UJuda 1 - iBhayibhili Elingcwele 1978

Isibingelelo

¹ Mina Juda, inceku kaJesu Kristu lomfowabo kaJakobe, ngithi kubo ababiziweyo abathandekayo kuNkulunkulu uBaba abagcinelwe uJesu Kristu:

² Kakwandiswe kini isihawu lokuthula lothando.

Mayelana labakhohlisi

³ Bathandekayo, lapho ngisatshisakela ukulilobela ngokusiliswa esikuhlanganyelayo, ngabona ukuthi kuswelekile ukuba ngililobele, ngilikhuthaze, ukuba lilwele ukukholwa abakunikwayo abangcwele kwaba kanye.

⁴ Ngoba sekungenile ngokunyenya abantu abathile abamiselwa lokhukulahlwa kudala, abantu abeyisa uNkulunkulu, abaphendula umusa kaNkulunkulu wethu ube ngamanyala, bephika uMbusi oyedwa leNkosi yethu uJesu Kristu.

⁵ Ngithanda ukulikhumbuza, loba belikwazi konke, ukuthi iNkosi eyasilisa isizwe ngokusikhupha elizweni laseGibithe yabuya yababhubhisa labo abangakholwanga.

⁶ Lezithunywa ezingagcinanga izikhundla zazo, kodwa zatshiya indawo zazo, zigcinelwe ukulahlwa mhla wosuku olukhulu, zibotshiwe ngezibopho ezingaqamukiyo ngaphansi komnyama.

⁷ Ngokunjalo iSodoma leGomora lemizi yakhona eyenza ukuphinga njengazo, yazinikela enkanukweni ezingasizo zemvelo, yenziwa isibonelo ngokutshaywa ngomlilo ongapheliyo.

⁸ Ngokunjalo lababantu ekuphupheni kwabo bayona imizimba yabo, beyisa amandla eNkosi, bahlambaze abalenkazimulo.

⁹ Kodwa uMikayeli, isithunywa esikhulu, lapho ephikisana loSathane bebanga isidumbu sikaMose, kabanga lesibindi sokumlahla ngokumthuka, kodwa wathi: INkosi kayikukhalimele.

¹⁰ Kodwa lababantu bathuka konke abangakwaziyo; lalokho abakwaziyo ngemvelo njengezinyamazana ezingelangqondo babhubha ngakho.

¹¹ Maye kibo! Ngoba bahamba endleleni kaKayini; baziwisele ekuduheni kukaBalami ngenxa yenzuzo; baphika njengoKora, ngakho babhubha.

¹² Laba balihlazo emadilini enu othando nxa besidla lani bengesabi, bezinanzelela bona bodwa. Bangamayezi angelamanzi, aphetshulwa ngumoya; bayizihlahla ezingatheliyo zebusika, ezife kabili, sezisitshulwe;

¹³ bangamavinqo olwandle aphosekayo, abhubhudla amahlazo awo; bazinkanyezi eziduhayo ezigcinelwe umnyama omkhulu ongapheliyo.

¹⁴ UEnoki ongowesizukulwana sesikhombisa kusukela kuAdamu waprofetha ngabo, wathi: Khangelani, iNkosi yafika kanye labangcwele bayo abayizigidi

¹⁵ ukuthonisisa bonke, ibalahle bonke abeyisa uNkulunkulu ngenxa yezenzo zonke zokungamhloniphi abazenzayo, langawo wonke amazwi anzima izoni ezeyisa uNkulunkulu eziwakhuluma ngaye.

¹⁶ Laba bangabangungunayo labasolayo, behamba ngenkanuko zabo, bekhuluma amazwi aqatha, bezikhukhumeza, besebenzisa amazwi okulalisa ngolimi ngenxa yenzuzo.

¹⁷ Kodwa lina, bathandekayo, khumbulani amazwi akhulunywa ngaphambili ngabaphostoli beNkosi yethu uJesu Kristu;

¹⁸ bathi kini: Ngesikhathi sokucina kuzakuba khona abahleka ulunywa, behamba ngenkanuko zabo ezimbi.

¹⁹ Yibo laba abaletha ukwahlukana, bangabomhlaba, kabalaMoya.

²⁰ Kodwa lina, bathandekayo, zakheni ekukholweni kwenu okungcwele kakhulu, likhuleke ngoMoya oNgcwele;

²¹ lihlale othandweni lukaNkulunkulu, lilindele isihawu seNkosi yethu uJesu Kristu, ukuze libe lokuphila okungapheliyo.

²² Libahawukele abanye abathandabuzayo;

²³ lisilise abanye ngokubahluthuna emlilweni; abanye libahawukele lilokwesaba, lizonda ngitsho lengubo eyoniwe zinkanuko ezimbi.

Isicino

²⁴ Kuye olamandla okulilinda ukuba lingakhubeki, lokulimisa phambi kwenkazimulo yakhe lingelasici, lilokuthokoza okukhulu,

²⁵ kuye uNkulunkulu oyedwa uMsilisi wethu, ngoJesu Kristu iNkosi yethu, kakube inkazimulo, lobukhulu, lobukhosi, lamandla, kungakabi khona isikhathi, lakhathesi, kuze kube nini lanini. Ameni.