UJoshuwa 2 - iBhayibhili Elingcwele 1978

UJoshuwa uthumela izinhloli eJeriko

¹ UJoshuwa indodana kaNuni wasethuma amadoda amabili ensitha eseShithimi aba zinhloli, wathi: Hambani lihlole ilizwe, ikakhulu iJeriko. Asehamba, ayafikela endlini yewule elalithiwa nguRahabi, angenisa khona.

² Kwabikwa enkosini yaseJeriko kwathiwa: Kufikile lapha ebusuku amadoda athile akoIsrayeli ukuhlola ilizwe.

³ Inkosi yaseJeriko yasithumela ilizwi kuRahabi isithi: Khupha amadoda lawo afikele kwakho, angene endlini yakho, ngoba azehlola lonke ilizwe.

⁴ Kodwa owesifazana lowo wayethethe lawomadoda amabili, wawafihla; ngakho wathi: Yebo, amadoda afikile kwami, kodwa bengingazi lapha avela khona;

⁵ kuthe sekuzavalwa isango lapho sekumnyama aphuma. Kangikwazi lapho aye khona; axhumeni masinyane, lizakuwafica.

⁶ Kodwa wayewakhwezile ophahleni, wawafihla phakathi kwesikusha ayesichaye ophahleni.

⁷ Ngakho abantu basebewaxhuma ngendlela yaseJordani baze bafika emazibukweni; lapho sebephumile, kwavalwa amasango.

⁸ Kwathi lawomadoda engakalali, uRahabi weza kuwo ophahleni

⁹ wathi: Ngiyazi ukuthi iNkosi ilinikile lelilizwe, lokuthi thina sonke siyalesaba, lokuthi bonke abakhileyo elizweni bayalithuthumelela.

¹⁰ Ngoba sizwile ukuthi iNkosi yenza amanzi oLwandle oluBomvu atsha phambi kwenu ekuphumeni kwenu eGibithe, leyakwenza emakhosini amabili amaAmori ayengaphetsheya kweJordani, uSihoni loOgi elababhubhisayo.

¹¹ Sathi sikuzwa lokho inhliziyo zethu zaphela amandla, kakho loyedwa owaba lesibindi ngenxa yenu. Ngoba iNkosi uNkulunkulu wenu nguye uNkulunkulu osezulwini phezulu losemhlabeni phansi.

¹² Ngalokhoke fungani kimi ngeNkosi ukuthi njengoba ngiliphathe ngomusa, lani lizayiphatha ngomusa indlu kababa, linginike isiboniso esiqinileyo,

¹³ liyekele ubaba lomama, labanewethu labodadewethu, labo bonke abangababo, lingasiyekeli sibulawe.

¹⁴ Lawomadoda athi kuye: Uba singakwenzi lokho, kuyithi esifanele ukufa, kayisuwe, ngaphandle kokuba ukuveze obala esikwenzayo. Lapho iNkosi isisinikile ilizwe, sizakugcina isithembiso sethu kuwe.

¹⁵ Wasewehlisa ngentambo ewindini, ngoba indlu yakhe yayakhiwe emdulini womuzi, ehlala emdulini.

¹⁶ Wathi kuwo: Balekelani ezintabeni funa abalixhumileyo balifice, lizacatsha khona insuku ezintathu baze babuye abalixhumileyo, beselihambake.

¹⁷ Amadoda lawo asemtshela ukuba azakhululeka esifungweni awafungise sona uba engakwenzi lokho amtshela khona.

¹⁸ Athi: Ekufikeni kwethu elizweni uzabophela lintambo ebomvu ewindini osikhuphe ngalo, ubuthanise endlini yakho oyihlo lonyoko labanewenu layo yonke indlu kayihlo.

¹⁹ Lowo ophumela phandle igazi lakhe lizakuba phezu kwekhanda lakhe, thina kasiyikuba lacala. Kodwa uba kubulawa omunye osendlini kanye lawe igazi lakhe lizakuba semakhanda ethu.

²⁰ Njalo uba uyiveza indaba yethu, thina kasiyikuba lacala ngesifungo osifungise sona.

²¹ Yena wathi: Kakube njengokutsho kwenu. Wasewayekela ehamba, wabophela intambo ebomvu ewindini.

²² Asuka aya ezintabeni, ahlala khona insuku ezintathu baze babuya labo ababewadinga, ngoba bawadinga endleleni yonke, bawaswela.

²³ Asesehlake lawomadoda womabili ezintabeni, achapha umfula, abuyela kuJoshuwa indodana kaNuni, amtshela konke okuwehleleyo.

²⁴ Athi kuye: Impela iNkosi ilinikele ezandleni zethu lonke ilizwe, futhi bonke abakhileyo kilo baphele amandla ngenxa yethu.