisa uzakukuhlola; uba isibhadlu sokubola siqhelile engutsheni, loba elenjini elalukiweyo, loba esikhumbeni, loba kuyini okusetshenzwa ngesikhumba, singesokubola okubi; ngakho leyonto ingcolile.

⁵² Uzakutshisa ingubo, lelembu elalukiweyo, loboya, lelembu elihle, lento yesikhumba, konke okulesibhadlu sokubola; ngoba kubola kakutshiswe ngomlilo.

⁵³ Uba umpristi ebona ukuthi isibhadlu kasiqhelanga engutsheni, loba elenjini elalukiweyo, loba entweni yesikhumba,

⁵⁴ umpristi uzakulaya ukuba lokho okulokubola okunje kugeziswe, akuvalele ezinye insuku eziyisikhombisa,

⁵⁵ akuhlole sekugezisiwe. Uba ebona ukuthi isibhadlu sokubola kasiphendukanga umbala waso, lanxa singaqhelanga, kungcolile. Kakutshiswe ngomlilo, loba isibhadlu sokubola sibonakala ngaphakathi loba ngaphandle.

⁵⁶ Kodwa uba umpristi ebona ukuthi isibhadlu sokubola siphelile sekugezisiwe, kasuse isibhadlu esisengutsheni, loba esikhumbeni, loba elenjini elalukiweyo.

⁵⁷ Uba sibuya sibonakale futhi engutsheni loba elenjini elalukiweyo loba entweni yesikhumba, lokhu kutsho ukuthi siyaqhela; kakutshiswe ngomlilo lokho okulokubola.

⁵⁸ Uba kugeziswa ingubo lelembu elalukiweyo lento yesikhumba, kuphele isibhadlu sokubola, kakugeziswe futhi okwesibili, kuzahlambulukake.

⁵⁹ Lowo ngumlayo omayelana lesibhadlu sokubola esisengutsheni yoboya bemvu, loba engutsheni yelembu elihle, loba elenjini elalukiweyo, loba entweni yesikhumba, okuzabonwa ngawo ukuthi kuhlambulukile ingabe kungcolile.