UJoweli 3 - iBhayibhili Elingcwele 1978

Ukuthonisiswa kwezizwe

¹ Ngoba ngalezonsuku langalesosikhathi lapho ngibuyisa impumelelo yabaJuda labeJerusalema,

² ngizabutha zonke izizwe, ngizilethe esihotsheni sikaJehoshafati, ngizithonisise khona ngenxa yabantu bami lesizwe sami uIsrayeli, ngoba zabachithachitha phakathi kwezizwe, zabelana ilizwe lami,

³ zenza inkatho ngabantu bami, zenanisa abafana ngamawule, zathengisa amankazana ngewayini, zalinatha.

⁴ Liyini kimi, lina Tire leSidoni, lani lonke zabelo zaseFilistiya na? Liyangiphindisela ngolutho na? Uba lingiphindisela ngolutho, ngizaphangisa ukulibuyisela ngezenzo zenu.

⁵ Ngoba lithethe isiliva sami legolide lami, lathwalela inotho yami eligugu emathempelini enu.

⁶ Lathengisa abantu bakoJuda labeJerusalema kumaGriki, labasusela khatshana lelizwe labo.

⁷ Kodwa khathesi ngizabavusa endaweni elabathengisa kiyo, ngilibuyisele ngezenzo zenu.

⁸ Ngizathengisa amadodana lamadodakazi enu ebantwini bakoJuda, bona bazabathengisa ebantwini baseSheba esizweni esikhatshana; ngoba iNkosi ikhulumile.

⁹ Memezelani lokhu phakathi kwezizwe lithi: Lungiselani impi, livuse amaqhawe. Kawasondele wonke amadoda empi, azilungisele impi.

¹⁰ Khandani amakhuba enu abe yimihedla, lengqamu zenu zokuthena izihlahla zibe yimikhonto, lobuthakathaka athi: Ngiliqhawe.

¹¹ Phangisani lize, lina zizwe zonke elizingelezeleyo, libuthane esihotsheni sikaJehoshafati. Thumela amaqhawe akho, Nkosi.

¹² Kazizivuse izizwe, zizwe esihotsheni sikaJehoshafati; ngoba kulapho ngizahlala khona ukuthonisisa zonke izizwe ezizingelezeleyo.

¹³ Fakani isikela, ngoba okuvunwayo sekuvuthiwe. Ngenani linyathele izithelo zevini, ngoba isikhamelo sewayini sesigcwele, lamafatshi asephuphuma, sebubukhulu kangaka ububi bezizwe.

¹⁴ Amaxuku ngamaxuku akhona esihotsheni sokwahlulela. Ngoba usuku lweNkosi selusondele esihotsheni sokwahlulela.

¹⁵ Ilanga lenyanga kuzaphenduka kube mnyama, lezinkanyezi kucime ukukhanya kwazo.

Ukukhululwa kukaJuda

¹⁶ INkosi iyavungama iseZiyone, izwakalisa ilizwi layo iseJerusalema, kunyikinyeke iphezulu lomhlaba. Kodwa iNkosi iyisiphephelo sabantu bayo, lenqaba yabantu bakoIsrayeli.

¹⁷ Ngalokhoke lizakwazi ukuba ngiyiNkosi, uNkulunkulu wenu ohlala eZiyone, intaba yami engcwele. IJerusalema lizakuba ngcwele, abezizwe kabasayikuphinda badlule phakathi kwalo futhi.

¹⁸ Kuzakuthi ngalolosuku intaba zigobhoze iwayini elitsha, lamaqaqa ageleze uchago, layo yonke imifula yakoJuda igeleze amanzi, kuzabhoboka umthombo endlini yeNkosi, uthelele isihotsha saseShithimi.

¹⁹ IGibithe lizakuba yinkangala, leEdoma libe yinkangala engelalutho, ngenxa yesihluku esenziwa kwabakoJuda, langenxa yegazi elingelacala abalichitha elizweni labo.

²⁰ Kodwa koJuda kuzakwakhiwa kuze kube nininini, laseJerusalema kuze kube sezizukulwaneni zonke.

²¹ Ngizaphindisela igazi labo, kangiyikumyekela olecala, ngoba iNkosi ihlala eZiyone.