UJoshuwa 10 - iBhayibhili Elingcwele 1978

Ukunqotshwa kwamaAmori

¹ Kwathi nxa uAdonizedeki inkosi yaseJerusalema esezwile ukuthi uJoshuwa ulithumbile iAyi, walichitha laphela nya, wenza kilo lasenkosini yalo lokho akwenza eJeriko lasenkosini yalo, lokuthi abaseGibeyoni bavumelene ngokuthula labakoIsrayeli, sebehlala phakathi kwabo,

² watshaywa luvalo kakhulu, ngoba iGibeyoni lalingumuzi omkhulu njengomuzi wenkosi, lilikhulu kuleAyi, lamadoda akhona wonke engamaqhawe.

³ Ngakho uAdonizedeki inkosi yaseJerusalema yasithumela ilizwi kuHohamu inkosi yaseHebroni, lakuPiramu inkosi yaseJarimuthi, lakuJafiya inkosi yaseLakishi, lakuDebiri inkosi yaseEgiloni, wathi:

⁴ Wozani lingisize, silihlasele iGibeyoni; ngoba lenzile isivumelwano sokuthula loJoshuwa labakoIsrayeli.

⁵ Ngakhoke amakhosi amahlanu amaAmori, inkosi yaseJerusalema leyaseHebroni leyaseJarimuthi leyaseLakishi leyaseEgiloni, ahlanganisa izimpi zawo, aphuma ayamisa maqondana leGibeyoni, alihlasela.

⁶ Amadoda aseGibeyoni asethumela ilizwi kuJoshuwa ezihonqweni zaseGiligali esithi: Siyizinceku zakho, ungasilahli; woza masinyane usisize, ngoba amakhosi wonke amaAmori ahlala ezintabeni ayasihlanganyela.

⁷ Ngakho uJoshuwa wasesuka eGiligali lawo wonke amadoda empi, wonke amaqhawe alamandla.

⁸ INkosi yathi kuJoshuwa: Ungabesabi, ngoba ngibanikele esandleni sakho; kakukho loyedwa wabo ozakumelana lawe.

⁹ UJoshuwa wabajuma, ehambe ubusuku bonke esuka eGiligali.

¹⁰ INkosi yabachithachitha phambi kwabakoIsrayeli abababulala abanengi eGibeyoni, baxotshana labo baze bafika emqansweni waseBeti‐Horoni, bababulala kwaze kwaba seAseka leMakeda.

¹¹ Kwathi besabalekela uIsrayeli besehla emqansweni waseBetiHoroni, iNkosi yabehlisela isiqhotho esikhulu esivela phezulu kwaze kwaba seAzeka, bafa. Babebanengi ababulawa yisiqhotho ukwedlula ababulawa nguIsrayeli.

¹² UJoshuwa wasekhuluma eNkosini mhla iNkosi inikela amaAmori kwabakoIsrayeli, wathi phambi kukaIsrayeli: Wena langa, mana eGibeyoni, lawe nyanga ume esihotsheni saseAjaloni,

¹³ Ilanga lema lenyanga yahlala, abantu baze baphindisela ezitheni zabo. Lokhu kulotshiwe ogwalweni lukaJashari. Ilanga lema phakathi komkhathi, kalaze laphangisa ukutshona okosuku lonke.

¹⁴ Kaluzanga lube khona usuku olunjalo ngaphambili loba ngasemva kwalo lapho iNkosi yalilalela khona ilizwi lomuntu, ngoba iNkosi yamlwela uIsrayeli.

¹⁵ UJoshuwa wasebuyela ezihonqweni eGiligali kanye labo bonke abakoIsrayeli.

¹⁶ Lawomakhosi abaleka, acatsha obhalwini lwaseMakeda.

¹⁷ Kwabikwa kuJoshuwa ukuthi: Amakhosi amahlanu afunyanwe acatshile obhalwini lwaseMakeda.

¹⁸ UJoshuwa wasesithi: Giqelani amatshe amakhulu emlonyeni wobhalu, libeke amadoda kulo awalinde;

¹⁹ kodwa lingahlali khona lina. Xotshanani lezitha zethu, lizihlasele ngasemuva, lingaziyekeli zingene emizini yazo, ngoba iNkosi uNkulunkulu wenu izinikele ezandleni zenu,

²⁰ Kwathi uJoshuwa labakoIsrayeli sebebabulele babaqeda ngaphandle kwabalutshwana nje ababaleka bangena emizini ebiyelweyo,

²¹ bonke abantu babuyela ezihonqweni kuJoshuwa eMakeda, kungekho loyedwa olimeleyo.

²² UJoshuwa wasesithi: Vulani umlomo wobhalu, likhuphele kimi lawomakhosi amahlanu.

²³ Basebesenza njalo, bawakhupha obhalwini lawomakhosi amahlanu, inkosi yaseJerusalema leyaseHebroni leyaseJarimuthi leyaseLakishi leyaseEgiloni.

²⁴ Kwathi sebewakhuphile lawomakhosi bawaletha kuJoshuwa; wabiza bonke abakoIsrayeli, wathi ezinduneni zempi ezaziphume laye: Sondelani, linyathele lamakhosi ezintanyeni. Zasezisondela, zawanyathela ezintanyeni.

²⁵ UJoshuwa wasesithi kuzo: Lingesabi litshaywe luvalo; qinani lime isibindi, ngoba iNkosi izakwenza nje kuzo zonke izitha zenu elilwa lazo.

²⁶ Ngemva kwalokho uJoshuwa wasewatshaya wawabulala, wawalengisa ezihlahleni ezinhlanu; alenga ezihlahleni kwaze kwahlwa.

²⁷ Ngesikhathi sokutshona kwelanga uJoshuwa waselaya ukuba bawethule ezihlahleni, bawaphosele obhalwini ayecatshe kulo, bagiqele amatshe amakhulu emlonyeni walo, asekhona lawomatshe kuze kube lamhla.

²⁸ UJoshuwa wathumba iMakeda ngalolosuku, walichitha kanye lenkosi yalo ngomkhonto, waqeda nya bonke abantu ababekilo, katshiyanga muntu. Wenza enkosini yaseMakeda lokho akwenza enkosini yaseJeriko.

²⁹ UJoshuwa wasedlula eMakeda kanye laye wonke uIsrayeli, baya eLibina, balihlasela iLibina;

³⁰ iNkosi yalinikela lalo kanye lenkosi yalo esandleni sikaIsrayeli, owalichitha ngomkhonto labo bonke abantu ababekilo; katshiyanga muntu kilo, wenza enkosini yalo lokho akwenza enkosini yaseJeriko.

³¹ UJoshuwa wasedlula eLibina kanye laye wonke uIsrayeli, baya eLakishi, balivimbezela, balihlasela;

³² iNkosi yalinikela iLakishi esandleni sikaIsrayeli owalithumba ngosuku lwesibili, walichitha ngomkhonto labo bonke abantu ababekilo, njengokwenza kwakhe eLibina.

³³ UHoramu inkosi yaseGezeri weza ukusiza iLakishi; kodwa uJoshuwa wamchitha labantu bakhe, kaze atshiya loyedwa.

³⁴ UJoshuwa wasedlula eLakishi kanye laye wonke uIsrayeli, baya eEgiloni, balivimbezela, balihlasela,

³⁵ balithumba ngalolosuku, balichitha ngomkhonto, babaqeda bonke abantu ababekilo ngalolosuku, njengokwenza kwabo eLakishi.

³⁶ UJoshuwa wasesuka eEgiloni kanye laye wonke uIsrayeli, baya eHebroni, balihlasela,

³⁷ balithumba, balichitha ngomkhonto, inkosi yalo kanye lemizi yalo labo bonke abantu ababekilo; kabatshiyanga muntu, njengokwenza kwabo eEgiloni, baqeda bonke abantu ababekilo.

³⁸ UJoshuwa kanye laye wonke uIsrayeli babuyela eDebiri, balihlasela,

³⁹ balithumba kanye lenkosi yalo layo yonke imizi yalo, balichitha ngomkhonto, baqeda bonke abantu ababekilo; kabatshiyanga loyedwa. Njengokwenza kwabo eHebroni laseLibina lenkosini yalo benza njalo eDebiri lenkosini yalo.

⁴⁰ UJoshuwa walinqoba lonke ilizwe, elalisezintabeni leNegebi leShefela lamaqaqa lawo wonke amakhosi akhona; katshiyanga loyedwa, waqeda konke okuphilayo, njengokulaya kweNkosi, uNkulunkulu kaIsrayeli.

⁴¹ UJoshuwa wabanqoba kusukela eKadeshi‐Barneya kwaze kwafika eGaza, lalo lonke ilizwe laseGosheni, kwaze kwafika eGibeyoni.

⁴² UJoshuwa wathumba wonke lamakhosi lamazwe awo ngasikhathi sinye, ngoba iNkosi uNkulunkulu kaIsrayeli yamlwela uIsrayeli.

⁴³ UJoshuwa wasebuyela ezihonqweni eGiligali kanye laye wonke uIsrayeli.