UJoshuwa 20 - iBhayibhili Elingcwele 1978

Imizi yokuphephela

¹ INkosi yasisithi kuJoshuwa:

² Khuluma kwabakoIsrayeli uthi: Misani imizi yokuphephela engakhuluma ngayo kini ngoMose

³ ukuba umbulali obulala umuntu ngesiphosiso kungesikho ngabomu abalekele khona; izakuba yisiphephelo kini kumphindiseli wegazi.

⁴ Obalekela komunye walimizi uzakuma esangweni lomuzi, alandise indaba yakhe kwabadala balowomuzi; bona bazamngenisa phakathi komuzi, bamnike indawo ahlale labo.

⁵ Uba umphindiseli wegazi exotshana laye, kabayikumnikela umbulali esandleni sakhe, ngoba engabulalanga umakhelwane wakhe ngabomu, ebekade engamzondi.

⁶ Uzahlala kulowomuzi kuze kuthethwe icala lakhe ebandleni. Ekufeni kompristi omkhulu walesosikhathi angabuyela emzini wakibo lapho abaleka khona.

⁷ Basebemisa iKedeshi eGalili ezintabeni zakoNafitali, leShekema ezintabeni zakoEfrayimi, leKiriyathi‐Arba okutsho iHebroni ezintabeni zakoJuda.

⁸ Ngaphetsheya kweJordani ngasempumalanga kweJeriko bakhetha esizweni sakoRubeni iBezeri elisemagcekeni enkangala, esizweni sakoGadi bakhetha iRamothi eGileyadi, esizweni sakoManase bakhetha iGolani eBashani.

⁹ Yiyo le imizi eyayikhethelwe bonke abakoIsrayeli labezizweni abahlala phakathi kwabo, ukuba obulala umuntu ngesiphosiso abalekele khona, ukuze angabulawa ngumphindiseli wegazi, aze eme phambi kwebandla.