UJohane 7 - iBhayibhili Elingcwele 1978

UJesu wenyukela eJerusalema ngomkhosi wamadumba

¹ Emva kwalokhu uJesu wahamba eGalili, engathandi ukuhamba eJudiya, ngoba abaJuda babefuna ukumbulala.

² Wawusondele umkhosi wabaJuda, umkhosi wamadumba.

³ Ngakho abafowabo bathi kuye: Suka lapha, uye eJudiya, ukuze abafundi bakho babone imisebenzi oyenzayo.

⁴ Ngoba kakho umuntu owenza ulutho ensitha, yena efuna ukwaziwa obala. Uba uzenza lezizinto, ziveze wena emhlabeni.

⁵ Ngoba labafowabo babengakholwa kuye.

⁶ Ngakhoke uJesu wathi kibo: Isikhathi sami kasikafiki, kodwa esenu isikhathi sihlala sikhona.

⁷ Ungelizonde umhlaba lina, kodwa mina uyangizonda, ngoba ngifakaza ngawo ukuba imisebenzi yawo mibi.

⁸ Yenyukelani lina emkhosini, mina kangenyukeli kulumkhosi; ngoba isikhathi sami kasikapheleli.

⁹ Esetshilo lokhu wahlala eGalili.

¹⁰ Sebenyukele emkhosini abafowabo, laye wenyuka kungesikho obala kodwa ensitha.

¹¹ AbaJuda bamdinga emkhosini, besithi: Ungaphi na?

¹² Kwakukhona ukukhuluma okukhulu ngaye phakathi kwexuku. Abanye bathi: Ungumuntu olungileyo. Kodwa abanye bathi: Atshi, uyabaduhisa abantu.

¹³ Kodwa ngokwesaba abaJuda kwakungekho muntu owakhuluma obala ngaye.

Imfundiso ngoKristu

¹⁴ Kwathi umkhosi usuphakathi, uJesu wangena ethempelini, wafundisa.

¹⁵ Ngakho abaJuda bamangala bathi: Lumuntu uyazi kanjani imibhalo yena engafundanga na?

¹⁶ UJesu waphendula wathi: Imfundiso yami kayisiyo eyami kodwa ngeyalowo ongithumileyo.

¹⁷ Uba umuntu ethanda ukwenza intando kaNkulunkulu, uzakwazi ngemfundiso ukuba ivela kuNkulunkulu ingabe ngizikhulumela ngokwami.

¹⁸ Ozikhulumela ngokwakhe uzifunela udumo; kodwa ofuna udumo lwalowo omthumileyo uqinisile; kakukho ukungalungi kuye.

¹⁹ Kalinikanga yini uMose umlayo? Kodwa kakho kini ogcina umlayo. Lifunelani ukungibulala na?

²⁰ Ixuku laphendula lathi: Ulomoya omubi wena; ngubani ofuna ukukubulala na?

²¹ UJesu wabaphendula wathi: Ngenze umsebenzi waba munye, lonke liyamangala.

²² UMose walinika ukusoka — kungesikho ukuthi kwavela kuMose kodwa kubokhokho — liyamsoka umuntu langeSabatha.

²³ Uba ngeSabatha umuntu esamukela ukusoka ukuze kungephulwa umlayo kaMose, lingithukuthelela ngoba ngasilisa umuntu ngokupheleleyo ngeSabatha na?

²⁴ Lingasoli ngokubona ngokwamehlo nje, kodwa solani ngokusola okuqondileyo.

²⁵ Abanye kwabaseJerusalema basebesithi: Lo kasuye yini abafuna ukumbulala na?

²⁶ Khangela, nangu ukhuluma obala, kabatsho lutho kuye. Kungaba yikuthi ababusi sebesazi isibili ukuthi lo unguKristu na?

²⁷ Kodwa lumuntu siyazi lapho avela khona; nxa uKristu efika, kakho ozakwazi lapho avela khona.

²⁸ Ngakho uJesu efundisa ethempelini wamemeza wathi: Liyangazi mina, liyakwazi lapho ngivela khona; kodwa kangizizelanga ngokwami, ongithumileyo uqinisile, elingamaziyo lina.

²⁹ Ngiyamazi mina, ngoba ngivela kuye, nguye ongithumileyo.

³⁰ Ngakho bafuna ukumbamba, kodwa kakubanga khona owabeka izandla phezu kwakhe, ngoba isikhathi sakhe sasingakafiki.

³¹ Kodwa abanengi bexuku bakholwa kuye, bathi: Nxa uKristu esefikile, uzakwenza izibonakaliso ezinengi kulalezi azenzileyo lumuntu na?

³² AbaFarisi bezwa ixuku lisola ngaye; abapristi abakhulu labaFarisi bathumela amanxusa ukuba ambambe.

³³ UJesu wasesithi: Ngiselani okwesikhatshana, besengihamba ngiye kongithumileyo.

³⁴ Lizakungifuna, lingangifumani, lalapho ngikhona, lingeze leza lina.

³⁵ Ngakho abaJuda bakhulumisana besithi: Ufuna ukuya ngaphi lumuntu lapho singayikumfumana khona na? Uzakuya kwabahlakazekileyo kumaGriki afundise amaGriki na?

³⁶ Yilizwi bani leli alitshoyo elokuthi: Lizakungifuna, lingangifumani; lelokuthi: Lapho ngikhona lingeze leza lina?

Amanzi okuphila

³⁷ Kwathi ngosuku lokucina olukhulu lomkhosi uJesu wema wamemeza, esithi: Uba ekhona owomileyo, keze kimi, anathe.

³⁸ Okholwa kimi, njengokutsho kombhalo, kuzakugobhoza esiswini sakhe imifula yamanzi aphilayo.

³⁹ Lokhu wakutsho ngoMoya ababezamamukela abakholwa kuye, ngoba uMoya wayengakanikwa, lokhu uJesu wayengakadunyiswa.

⁴⁰ Kwathi abanye bexuku besizwa lamazwi, bathi: Impela lo nguye umprofethi.

⁴¹ Abanye bathi: Lo unguKristu. Kodwa abanye bathi: Kanti uKristu uzavela eGalili na?

⁴² Kawutsho yini umbhalo ukuthi uKristu uzavela enzalweni kaDavida laseBetlehema, emzini lapho uDavida wayekhona na?

⁴³ Ngakho kwaba khona ukwahlukana ngaye phakathi kwexuku.

⁴⁴ Abanye babo bafuna ukumbamba; kodwa kakubanga khona owambeka izandla.

Amanxusa afuna ukumbamba uJesu

⁴⁵ Amanxusa abuyela kubapristi abakhulu lakubaFarisi. Bathi kuwo: Kungani lingamlethanga na?

⁴⁶ Amanxusa aphendula athi: Kakuzange kukhulume umuntu njengokuba ekhuluma lumuntu.

⁴⁷ Basebephendula abaFarisi bathi: Lani seliduhisiwe yini?

⁴⁸ Ukhona yini kubabusi ingabe kubaFarisi okholwe kuye na?

⁴⁹ Kodwa lelixuku elingawaziyo umlayo lithukiwe.

⁵⁰ UNikodima owake weza kuye, owayengomunye wabo, wasesithi kibo:

⁵¹ Kanje umlayo wakithi uyamlahla umuntu angakamuzwa kuqala, ukwazi akwenzayo na?

⁵² Baphendula bathi kuye: Kanti lawe ungowaseGalili na? Hlolisisa, uzakubona ukuthi kakuveli umprofethi eGalili.[

⁵³ Basebesuka, ilowo lalowo waya ekhaya.