UJohane 9 - iBhayibhili Elingcwele 1978

UJesu uvula amehlo esiphofu

¹ Wathi edlula, wabona umuntu oyisiphofu kusukela ekuzalweni kwakhe.

² Abafundi bakhe bambuza bathi: Mfundisi, ngubani owonayo, lumuntu ingabe abazali bakhe aze azalwe eyisiphofu na?

³ UJesu waphendula wathi: Konanga lumuntu loba abazali bakhe, kodwa ukuze kubonakaliswe imisebenzi kaNkulunkulu kuye.

⁴ Kufanele sisebenze imisebenzi yongithumileyo kusesemini; ubusuku buyeza lapho kungesebenze muntu.

⁵ Ngisekhona emhlabeni ngiyikukhanya komhlaba.

⁶ Esetshilo lokhu wakhafulela phansi, wenza udaka ngamathe, waninda amehlo aso ngodaka.

⁷ Wathi kuso: Hamba uyegeza echibini laseSilowama, okutsho ukuthi oThunyiweyo; sasesihamba, sageza, sabuya sesibona.

⁸ Ngakho abakhelene laso lalabo ababesibonile ngaphambili singumphanzi bathi: Kasuye lo owayehlala ephanza na?

⁹ Abanye bathi: Nguye; labanye bathi: Atshi, kodwa ufana laye. Yena wathi: Nginguye.

¹⁰ Basebesithi kuye: Pho, avulwe kanjani amehlo akho na?

¹¹ Waphendula wathi: Umuntu othiwa nguJesu wenze udaka, waninda amehlo ami, wathi kimi: Hamba uye eSilowama, ugeze. Ngasengihamba, ngageza, ngabona.

¹² Bathi kuye: Ungaphi yena na? Wathi: Kangazi.

¹³ Basebemletha kubaFarisi lowo owayekade eyisiphofu.

¹⁴ KwakuyiSabatha mhla uJesu esenza udaka, evula amehlo akhe.

¹⁵ AbaFarisi bambuza futhi ukuba ubone kanjani. Wathi kibo: Waninda amehlo ami ngodaka, ngageza, sengibona.

¹⁶ Ngakho abanye babaFarisi bathi: Lumuntu kaveli kuNkulunkulu, ngoba kagcini iSabatha. Kodwa abanye bathi: Umuntu oyisoni angazenza kanjani izibonakaliso ezinje na? Kwaba khona ukwahlukana phakathi kwabo.

¹⁷ Baphinda bathi kuso isiphofu: Wena uthini ngaye, lokhu evule amehlo akho na? Wathi: Ungumprofethi.

¹⁸ Kodwa abaJuda kabakholwanga ngaye ukuthi wayekade eyisiphofu wazuza ukubona, baze babiza abazali bakhe lowo osebona.

¹⁹ Bababuza bathi: Lo uyindodana yenu elithi yazalwa iyisiphofu na? Pho, isibona njani khathesi na?

²⁰ Abazali bakhe baphendula bathi: Siyazi ukuthi lo uyindodana yethu lokuthi wazalwa eyisiphofu;

²¹ kodwa ukuthi usebona kanjani khathesi kasikwazi, lokuthi ngubani ovule amehlo akhe kasikwazi; mbuzeni, usekhulile, uzakuzikhulumela yena.

²² Abazali bakhe batsho lokhu, ngoba besaba abaJuda. Ngoba abaJuda basebevumelene ngokuthi, uba ekhona ovuma ukuba unguKristu, kakhutshwe esinagogeni.

²³ Kungakho abazali bakhe bathi: Usekhulile, mbuzeni.

²⁴ Bambizake ngokwesibili lowomuntu owayeyisiphofu, bathi kuye: Dumisa uNkulunkulu; thina siyazi ukuthi lowomuntu uyisoni.

²⁵ Yena wasephendula esithi: Loba eyisoni kangazi; kunye engikwaziyo, ukuthi bengiyisiphofu, khathesi sengibona.

²⁶ Bathi kuye futhi: Wenzani kuwe na Wavula kanjani amehlo akho na?

²⁷ Wabaphendula wathi: Sengilitshelile, kodwa kalizwanga; lifunelani ukuzwa futhi na? Liyafisa lani ukuba ngabafundi bakhe na?

²⁸ Basebemthuka besithi: Nguwe ongumfundi wakhe, kodwa thina singabafundi bakaMose.

²⁹ Siyazi ukuthi uNkulunkulu wakhuluma kuMose, kodwa lumuntu kasimazi lapho avela khona.

³⁰ Yena waphendula wathi: Lokhu kuyisimanga ukuthi kalimazi lapho avela khona, kanti uvule amehlo ami.

³¹ Siyazi ukuthi uNkulunkulu kazizwa izoni, kodwa uba umuntu engokhonza uNkulunkulu, esenza intando yakhe, uNkulunkulu uyamuzwa lowo.

³² Kulokhu kwadatshulwa umhlaba kakuzanga kuzwakale ukuthi kukhona owavula amehlo omuntu owazalwa eyisiphofu.

³³ Uba lumuntu ebengaveli kuNkulunkulu, ubengenze lutho.

³⁴ Basebemphendula besithi: Wena wazalelwa esonweni impela; wena uyasifundisa na? Basebemkhupha esinagogeni.

³⁵ UJesu wezwa ukuthi bamkhuphile; kwathi esemfumene, wathi kuye: Uyakholwa eNdodaneni yomuntu na?

³⁶ Yena waphendula wathi: Ingubani, Nkosi, ukuze ngikholwe kuyo na?

³⁷ UJesu wathi kuye: Usuyibonile; yiyo ekhuluma lawe.

³⁸ Wasesithi: Nkosi, ngiyakholwa. Wamkhonza.

³⁹ UJesu wathi: Mina ngizele ukuthonisisa kulumhlaba, ukuba abangaboniyo babone, lalabo ababonayo babe yiziphofu.

⁴⁰ Labo kubaFarisi ababelaye bezwa lokhu, bathi kuye: Lathi njalo siyiziphofu na?

⁴¹ UJesu wathi kibo: Uba beliyiziphofu, ngabe kalilaso isono. Kodwa ngoba lisithi: Siyabona; isono senu simi.