UJoshuwa 5 - iBhayibhili Elingcwele 1978

Ukusokwa kwabakoIsrayeli

¹ Kwathi wonke amakhosi amaAmori ayengaphetsheya kweJordani ngasentshonalanga lawo wonke amakhosi amaKanani ayengasolwandle esizwa ukuba iNkosi yenza amanzi eJordani atsha ukuba abakoIsrayeli bachaphe, inhliziyo zawo zaphela amandla, aphelelwa layisibindi ngenxa yabantu bakoIsrayeli.

² Ngalesosikhathi iNkosi yathi kuJoshuwa: Yenza ingqamu zensengentshe, ubasoke futhi abakoIsrayeli.

³ Ngakho uJoshuwa wasesenza ingqamu zensengentshe, wabasoka abakoIsrayeli eGibeyathi‐Haralothi.

⁴ Yilokhu uJoshuwa abasokela khona; bonke abesilisa babantu abaphuma eGibithe, amadoda wonke empi, babefele endleleni enkangala sebephumile eGibithe.

⁵ Lanxa bonke abantu abaphuma eGibithe babesokiwe, kodwa labo ababezalelwe endleleni enkangala sebephumile eGibithe babengasokwanga.

⁶ Ngoba abakoIsrayeli bahamba enkangala iminyaka engamatshumi amane saze safa saphela sonke isizwe, lawomadoda empi ayephume eGibithe, ngoba engalilalelanga ilizwi leNkosi; iNkosi yayifungile kuwo ukuba kawayikulibona ilizwe eyafunga kubokhokho babo ukusinika lona, ilizwe eligcwele uchago lenyosi.

⁷ Ngakhoke kwakungabantwana bawo eyayibamise esikhundleni sawo uJoshuwa abasokayo, basokwa ngoba babengasokwanga endleleni.

⁸ Kwathi sesisokiwe sonke isizwe, bahlala endaweni zabo ezihonqweni baze baphola

⁹ INkosi yasisithi kuJoshuwa: Lamhla ngisusile kini ihlazo laseGibithe. Ngalokhoke leyondawo yathiwa yiGiligali kuze kube lamhla.

AbakoIsrayeli bagcina iPhasika eGiligali

¹⁰ AbakoIsrayeli bamisa eGiligali, bagcina iPhasika ngosuku lwetshumi lane lwenyanga kusihlwa ezigodini zaseJeriko.

¹¹ Kusasa emva kwePhasika ngalona lolosuku, badla izithelo zelizwe, izinkwa ezingelamvubelo lomumbu okhanzingiweyo.

¹² Imana yacina mhla besidla izithelo zelizwe; abakoIsrayeli kabasayizuzanga futhi imana, kodwa badla izithelo zelizwe laseKanani kusukela ngalowomnyaka.

Induna yempi yeNkosi

¹³ Kwathi uJoshuwa engaseJeriko, wakhangela wabona umuntu emi phambi kwakhe ephethe umhedla wakhe. UJoshuwa waya kuye wathi: Ungakithi yini, kumbe ungasezitheni zethu na?

¹⁴ Yena wathi: Atshi; kodwa ngizile ukuba yinduna yempi yeNkosi. UJoshuwa wathi mbo ngobuso phansi, wakhuleka esithi kuye: Inkosi yami ithi inceku yayo kayenzeni na?

¹⁵ Induna yempi yeNkosi yathi kuye: Khumula amanyathelo akho enyaweni zakho, ngoba indawo omi kiyo ingcwele. UJoshuwa wenza njalo.