ULevi 11 - iBhayibhili Elingcwele 1978

Inyamazana ezihlambulukileyo lezingcolileyo

¹ INkosi yathi kuMose loAroni:

² Tshonini ebantwini bakoIsrayeli lithi: Nanzi izinto eziphilayo elingazidla kuzo zonke inyamazana zasemhlabeni.

³ Zonke inyamazana esilamangqina ehlukeneyo lezetshisayo lingazidla.

⁴ Kodwa kuzo ezetshisayo lezilamangqina ehlukeneyo lingadli ikamela, ngoba liyetshisa, kodwa kalilamangqina ehlukeneyo; lingcolile kini.

⁵ Lingadli lembila, ngoba iyetshisa, kodwa kayilamangqina ehlukeneyo; ingcolile kini.

⁶ Lingadli lomvundla, ngoba uyetshisa, kodwa kawulamangqina ehlukeneyo; ungcolile kini.

⁷ Lingadli lengulube, ngoba ilamangqina ehlukeneyo, kodwa kayetshisi; ingcolile kini.

⁸ Lingabokudla inyama yazo, lingathinti izidumbu zazo; zingcolile kini.

⁹ Kuzo zonke ezihamba emanzini lingadla zonke ezilamaphiko lamaxolo, ezisolwandle lezisemifuleni.

¹⁰ Kodwa zonke ezisolwandle lezisemifuleni ezingelamaphiko lamaxolo, phakathi kwazo ezihamba ngamaxuku emanzini laphakathi kwezinye eziphilayo, zingcolile kini.

¹¹ Zizakuhlala zingcolile kini; lingadli inyama yazo; izidumbu zazo zizakunengeka kini.

¹² Zonke ezihamba emanzini ezingelamaphiko lamaxolo ziyisinengiso kini.

¹³ Nanzi inyoni ezizakunengeka kini; kaziyikudliwa ngoba ziyisinengiso; ukhozi lelinqe lengqungqulu,

¹⁴ lomzwazwa, lezinhlobo zonke zabomahelwane,

¹⁵ zonke inhlobo zamawabayi,

¹⁶ intshe, lomandukulu, lenkanku, lezinhlobo zonke zenkozi,

¹⁷ isikhova, lenyonga,

¹⁸ isikhova esibamba inhlanzi, levuba, lelinqe elikhulu,

¹⁹ lengabuzane, lenhlobo zonke zamahemu, lemvenduna, lolulwane.

²⁰ Zonke izibungu ezilamaphiko ezihamba ngezinyawo zazo ziyisinengiso kini.

²¹ Kodwa kuzo izibungu ezilamaphiko ezihamba ngenyawo zazo lingadla lezo ezilemilenze ezeqa ngayo emhlabathini;

²² kuzo lingadla isikhongwane ngenhlobo zaso, lonyelele ngenhlobo zakhe, lamadiye ngenhlobo zawo, lezintethe ngenhlobo zazo.

²³ Kodwa zonke ezinye izibungu ezilamaphiko lenyawo ezine ziyisinengiso kini.

²⁴ Lingangcoliswa yizo; bonke abathinta izidumbu zazo bazahlala bengcolile kuze kuhlwe.

²⁵ Ophatha ulutho lwezidumbu zazo uzakugezisa ingubo zakhe, abe ngongcolileyo kuze kuhlwe.

²⁶ Zonke inyamazana ezilamangqina ehlukeneyo, kodwa zingetshisi, zingcolile kini; bonke abazithintayo bazakungcola.

²⁷ Zonke inyamazana ezihamba ngenyawo zazo zozine zingelamangqina zingcolile kini; bonke abathinta izidumbu zazo bazakuhlala bengcolile kuze kuhlwe.

²⁸ Othwala izidumbu zazo uzagezisa ingubo zakhe, abe ngongcolileyo kuze kuhlwe; zingcolile kini.

²⁹ Futhi lezi ezinanakazana ezihamba emhlabathini zingcolile kini; ubuchakide, legundwane, legwababa ngenhlobo zalo,

³⁰ lontulo, lembulu, lombankwa, lesiqhuza, lonwabu.

³¹ Yizo ezingcolile kini phakathi kwazo ezincinyane; bonke abazithintayo sezifile bazakuhlala bengcolile kuze kuhlwe.

³² Konke esiwela phezu kwakho esinye sazo sesifile kuzakuba ngokungcolileyo, loba kuyinto eyenziwe ngesihlahla, loba kuyisambatho, loba kuyisikhumba, loba kulisaka, ingabe isitsha esisetshenziswayo; kakufakwe emanzini, kuhlale kungcolile kuze kuhlwe; emva kwalokho kuzakuhlambuluka.

³³ Uba esinye sazo siwela embizeni yebumba, konke okukiyo kuzakuba ngokungcolileyo, liyibulale.

³⁴ Ukudla okudliwayo okukiyo okuthelwe ngamanzi kuzakuba ngokuncolileyo; lalokho okunathwayo okusembizeni ezinje kuzakuba ngokungcolileyo.

³⁵ Konke eziwela kukho izidumbu zazo kuzakuba ngokungcolileyo; loba kuliziko, loba yisitofu, kakuphohlozwe, ngoba kungcolile, futhi kuzahlala kungcolile kini.

³⁶ Kodwa umthombo loba umgodi olamanzi amahle uzabe uhlambulukile; kodwa lokho okuthinta izidumbu zazo kuzakuba ngokungcolileyo.

³⁷ Uba izidumbu zazo ziwela phezu kwenhlanyelo ezakuhlanyelwa, ihlambulukile;

³⁸ kodwa uba amanzi athelwa enhlanyelweni, lezidumbu zazo ziwela phezu kwayo, ingcolile kini.

³⁹ Uba kusifa inyamazana edliwayo, othinta isidumbu sayo uzakuhlala engcolile kuze kuhlwe.

⁴⁰ Odla isidumbu sayo kagezise ingubo zakhe, ahlale engcolile kuze kuhlwe; lothwala isidumbu sayo kagezise ingubo zakhe, ahlale engcolile kuze kuhlwe.

⁴¹ Zonke izidalwa ezinanakazana ezinanabayo emhlabathini ziyisinengiso; kazingadliwa.

⁴² Zonke ezihamba ngesisu, lezihamba ngenyawo zozine, lezilenyawo ezinengi, zonke lezi ezihamba emhlabathini lingazidli, ngoba ziyisinengiso.

⁴³ Lingazenzi linengeke ngazo ezinje, lingazingcolisi ngazo ukuba lingangcoli.

⁴⁴ Ngoba ngiyiNkosi uNkulunkulu wenu. Ngakhoke zihlambululeni lina, libe ngcwele, ngoba mina ngingcwele. Lingazingcolisi ngezinto ezihamba emhlabathini.

⁴⁵ Ngoba ngiyiNkosi eyalikhupha elizweni laseGibithe ukuba ngibe nguNkulunkulu wenu. Ngakho wobani ngcwele, ngoba mina ngingcwele.

⁴⁶ Lowo ngumlayo omayelana lezinyamazana, lezinyoni, lezidalwa zonke eziphilayo ezihamba emanzini lezihamba emhlabathini,

⁴⁷ ukuba kwehlukaniswe okungcolileyo lokuhlambulukileyo, lezidalwa eziphilayo ezidliwayo lezidalwa eziphilayo ezingadliwayo.