ULevi 10 - iBhayibhili Elingcwele 1978

Isono sikaNadabi loAbihu

¹ UNadabi loAbihu, amadodana kaAroni, bathatha imiganu yabo yokutshisela impepha, bafaka umlilo kiyo, babeka kiyo impepha, banikela ngomlilo ongafanele eNkosini eyayingabalayanga wona.

² Kwavela umlilo eNkosini, wabaqothula, bafela phambi kweNkosi.

³ UMose wasesithi kuAroni: Yikho lokhu iNkosi eyakutsho isithi: Ngizakuzibonakalisa ukuthi ngingcwele ngalabo abaseduze lami, futhi ngizakuba lodumo phambi kwabantu bonke. UAroni wathula.

⁴ UMose wabiza uMishayeli loElizafani, amadodana kaUziyeli isihlobo sikaAroni wathi kibo: Sondelani, libasuse abafowenu ngaphambi kwendlu engcwele, libakhuphele ngaphandle kwezihonqo.

⁵ Basondelake, babathwala bembethe amabhatshi abo, babakhuphela ngaphandle kwezihonqo, njengokutsho kukaMose.

Imisebenzi yabapristi

⁶ UMose wathi kuAroni lakuEleyazare loIthamari, amadodana akhe: Lingayekeli ukuba inwele zamakhanda enu zithukuluke, lingadabuli ingubo zenu ekukhaleni kwenu, funa life, lolaka lukaNkulunkulu lwehlele phezu kwebandla lonke. Kodwa abakini, yonke indlu kaIsrayeli, bangakhala ngokutshisa okwenziwe yiNkosi.

⁷ Lingaphumi ngomnyango wethente lokuhlangana ukuba lingafi, ngoba amagcobo okugcoba kweNkosi aphezu kwenu. Benzake njengelizwi likaMose.

⁸ INkosi yakhuluma kuAroni yathi:

⁹ Unganathi iwayini lotshwala, wena lamadodana akho, nxa lingena ethenteni lokuhlangana ukuba lingafi. Lokhu kuzakuba yisimiso esingelakuphela ezizukulwaneni zenu.

¹⁰ Lizakwehlukanisa okungcwele lokungangcwele, lokuhlambulukileyo lokungahlambulukanga;

¹¹ lifundise abantu bakoIsrayeli zonke izimiso iNkosi ezikhulume kubo ngoMose.

¹² UMose wathi kuAroni lakuEleyazare loIthamari, amadodana akhe aseleyo: Thathani umnikelo wempuphu oseleyo eminikelweni eyenzelwe iNkosi ngomlilo, liwudle ungelamvubelo ngaseceleni kwealtare, ngoba ungcwele kakhulu;

¹³ liwudlele endaweni engcwele, ngoba uyisabelo sakho lesabelo samadodana akho, esivela eminikelweni eyenzelwe iNkosi ngomlilo; ngoba ngiyalaywa kunjalo.

¹⁴ Kodwa isifuba esizunguzwayo lomlenze onikelwayo lizakukudlela endaweni ehlambulukileyo, wena lamadodana akho, lamadodakazi akho; ngoba kunikwe ukuba yisabelo sakho lesabelo samadodana akho, kuvela emihlatshelweni yeminikelo yokuthula yabantu bakoIsrayeli.

¹⁵ Umlenze onikelwayo lesifuba esizunguzwayo bazakukuletha kanye leminikelo yamahwahwa eyenziwe ngomlilo, ukuze kuzunguzwe, kube ngumnikelo wokuzunguzwa phambi kweNkosi, kube yisabelo sakho lesamadodana akho kokuphela, njengokulaya kweNkosi.

¹⁶ UMose wabuzisisa ngembuzi yomnikelo wesono, wabona ukuthi yayitshisiwe. Wathukuthelela uEleyazare loIthamari, amadodana kaAroni aseleyo, wathi:

¹⁷ Kalidlanga ngani umnikelo wesono endaweni yendlu engcwele, ngoba ungcwele kakhulu, futhi liphiwe wona ukuba lithwale ububi bebandla, libenzele indlela yokubuyisana phambi kweNkosi na?

¹⁸ Khangelani, igazi lawo kalingeniswanga endlini engcwele. Ngabe liyidlile endlini engcwele njengokulaya kwami.

¹⁹ UAroni wathi kuMose: Khangela, lamhla sebenikele umnikelo wabo wesono lomnikelo wabo wokutshiswa eNkosini, kantike ngehlelwe yilokhu mina! Uba bengidlile umnikelo wesono lamuhla, bekuzakwamukeleka emehlweni eNkosi na?

²⁰ Esezwile lokho uMose wathaba.