UJoshuwa 1 - iBhayibhili Elingcwele 1978

Amalungiselelo okunqoba ilizwe lamaKanani

¹ Kwathi emva kokufa kukaMose inceku yeNkosi, iNkosi yathi kuJoshuwa indodana kaNuni, umsizi kaMose:

² UMose inceku yami usefile; ngakhoke suka uchaphe leliJordani wena labo bonke lababantu bakoIsrayeli, liye elizweni engilinika lona.

³ Yonke indawo ezakunyathelwa zinyawo zenu ngilinikile yona njengokuthembisa kwami kuMose.

⁴ Kusukela enkangala ngaseningizimu kuze kufike eLebanoni ngasenyakatho, kusukela emfuleni omkhulu iYufrathi ngasempumalanga, lonke ilizwe lamaHethi, kuze kufike oLwandle olukhulu ngasentshonalanga, kuzakuba yilizwe lenu.

⁵ Kakulamuntu ozakumelana lawe zonke insuku zokuphila kwakho. Njengalokhu ngangiloMose, lawe ngizakuba lawe; kangisoze ngikulahle, kangisoze ngikutshiye.

⁶ Qina, ume isibindi, ngoba nguwe ozanika lababantu ilizwe engafunga ukulinika okhokho babo.

⁷ Qinake, ube lesibindi, uqaphelise ukugcina wonke umlayo uMose inceku yami akulaya ngawo; ungaphambuki kuwo uye ngakwesokunene loba ngakwesokhohlo ukuze uphumelele kuhle kukho konke okwenzayo.

⁸ Umlayo okulincwadi ungasuki emlonyeni wakho, uzacabanga ngawo emini lebusuku ukuba uqaphelise ukwenza konke okulotshiweyo, ukuze ukhule uphumelele kukho konke okwenzayo.

⁹ Kangikulayanga na? Ngathi: Qina, ume isibindi; ungesabi, utshaywe luvalo, ngoba iNkosi uNkulunkulu wakho ilawe kuyo yonke indawo lapha uya khona.

¹⁰ UJoshuwa waselaya izinduna zabantu,

¹¹ esithi: Ngenani ezihonqweni litshele abantu lithi: Zilungiseleni umphako, ngoba ngensuku ezintathu lizachapha iJordani leli, ukuba lingene elizweni iNkosi uNkulunkulu wenu eyalinika lona ukuba lihlale kilo.

¹² UJoshuwa wakhuluma labakoRubeni labakoGadi lengxenye yesizwe sakoManase wathi:

¹³ Khumbulani ilizwi alilaya ngalo uMose inceku yeNkosi esithi: INkosi uNkulunkulu wenu izalinika indawo yokuphumula, ilinike lelilizwe.

¹⁴ Omkenu labantwana benu lenkomo zenu kuzasala elizweni uMose alinika lona ngaphetsheya kweJordani; kodwa wonke amabutho enu azachapha ehlomile phambi kwabafowenu, abasize,

¹⁵ iNkosi ize ibanike abafowenu ukuphumula njengani, bangene elizweni iNkosi uNkulunkulu wenu ebanika lona. Libuyeke elizweni lenu, lihlale kilo, ilizwe uMose inceku yeNkosi alinika lona ngaphetsheya kweJordani ngasempumalanga.

¹⁶ Basebemphendula uJoshuwa besithi: Konke osilaya khona sizakukwenza, lalapho uzasithuma khona sizakuhamba.

¹⁷ Njengalokhu samlalela uMose ezintweni zonke, laweke sizakukulalela. Kuphela nje iNkosi uNkulunkulu wakho ibe lawe njengoba yayiloMose.

¹⁸ Lowo odelela umlayo wakho engalaleli amazwi akho kukho konke omlaya khona uzabulawa. Qina kuphela, ume isibindi.