UJoshuwa 11 - iBhayibhili Elingcwele 1978

UJoshuwa unqoba lonke ilizwe

¹ Kwathi lapho uJabini inkosi yaseHazori ekuzwa lokho, wathumela ilizwi kuJobabi inkosi yaseMadoni, lasenkosini yaseShimironi, lasenkosini yaseAkishafi,

² lasemakhosini asenyakatho elizweni lamaqaqa, lawasesihotsheni esiseningizimu kweKinerethi, lawaseShefela, lawaselizweni laseDori ngasentshonalanga,

³ lakumaKanani ngasempumalanga langasentshonalanga, lakumaAmori lakumaHethi lakumaPerizi lakumaJebusi asezintabeni, lakumaHivi ngaphansi kweHermoni elizweni laseMizipa.

⁴ Aphuma wona lawo wonke amabutho awo eyimpi enkulu, ubunengi bawo bungangetshebetshebe elisokhunjini lolwandle, kanye lamabhiza amanengi lenqola zokulwa ezinengi.

⁵ Wonke lamakhosi ahlanganisa amabutho awo, eza amisa ngasemanzini aseMeroma, ukuba alwe loIsrayeli.

⁶ INkosi yathi kuJoshuwa: Ungabesabi, ngoba kusasa ngalesisikhathi ngizabanikela sebefile kuIsrayeli; uzaquma imisipha yamabhiza abo, utshise ngomlilo inqola zabo zokulwa.

⁷ UJoshuwa labo bonke abantu bakhe bempi babajuma ngasemanzini aseMeroma, babahlasela.

⁸ INkosi yabanikela esandleni sikaIsrayeli owabahlasela waxotshana labo kwaze kwaba seSidoni elikhulu laseMisirefothi‐Mayimi, langasempumalanga kwaze kwaba sesihotsheni seMizipe. Babachitha, kakwaze kwasala loyedwa.

⁹ UJoshuwa wenza kibo njengokutsho kweNkosi; waquma imisipha yamabhiza abo, watshisa ngomlilo inqola zabo zokulwa.

¹⁰ UJoshuwa wasebuya ngalesosikhathi, wathumba iHazori, wabulala inkosi yalo. Kuqala iHazori lalilamandla kulayo yonke leyomibuso.

¹¹ Babulala ngomkhonto bonke ababekilo, babaqeda nya; kabatshiyanga lokukodwa okuphilayo, batshisa iHazori ngomlilo.

¹² Yonke imizi yalawomakhosi kanye lamakhosi ayo uJoshuwa wayithumba, wayichitha ngomkhonto, wayiqeda nya, njengokulaya kukaMose inceku yeNkosi.

¹³ Kodwa imizi yonke eyayisemadundulwini uIsrayeli kayitshisanga ngaphandle kweHazori kuphela uJoshuwa alitshisayo.

¹⁴ AbakoIsrayeli bathatha yonke impahla yalimizi lenkomo, kwaba yimpango yabo. Kodwa bonke abantu bababulala baze babaqeda nya, kabatshiyanga lokukodwa okuphilayo.

¹⁵ Njengalokhu iNkosi yayimlayile uMose inceku yayo, ngakho uMose wamlaya uJoshuwa. UJoshuwa wenza njalo; kakulalutho angalwenzanga kukho iNkosi eyakulaya uMose.

¹⁶ Ngakho uJoshuwa walinqoba lonke lelolizwe elasemaqaqeni, lalo lonke iNegebi, lelizwe lonke laseGosheni leShefela, leAraba, lelamaqaqa lonke lakoIsrayeli lezigodi zalo,

¹⁷ kusukela entabeni elugwadule kusiya eSeyiri kuze kube seBali‐Gadi esihotsheni saseLebanoni ngaphansi kwentaba yaseHermoni. Wawathumba wonke amakhosi abo, wawachitha wawabulala.

¹⁸ UJoshuwa walwa isikhathi eside lalawomakhosi.

¹⁹ Kakubanga lamuzi owenza isivumelwano sokuthula labakoIsrayeli ngaphandle kwamaHivi ayakhe eGibeyoni; bayithumba yonke ngokulwa.

²⁰ Ngoba kwakuyiNkosi eyenza inhliziyo zabo zaba lukhuni ukuze balwe loIsrayeli, bachithwe baphele, bangahawukelwa kodwa babhujiswe, njengokulaya kweNkosi kuMose.

²¹ UJoshuwa wasuka ngalesosikhathi, wachitha amaAnaki ngasezintabeni, eHebroni leDebiri leAnabi lasezintabeni zakoJuda, lakuzo zonke ezakoIsrayeli; uJoshuwa wawaqothula kanye lemizi yawo.

²² Kakusalanga lelilodwa iAnaki elizweni labantu bakoIsrayeli, kuseGaza kuphela leGathi leAshidodi lapho kwasala amanye khona.

²³ UJoshuwa walithumba ilizwe lonke njengakho konke iNkosi eyakukhuluma kuMose. UJoshuwa wabanika abakoIsrayeli ilizwe ngezizwe zabo, laba ngelabo. Ilizwe laseliphumulake ekulweni.