ULevi 1 - iBhayibhili Elingcwele 1978

Iminikelo yokutshiswa

¹ INkosi isethenteni lokuhlangana yambiza uMose, yakhuluma kuye yathi:

² Tshono ebantwini bakoIsrayeli uthi: Nxa umuntu wakini eletha umnikelo eNkosini, kathathe umnikelo wakhe enkomeni loba ezimvini.

³ Uba umnikelo wakhe ungumnikelo wokutshiswa owenkomo, uzakunikela ngenkunzi engelasici, ayinikele ngasemnyango wethente lokuhlangana, ukuba amukeleke phambi kweNkosi.

⁴ Uzakubeka isandla sakhe enhlokweni yomnikelo wokutshiswa, ukuze wamukelwe ngenxa yakhe, umenzele indlela yokubuyisana.

⁵ Kayihlabe inkunzi phambi kweNkosi; amadodana kaAroni angabapristi azathatha igazi, alikhaphazele ealtareni, inxa zonke elingasemnyango wethente lokuhlangana.

⁶ Uzakuhlinza umnikelo wokutshiswa, awuhlahlele.

⁷ Amadodana kaAroni umpristi alungise umlilo ealtareni, abeke inkuni phezu komlilo.

⁸ Amadodana kaAroni angabapristi abeke izitho kuhle, inhloko lamahwahwa phezu kwenkuni ezisemlilweni ophezu kwealtare.

⁹ Imibilini yayo lemilenze yayo kayigeziswe ngamanzi; umpristi akutshise konke ealtareni kube ngumnikelo wokutshiswa, umnikelo owenziwe ngomlilo, olephunga elimnandi eNkosini.

¹⁰ Uba umnikelo wakhe ungumnikelo wemihlambi, owezimvini loba owezimbuzini, uzanikela ngenduna engelasici;

¹¹ ayihlabe ngasohlangothini lwealtare olungasenyakatho, phambi kweNkosi; amadodana kaAroni angabapristi akhaphazele igazi layo ealtareni inxa zonke.

¹² Uzakuyihlahlela; umpristi abeke kuhle izitho zayo, inhloko lamahwahwa, phezu kwenkuni ezisemlilweni ophezu kwealtare.

¹³ Imibilini lemilenze kayigeziswe ngamanzi; umpristi anikele konke, akutshise ealtareni; kungumnikelo wokutshiswa, umnikelo owenziwe ngomlilo, olephunga elimnandi eNkosini.

¹⁴ Uba umnikelo wakhe eNkosini ungumnikelo wokutshiswa owezinyoni, uzanikela amajuba loba inkwilimba.

¹⁵ Umpristi ayilethe ealtareni, ayitshile intamo, ayitshise ealtare, igazi layo lichithekele ngasohlangothini lwealtare,

¹⁶ asuse isidlelo sayo lensiba, akulahle ngaseceleni kwealtare ngasempumalanga, endaweni yomlotha,

¹⁷ ayidonse ngamaphiko, kodwa angayidabuli; umpristi ayitshise ealtareni, phezu kwenkuni ezisemlilweni, kube ngumnikelo wokutshiswa, umnikelo owenziwe ngomlilo, olephunga elimnandi eNkosini.