ULevi 12 - iBhayibhili Elingcwele 1978

Ukuhlanjululwa kwabesifazana emva kokubeletha

¹ INkosi yathi kuMose:

² Tshono ebantwini bakoIsrayeli uthi: Uba owesifazana ethatha isisu, abelethe umfana, uzakuba ngongcolileyo insuku eziyisikhombisa, njengalokhu engcolile nxa esemfuleni.

³ Ngosuku lwesificaminwembili umntwana uzakusokwa.

⁴ Owesifazana uzakuhlala nje insuku ezingamatshumi amathathu lantathu, lize lihlambuluke igazi lakhe, angathinti lutho olungcwele, angangeni endlini engcwele, zize ziphelele insuku zokuhlanjululwa kwakhe.

⁵ Kodwa uba ebeletha inkazana, uzakuba ngongcolileyo amaviki amabili, njengalokhu engcolile nxa esemfuleni; uzakuhlala enjalo insuku ezingamatshumi ayisithupha lesithupha lize lihlambuluke igazi lakhe.

⁶ Lapho seziphelile insuku zakhe zokuhlanjululwa, ngomfana loba ngenkazana, kalethe kumpristi ngasemnyango wethente lokuhlangana iwundlu elilomnyaka munye, libe ngumnikelo wokutshiswa, lejuba loba inkwilimba kube ngumnikelo wesono,

⁷ umpristi akunikele eNkosini, amenzele indlela yokubuyisana; ng’khona ezakuhlambuluka. Lowo ngumlayo omayelana lalowo obeletha umfana loba inkazana.

⁸ Uba esehluleka ukunikela ngemvu, kathathe amajuba amabili loba inkwilimba ezimbili, okunye kube ngumnikelo wokutshiswa lokunye kube ngumnikelo wesono, umpristi amenzele indlela yokubuyisana, ahlambuluke.