UJohane 8 - iBhayibhili Elingcwele 1978

¹ Kodwa uJesu waya entabeni ethiwa iOliveti.

Owesifazana obanjwe ephinga

² Ekuseni kakhulu wabuya weza ethempelini; bonke abantu beza kuye; wahlala phansi, wabafundisa.

³ Ababhali labaFarisi baletha owesifazana owayebanjwe ephinga; bammisa phakathi kwabo,

⁴ bathi kuye: Mfundisi, lowesifazana ubanjwe esoqotsheni lokuphinga.

⁵ Emlayweni uMose wasilaya ngabanje ukuba bakhandwe ngamatshe. Pho, wena uthini?

⁶ Batsho lokhu bemlinga, ukuze bammangalele. Kodwa uJesu wakhothama, waloba ngomunwe phansi.

⁷ Kwathi bephikelela ukumbuza, walulama, wathi kibo: Ongelasono phakathi kwenu kaqale ukumjikijela ngelitshe.

⁸ Wabuya wakhothama, waloba ngomunwe phansi.

⁹ Bathi ukuzwa lokhu, baphuma ngamunye, kuqala kwabadala, uJesu wasala yedwa lowesifazana emi phambi kwakhe.

¹⁰ UJesu waselulama, wathi kuye: Mama, bangaphi na? Kakho okulahlayo na?

¹¹ Wathi: Kakho, Nkosi. UJesu wathi: Lami kangikulahli. Hamba, ungabe usona futhi.]

Ukukhanya komhlaba

¹² UJesu wakhuluma labo futhi wathi: Mina ngiyikukhanya komhlaba; ongilandelayo kasoze ahamba emnyameni, kodwa uzakuba lokukhanya kokuphila.

¹³ Ngakho abaFarisi bathi kuye: Uyazifakazela wena; ubufakazi bakho kabulaqiniso.

¹⁴ UJesu wabaphendula wathi: Uba ngizifakazela mina, ubufakazi bami buqinisile, ngoba ngiyazi ukuthi ngivela ngaphi lokuthi ngiya ngaphi; kodwa lina kalazi ukuthi ngivela ngaphi lokuthi ngiya ngaphi.

¹⁵ Lina lisola ngokwenyama, kodwa mina kangisoli muntu.

¹⁶ Kodwa uba ngisola, ukusola kwami kuqinisile, ngoba kangingedwa, kodwa yimi longithumileyo.

¹⁷ Emlayweni wenu kulotshiwe ukuthi ubufakazi babantu ababili bungobuqinisileyo.

¹⁸ Mina ngingozifakazelayo; loBaba ongithumileyo ufakaza ngami.

¹⁹ Ngakhoke bathi kuye: Ungaphi uYihlo na? UJesu waphendula wathi: Kalingazi mina; loBaba kalimazi. Uba belingazi mina belizakumazi loBaba laye.

²⁰ Wakhuluma lamazwi engasesitsheni somnikelo efundisa ethempelini; kakho owambambayo, ngoba isikhathi sakhe sasingakafiki.

UJesu ulaya abaJuda ngesikhathi esesabekayo esizayo

²¹ Wasesithi kibo futhi: Ngiyahamba mina, lizakungifuna, kodwa lizakufela esonweni senu; lapho ngiya khona mina, lingeze leza lina.

²² AbaJuda basebesithi: Uzakuzibulala yini? Nangu esithi: Lapho ngiya khona mina lingeze leza lina.

²³ Wathi kibo: Lina lingabavela phansi, mina ngingovela phezulu; lina lingabomhlaba lo, mina kangisuye owalumhlaba.

²⁴ Ngakhoke ngithe kini: Lizakufela ezonweni zenu; uba lingakholwa ukuthi nginguye lizakufela ezonweni zenu.

²⁵ Basebesithi kuye: Wena ungubani na? UJesu wathi kibo: Kambe ngikhulumelani lani na?

²⁶ Ngilezinto ezinengi engilokuzikhuluma ngani lokulisola ngazo, kodwa ongithumileyo uqinisile, lami ngikhuluma emhlabeni lokho engikuzwe kuye.

²⁷ Kabaqedisisanga ukuthi ukhuluma kibo ngoYise.

²⁸ Ngakho uJesu wathi kibo: Nxa seliyiphakamisile iNdodana yomuntu, kung’khona lizakwazi ukuthi nginguye lokuthi kangizenzeli lutho ngokwami, kodwa ngikhuluma njengalokhu uBaba engifundisile.

²⁹ Yena ongithumileyo ulami, kangitshiyanga ngedwa, ngoba ngihlala ngisenza lokho okuthandeka kuye.

UJesu uphendulana labaJuda ngoAbrahama

³⁰ Esakhuluma lokhu, abanengi bakholwa kuye.

³¹ Ngakho uJesu wathi kubaJuda abakholwe kuye: Uba lihlala elizwini lami, lingabafundi bami isibili;

³² lizakulazi iqiniso, leqiniso lizakulikhulula.

³³ Bamphendula bathi: Siyinzalo kaAbrahama thina, kasizanga sibe yizigqili zamuntu; pho, utsho kanjani ukuthi: Lizakuba ngabakhululekileyo, na?

³⁴ UJesu wabaphendula wathi: Ngiqinisile, ngiqinisile ngithi kini: Ilowo lalowo owenza isono uyisigqili sesono.

³⁵ Isigqili kasihlali kokuphela ekhaya; kodwa indodana ihlala kokuphela.

³⁶ Ngakhoke uba iNdodana ilikhulula, lizakuba ngabakhululekileyo impela.

³⁷ Ngiyazi ukuthi liyinzalo kaAbrahama; kodwa lifuna ukungibulala, ngoba ilizwi lami kalilandawo kini.

³⁸ Ngikhuluma lokho engikubonileyo mina kuBaba; lanike lenza lokho elikuzwileyo kuyihlo.

³⁹ Bamphendula bathi: Ubaba nguAbrahama. UJesu wathi kubo: Uba belingabantwana bakaAbrahama, belizakwenza imisebenzi kaAbrahama.

⁴⁰ Kodwa khathesi lifuna ukungibulala mina muntu olitshele iqiniso, engilizwe kuNkulunkulu; uAbrahama kakwenzanga lokho.

⁴¹ Lina lenza imisebenzi kayihlo. Bathi kuye: Kasizalwanga ngobufebe thina; silobaba munye, uNkulunkulu.

⁴² UJesu wathi kubo: Uba uNkulunkulu ubenguyihlo, belizakungithanda mina, ngoba ngifike ngivela kuNkulunkulu; ngoba kangizizelanga ngokwami, kodwa yena ungithumile.

⁴³ Kungani lingaqedisisi inkulumo yami na? Kungoba kalilakulizwa ilizwi lami.

⁴⁴ Lina lingabakayihlo uSathane, lithanda ukwenza inkanuko zakhe. Yena wayengumbulali kusukela ekuqaleni, kemi eqinisweni, ngoba iqiniso kalikho kuye. Nxa eqamba amanga, ukhuluma njengesimo sakhe, ngoba engumqambi wamanga loyise wamanga.

⁴⁵ Kodwa mina, ngoba ngikhuluma iqiniso, kalingikholwa.

⁴⁶ Nguwuphi kini ongangilahla ngesono na? Uba ngilitshela iqiniso, kalingikholwa ngani na?

⁴⁷ Yena ongokaNkulunkulu uyawezwa amazwi kaNkulunkulu; kungakho lina lingezwa ngoba kalisibo abakaNkulunkulu.

⁴⁸ AbaJuda bamphendula bathi: Kasiqinisile yini ngokuthi ungumSamariya lokuthi ulomoya omubi na?

⁴⁹ UJesu waphendula wathi: Kangilaye umoya omubi. Kodwa ngiyadumisa uBaba; lina liyangigcona.

⁵⁰ Minake kangizifuneli olwami udumo; ukhona olufunayo lothonisisayo.

⁵¹ Ngiqinisile, ngiqinisile ngithi kini: Uba umuntu egcina ilizwi lami, kayikukubona ukufa lanini.

⁵² AbaJuda bathi kuye: Khathesi sesisazi ukuthi ulomoya omubi; uAbrahama wafa, labaprofethi; kodwa wena uthi: Uba umuntu egcina ilizwi lami, kayikukuzwa ukufa lanini.

⁵³ Wena umkhulu yini kulobaba uAbrahama osewafa labaprofethi asebafa na? Uzenza bani wena na?

⁵⁴ UJesu waphendula wathi: Uba ngizidumisa mina, udumo lwami luyize; nguBaba ongidumisayo, elitsho ngaye ukuthi unguNkulunkulu wenu.

⁵⁵ Kodwa kalimazanga; mina ngiyamazi. Uba ngisithi kangimazi, ngizakuba ngumqambi wamanga njengani. Kodwa mina ngiyamazi, ngiyaligcina ilizwi lakhe.

⁵⁶ Uyihlo uAbrahama wajabulela ukubona usuku lwami; walubona, wathokoza.

⁵⁷ AbaJuda basebesithi kuye: Kawukabi leminyaka engamatshumi amahlanu, wake wambona uAbrahama na?

⁵⁸ UJesu wathi kubo: Ngiqinisile, ngiqinisile ngithi kini: UAbrahama engakabi khona, ngangivele ngikhona mina.

⁵⁹ Basebedobha amatshe ukuba bamkhande. Kodwa uJesu wasithela, waphuma ethempelini.