UJoweli 1 - iBhayibhili Elingcwele 1978

Ilizwe lichithwa zintethe

¹ Ilizwi leNkosi lafika kuJoweli, indodana kaPethuweli, lisithi:

² Zwanini lokhu, lina badala, lilalele lonke abakhileyo elizweni. Kwake kwenzeka okunje ensukwini zenu lasensukwini zabokhokho benu na?

³ Kutsheleni abantwana benu, labantwana benu bakutshele abantwana babo, labantwana babo bakutshele esinye isizukulwana esibalandelayo.

⁴ Okutshiywe yintothoviyane kwadliwa yisikhongwane; okutshiywe yisikhongwane kwadliwa liqhwagi; lokutshiywe liqhwagi kwadliwa yinswabanda.

⁵ Phaphamani, lina zidakwa, likhale; lilani lonke, lina banathi bewayini, lililele iwayini elitsha, ngoba liphelile kini.

⁶ Ngoba isizwe sihlasele ilizwe lami, silamandla, kasilakubalwa. Amazinyo aso anjengawesilwane, silamazinyo amakhulu njengesilwane esisikazi.

⁷ Siqedile amavini ami, sakhwixula izihlahla zami zemikhiwa, sazebula amaxolo azo, sawaphosela phansi, ingatsha zaso zaba mhlophe qhwa.

⁸ Lilani njengentombi egqoke isambatho sokulila, ililela umyeni wobutsha bayo.

⁹ Umnikelo wempuphu lowokunathwa iphelile ethempelini. Izikhonzi zeNkosi, abapristi, ziyakhala.

¹⁰ Amasimu aphelile, umhlabathi uyakhala, ngoba amabele aphelile, lewayini kalisekho, lamafutha ayancipha.

¹¹ Danani, lina balimi bomhlabathi, likhale, lina balimi bezivini, ngenxa yamabele lebhali; ngoba isivuno semasimini siphelile.

¹² Ivini liyabuna, lomkhiwa wome. Ipomegranati, lelala, lomkhuna, zonke izihlahla zeganga sezomile; lokuthokoza kuphelile ebantwini.

¹³ Gqokani izambatho zokulila, likhale, lina bapristi, lilani, lina zikhonzi zasealtareni. Ngenani, lilale lambethe izambatho zokulila bonke ubusuku, lina zikhonzi zikaNkulunkulu wami. Ngoba umnikelo wempuphu lomnikelo wokunathwayo igodliwe ukunikelwa endlini kaNkulunkulu wenu.

¹⁴ Zilani ukudla, lenze inkonzo enkulu lina badala, buthanisani bonke abakhileyo elizweni, endlini yeNkosi uNkulunkulu wenu, likhuleke kuyo.

¹⁵ Maye ngalolosuku! Ngoba usuku lweNkosi luseduze, luzafika njengokuchitheka okulethwa nguSomandla.

¹⁶ Kakuphelanga ukudla kwethu na? Lokuthaba lokuthokoza kakuphelanga endlini kaNkulunkulu na?

¹⁷ Inhlanyelo iyabola ngaphansi kwamagade; izindlu zamabele kazilalutho, leziphala zidilikile, ngoba amabele kawakho.

¹⁸ Yeka ukukhala kwezifuyo! Imihlambi yenkomo ididekile ngoba kayilalo idlelo; lemihlambi yezimvu ihluphekile.

¹⁹ Ngiyakhala kuwe, Nkosi, ngoba umlilo utshisile amadlelo, lamalangabi atshisa zonke izihlahla zeganga.

²⁰ Lenyamazana zeganga ziyakhala kuwe, ngoba imifula yamanzi itshile, lomlilo utshisile amadlelo eganga.