UJohane 6 - iBhayibhili Elingcwele 1978

UJesu usuthisa amadoda azinkulungwane ezinhlanu

¹ Emva kwalokhu uJesu wasuka waya ngaphetsheya kolwandle lwaseGalili olungolwaseTiberiyasi.

² Lamlandela ixuku elikhulu, ngoba lalibone izibonakaliso azenza kulabo abagulayo.

³ UJesu wenyukela entabeni, wahlala phansi khona labafundi bakhe.

⁴ IPhasika, umkhosi wabaJuda, lalisondele.

⁵ Wathi uJesu ephakamisa amehlo akhe, wabona ixuku elikhulu lisiza kuye, wathi kuFiliphu: Sizakuthenga ngaphi izinkwa ukuze lababantu badle na?

⁶ Watsho lokhu emlinga, ngoba yena wayekwazi azakukwenza.

⁷ UFiliphu wamphendula wathi: Izinkwa zamadola angamatshumi amabili zingebanele ukuba ilowo lalowo azuze ingcosana nje.

⁸ Omunye wabafundi bakhe, uAndreya umfowabo kaSimoni Petro, wathi kuye:

⁹ Kukhona umfana lapha olezinkwa ezinhlanu zebhali, lenhlanzi ezimbili; kodwa ziyini kwabanengi kangaka na?

¹⁰ UJesu wathi: Bahlaliseni phansi. Kwakukhona utshani obunengi kuleyondawo. Ngakho amadoda ahlala phansi, ubunengi bawo babungaba zinkulungwane ezinhlanu.

¹¹ UJesu wasezithatha izinkwa, esebongile wababela labo ababehlezi phansi; lenhlanzi wababela, njengokuthanda kwabo.

¹² Bathi sebedlile basutha, wathi kubafundi bakhe: Buthani imvuthuluka eseleyo ukuze kungachitheki lutho.

¹³ Basebebutha, bagcwalisa izitsha ezilitshumi lambili ngemvuthuluka yezinkwa ezinhlanu zebhali eyasalayo kulabo abadlayo.

¹⁴ Kwathi abantu bebona isimangaliso asenzileyo, bathi: Impela lo nguye umProfethi omele ukuza emhlabeni.

¹⁵ Kwathi uJesu esebona ukuthi bazakuza, bambambe ngamandla ukumbeka abe yinkosi, wamonyukela futhi entabeni eyedwa.

UJesu uhamba phezu kolwandle

¹⁶ Sekuhlwile abafundi bakhe behlela olwandle,

¹⁷ bangena emkolweni, baqala ukuwelela ngaphetsheya kolwandle ukuya eKapenawume. Kwasekumnyama, uJesu wayengakafiki kibo.

¹⁸ Lwavuka ulwandle, ngoba umoya olamandla wawuvunguza.

¹⁹ Sebegwedlile amakhilomitha amane ingabe amahlanu, babona uJesu ehamba phezu kolwandle, esondela emkolweni; bethuka.

²⁰ Kodwa wathi kibo: Yimi, lingesabi.

²¹ Kwang’khona bevuma ukumamukela emkolweni, wasufika umkolo elizweni ababesiya kilo.

Abantu bacela isibonakaliso kuJesu

²² Ngakusasa ixuku elalimi ngaphetsheya kolwandle labona ukuthi umkolo wawumunye lapho, lokuthi uJesu wayengangenanga emkolweni kanye labafundi bakhe, kodwa abafundi bakhe babehambe bodwa.

²³ Kodwa imikolo evela eTiberiyasi yafika eduze lendawo lapho badla khona isinkwa, emva kokuba iNkosi isibongile.

²⁴ Kwathi abantu sebebonile ukuthi uJesu wayengekho lapho kanye labafundi bakhe, bangena emikolweni, baya eKapenawume bedinga uJesu.

Isinkwa sokuphila

²⁵ Bathi sebemfumene ngaphetsheya kolwandle bathi kuye: Mfundisi, ufike nini lapha na?

²⁶ UJesu wabaphendula wathi: Ngiqinisile, ngiqinisile ngithi kini: Kalingidingi ngoba labona izibonakaliso, kodwa ngoba ladla lasutha izinkwa.

²⁷ Lingasebenzeli ukudla okuphelayo kodwa sebenzelani ukudla okuhlala kuze kube yikuphila okungapheliyo, ezakulinika khona iNdodana yomuntu; ngoba uNkulunkulu uYise ubeke kuyo uphawu lwakhe.

²⁸ Basebesithi kuye: Sizakwenzani ukuze senze imisebenzi kaNkulunkulu?

²⁹ UJesu wabaphendula wathi: Umsebenzi kaNkulunkulu yiwo lo ukuba likholwe kuye amthumileyo.

³⁰ Ngakho bathi kuye: Pho, wenza isibonakaliso bani ukuba sibone, sikholwe kuwe na? Usebenzani na?

³¹ Okhokho badla imana enkangala njengokulotshiweyo ukuthi: Wabanika isinkwa esivela ezulwini ukuba badle.

³² UJesu wasesithi kibo: Ngiqinisile, ngiqinisile ngithi kini: Kwakungesuye uMose owalinika isinkwa esivela ezulwini, kodwa uBaba ulinika isinkwa soqobo esivela ezulwini.

³³ Ngoba isinkwa sikaNkulunkulu siyiso esehla sivela ezulwini, esinika ukuphila emhlabeni.

³⁴ Basebesithi kuye: Nkosi, sinike lesosinkwa njalonjalo.

³⁵ UJesu wathi kibo: Isinkwa sokuphila yimi; lowo oza kimi kasezukulamba, lalowo okholwa kimi kasezukoma.

³⁶ Kodwa ngithe kini: Lingibonile, kodwa kalikholwa.

³⁷ Bonke uBaba anginika bona bazakuza kimi; lozayo kimi angisoze ngimxotshe isibili.

³⁸ Ngoba ngehlile ezulwini kungasukuba ngenze intando yami, kodwa ngenze intando yalowo ongithumileyo.

³⁹ Lokhu kuyintando yalowo ongithumileyo ukuba ngingalahlekelwa langoyedwa wabo bonke anginike bona, kodwa ngibavuse ngosuku lokucina.

⁴⁰ Ngoba lokhu kuyintando kaBaba ukuthi ilowo lalowo obona iNdodana, akholwe kiyo, abe lokuphila okungapheliyo; ngizakumvusa ngosuku lokucina.

⁴¹ AbaJuda basebemsola, ngoba wathi: Ngiyisinkwa esehla ezulwini.

⁴² Bathike: Lo kasuye uJesu indodana kaJosefa, uyise lonina esibaziyo na? Utsho kanjani pho, ukuthi: Ngehle ngivela ezulwini, na?

⁴³ UJesu wabaphendula wathi: Lingasoli phakathi kwenu.

⁴⁴ Kakho ongeza kimi, uba uBaba ongithumileyo engamdonsi; mina ngizakumvusa ngosuku lokucina.

⁴⁵ Kulotshiwe kubaprofethi ukuthi: Bonke bazakufundiswa nguNkulunkulu. Ilowo lalowo omzwileyo uBaba, wafunda, uyeza kimi.

⁴⁶ Kayisikho ukuthi ukhona ombonileyo uBaba, kuphela yena ovela kuNkulunkulu; nguye ombonileyo uBaba.

⁴⁷ Ngiqinisile, ngiqinisile ngithi kini: Yena okholwayo ulokuphila okungapheliyo.

⁴⁸ Mina ngiyisinkwa sokuphila.

⁴⁹ Okhokho benu badla imana enkangala, kodwa bafa.

⁵⁰ Ngikhuluma ngesinkwa esehla sivela ezulwini ukuba umuntu asidle sona, angafi.

⁵¹ Mina ngiyisinkwa esiphilayo esehla sivela ezulwini. Uba umuntu esidla lesisinkwa, uzakuphila kokuphela; isinkwa engizakusinika siyinyama yami engizakuyinikela ngenxa yokuphila komhlaba.

⁵² AbaJuda basebephikisana bodwa, besithi: Lo angasinika kanjani inyama yakhe, siyidle na?

⁵³ Ngakho uJesu wasesithi kibo: Ngiqinisile, ngiqinisile ngithi kini: Uba lingadli inyama yeNdodana yomuntu, linathe igazi layo, kalilakuphila phakathi kwenu.

⁵⁴ Odla inyama yami, anathe igazi lami, ulokuphila okungapheliyo; ngizakumvusa ngosuku lokucina.

⁵⁵ Ngoba inyama yami iyikudla isibili, legazi lami lingokunathwayo isibili.

⁵⁶ Odla inyama yami, anathe igazi lami, uhlala kimi, lami ngihlala kuye.

⁵⁷ Njengalokhu uBaba ophilayo ungithumile, lami ngiphila ngoBaba, ngakho ongidlayo laye uzakuphila ngami.

⁵⁸ Lesi yisinkwa esehla sivela ezulwini kungenjengesinkwa okhokho benu abasidlayo, bafa; yena odla lesisinkwa uzakuphila kokuphela.

⁵⁹ Watsho lezizinto esinagogeni efundisa eKapenawume.

Abafundi abathandabuzayo

⁶⁰ Kwathi abanengi kubafundi bakhe besizwa lokhu bathi: Lilukhuni lelilizwi; ngubani ongalizwa na?

⁶¹ Kodwa uJesu esazi phakathi kwakhe ukuthi abafundi bakhe bayasola ngalokhu, wathi kibo: Kuyaliconula lokhu na?

⁶² Pho, lizakuthini uba libona iNdodana yomuntu isenyukela lapho yayikhona kuqala na?

⁶³ Kungumoya onika ukuphila, inyama kayisizi lutho; amazwi esengiwakhulume kini angumoya, ayikuphila.

⁶⁴ Kodwa bakhona abanye kini abangakholwayo. Ngoba uJesu wakwazi ekuqaleni ukuba ngobani abangakholwayo lokuba ngubani ozakumnikela.

⁶⁵ Wasesithi: Kungenxa yalokhu ngithe kini: Kakho ongeza kimi engakunikwanga nguBaba.

Isivumo sokukholwa kukaPetro

⁶⁶ Emva kwalokhu abanengi babafundi bakhe babuyela emuva, kababe besahamba laye.

⁶⁷ UJesu wasesithi kwabalitshumi lambili: Lani lithanda ukuzihambela na?

⁶⁸ USimoni Petro wamphendula wathi: Nkosi, sizakuya kubani na? Amazwi okuphila okungapheliyo akuwe.

⁶⁹ Siyakholwa, sesisazi ukuthi wena ungoNgcwele kaNkulunkulu.

⁷⁰ UJesu wabaphendula wathi: Kanti kangilikhethanga lina abalitshumi lambili na? Kodwake omunye wenu ungumoya omubi.

⁷¹ Wayekhuluma ngoJudasi indodana kaSimoni Iskariyothi, ngoba nguye owayezakumnikela engomunye wabalitshumi lambili.