UJohane 5 - iBhayibhili Elingcwele 1978

UJesu usilisa isiguli eBethesda

¹ Emva kwalokhu kwaba khona umkhosi wabaJuda; uJesu wakhuphukela eJerusalema.

² Kwakukhonake lapho eJerusalema eduze lesango lezimvu ichibi elithiwa ngesiHeberu iBethesda, elilamathuli amahlanu.

³ Kwakulele kiwo abagulayo abanengi, iziphofu, iziqhuli, labatshwabheneyo. [

⁴ Ngoba isithunywa seNkosi sasisehlela echibini ngezikhathi ezithile, sizamazamise amanzi, kuthi lowo ongene kuqala emva kokuzanyazanyiswa kwamanzi asiliswe esifweni sakhe, loba elesifo sini.]

⁵ Kwakukhona lapho umuntu owayesegule iminyaka engamatshumi amathathu lesificaminwembili.

⁶ Kwathi nxa uJesu embona elele lapho, esazi ukuba ulesikhathi eside enjalo, wathi kuye: Uyathanda ukusiliswa na?

⁷ Ogulayo wamphendula wathi: Nkosi, kangilamuntu wokungifaka echibini nxa amanzi ezanyazanyiswa; kuthi nxa ngiyayo, kwehle omunye phambi kwami.

⁸ UJesu wathi kuye: Sukuma, uthathe ithala lakho, uhambe.

⁹ Lowomuntu wasila masinyane, wathatha ithala lakhe, wahamba. KwakuyiSabatha mhlalokho.

¹⁰ Ngakho abaJuda bathi kosilisiweyo: KuyiSabatha, kakuvunyelwa ukuba uthwale ithala lakho.

¹¹ Kodwa wabaphendula wathi: Yena ongisilisileyo uthe kimi: Thatha ithala lakho, uhambe.

¹² Bambuza bathi: Ngubani lowomuntu othe kuwe: Thatha ithala lakho uhambe, na?

¹³ Kodwa osilisiweyo wayengamazi ukuba ungubani, ngoba uJesu wayesesukile lapho, kukhona ixuku kuleyondawo.

¹⁴ Emva kwalokhu uJesu wamfumana ethempelini, wathi kuye: Khangela, usilile; ungabe usona, funa wehlelwe ngokukhulu kulalokhu.

¹⁵ Wasesuka lowomuntu, watshela abaJuda ukuthi nguJesu omsilisileyo.

¹⁶ Ngenxa yalokhu abaJuda bamzingela uJesu, ngoba wenza lokhu ngeSabatha.

¹⁷ Kodwa uJesu wabaphendula wathi: UBaba uyasebenza kuze kube lamhlanje, lamike ngiyasebenza.

¹⁸ Ngenxa yalokhuke abaJuda bafuna kakhulu ukumbulala, ngoba wayengaphulanga iSabatha kuphela, kodwa wabuya wathi uNkulunkulu unguYise, ezenza olingana loNkulunkulu.

UJesu uyiNdodana kaNkulunkulu

¹⁹ Wasesithi kibo: Ngiqinisile, ngiqinisile ngithi kini: INdodana ingenze lutho ngokwayo, kodwa kuphela lokho ebona uYise ekwenza, ngoba lokhu akwenzayo leNdodana iyakwenza njalo.

²⁰ Ngoba uYise uyayithanda iNdodana, ayitshengise konke akwenzayo yena; uzakuyitshengisa imisebenzi emikhulu kulale ukuze limangale.

²¹ Njengalokhu uYise evusa abafileyo, abanike ukuphila, kunjaloke leNdodana iyabanika ukuphila labo ethanda ukubasilisa.

²² Ngoba uYise kahluleli muntu; kodwa unikele iNdodana konke ukwahlulela,

²³ ukuze bonke badumise iNdodana, njengalokhu bedumisa uYise. Ongayidumisiyo iNdodana kamdumisi uYise oyithumileyo.

²⁴ Ngiqinisile, ngiqinisile ngithi kini: Olizwayo ilizwi lami, akholwe kuye ongithumileyo, ulokuphila okungapheliyo; kangeni ekwahlulelweni, kodwa usephumile ekufeni, wangena ekuphileni.

²⁵ Ngiqinisile, ngiqinisile ngithi kini: Isikhathi siyeza, njalo sesikhona, lapho abafileyo bazakulizwa ilizwi leNdodana kaNkulunkulu; labo abezwayo bazakuphila.

²⁶ Njengoba uYise elokuphila ngokwakhe, kunjaloke uyinikile iNdodana ukuba ibe lokuphila ngokwayo.

²⁷ Uyiphile amandla okwahlulela, ngoba iyiNdodana yomuntu.

²⁸ Lingamangali ngalokhu, ngoba isikhathi siyeza, lapho bonke abasemalibeni bazakulizwa ilizwi layo,

²⁹ kuthi labo abenze okulungileyo baphumele ekuvukeni kokuphila, lalabo abenze okubi baphumele ekuvukeni kokulahlwa.

Ukumfakazela uJesu

³⁰ Mina ngingenze lutho ngokwami; ngithonisisa njengokuzwa kwami; ukuthonisisa kwami kulungile, ngoba kangifuni intando yami kodwa ngifuna intando yalowo ongithumileyo.

³¹ Aluba ngizifakazela mina, ubufakazi bami kabulaqiniso.

³² Ukhona ongifakazelayo mina; njalo ngiyazi ukuthi ubufakazi bakhe ngami buliqiniso.

³³ Lina lathumela kuJohane, walifakazela iqiniso.

³⁴ Kodwa kangibamukeli ubufakazi obuvela emuntwini; kodwa ngitsho lokhu ukuze lisiliswe.

³⁵ Yena wayeyisibane esivuthayo lesikhanyayo; lani lathokoza okwesikhatshana ekukhanyeni kwakhe.

³⁶ Kodwa ubufakazi engilabo bukhulu kulobukaJohane, ngoba imisebenzi uBaba anginike yona ukuba ngiyiqede, yona limisebenzi engiyenzayo, iyangifakazela ukuthi uBaba ungithumile.

³⁷ Laye uBaba ongithumileyo ungifakazele. Kalizanga lilizwe ilizwi lakhe, lesimo sakhe kalizanga lisibone.

³⁸ Lelizwi lakhe kalihlalanga phakathi kwenu, ngoba kalikholwanga kulowo amthumileyo.

³⁹ Lihlola imibhalo, ngoba lisithi lilokuphila okungapheliyo kiyo; yiyo engifakazelayo.

⁴⁰ Kanti kalivumi ukuza kimi ukuba libe lokuphila.

⁴¹ Mina angamukeli udumo ebantwini.

⁴² Kodwa ngiyalazi lina ukuthi kalilalo uthando lukaNkulunkulu phakathi kwenu.

⁴³ Ngizile ebizweni likaBaba, kodwa kalingamukeli; uba omunye esiza ngebizo lakhe, lizakumamukela yena.

⁴⁴ Lingakholwa kanjani nxa lisadumisana lodwa, lingalufuni udumo oluvela kuNkulunkulu oyedwa na?

⁴⁵ Lingacabangi ukuthi ngizakuliceba kuBaba; ukhona olicebayo, uMose elithemba kuye.

⁴⁶ Uba belikholwa kuMose, belizakukholwa lakimi, ngoba yena waloba ngami.

⁴⁷ Kodwa uba lingakholwa imibhalo yakhe, lizakukholwa kanjani amazwi ami na?