UJona 3 - iBhayibhili Elingcwele 1978

Ukuphenduka kweNineve

¹ Ilizwi leNkosi lafika kuJona ngokwesibili lisithi:

² Suka uye eNineve kulowana umuzi omkhulu, umemezele kulo ilizwi engikutshela lona.

³ Ngakho uJona wasuka waya eNineve njengokutsho kwelizwi leNkosi. INineve lalingumuzi omkhulu kakhulu ohanjwa insuku ezintathu.

⁴ UJona waqala ukungena emzini, wawuhamba usuku lwaba lunye. Wamemeza wathi: Kusele insuku ezingamatshumi amane ukuba iNineve lichitheke.

⁵ Abantu baseNineve bakholwa kuNkulunkulu, bamemezela ukuba kuzilwe ukudla, bagqoka izambatho zokulila, kusukela komkhulu wabo kwaze kwafika komncinyane.

⁶ Indaba yafinyelela enkosini yaseNineve; yasuka esihlalweni sayo sobukhosi, yakhumula ingubo yayo, yagqoka isambatho sokulila, yahlala emlotheni.

⁷ Yamemezela eNineve yathi: Ngomthetho wenkosi lezikhulu zayo kakungadli kunathe umuntu lenyamazana lenkomo lemvu;

⁸ bonke kabagqoke izambatho zokulila, bakhale kakhulu kuNkulunkulu, baphenduke bonke endleleni zabo ezimbi lasebubini bonke ababenzayo.

⁹ Kwazi bani ukuba uNkulunkulu angezisole, ludede ulaka lwakhe olukhulu ukuze singabhubhi.

¹⁰ Lapho uNkulunkulu ebona izenzo zabo ukuba baphendukile ebubini babo, wazisola ngobubi ayezakubenza kibo, kasabenzanga.