UJohane 4 - iBhayibhili Elingcwele 1978

UJesu ukhuluma lowesifazana womSamariya

¹ AbaFarisi bezwa ukuba uJesu uyazuza abafundi, ubhaphathiza abanengi kuloJohane,

² lanxa uJesu ngokwakhe wayengabhaphathizi kodwa abafundi bakhe.

³ UJesu esezwile lokhu wasuka eJudiya, wabuyela futhi eGalili.

⁴ Kwasweleka ukuba adabule eSamariya.

⁵ Wafika emzini waseSamariya okuthiwa yiSikari, eduze lesiqinti uJakobe asinika indodana yakhe uJosefa.

⁶ Umthombo kaJakobe wawulapho. UJesu ekhathele yikuhamba wahlala emthonjeni. Kwakusemini.

⁷ Kwafika owesifazana womSamariya ukuba akhe amanzi. UJesu wathi kuye: Nginathisa.

⁸ Ngoba abafundi bakhe babehambile baya emzini ukuba bathenge ukudla.

⁹ Kwang’khona owesifazana womSamariya wathi kuye: Kungani wena ungumJuda ucela ukunathiswa yimi ngingowesifazana womSamariya na? — Ngoba abaJuda kabadlelani lamaSamariya.

¹⁰ UJesu wathi kuye: Uba ubusazile isiphiwo sikaNkulunkulu lokuthi ungubani othi kuwe: Nginathisa; ubuzakucela kuye, yena ubezakukunika amanzi aphilisayo.

¹¹ Wathi kuye: Nkosi, kawulalutho lokukha, lomthombo uyatshona, uwathathaphi pho lamanzi aphilisayo na?

¹² Wena umkhulu kulokhokho uJakobe owasinika umthombo, wanatha kiwo, yena lamadodana akhe lemihlambi yakhe, na?

¹³ UJesu waphendula, wathi kuye: Ilowo lalowo onatha lamanzi uzakoma futhi;

¹⁴ kodwa lowo onatha amanzi engizakumnika wona kasayikoma; amanzi engizakumnika wona azakuba ngumthombo ogobhozayo phakathi kwakhe, kube yikuphila okungapheliyo.

¹⁵ Owesifazana wathi kuye: Nkosi, nginike lawomanzi ukuze ngingomi, ngingabe ngiseza ukukha lapha.

¹⁶ Wathi kuye: Hamba ubize indoda yakho, uze lapha.

¹⁷ Owesifazana waphendula wathi kuye: Kangilandoda. UJesu wathi kuye: Utsho kuhle ukuthi kawulandoda;

¹⁸ ngoba usuke waba lamadoda amahlanu; le olayo khathesi kayisiyo indoda yakho. Lokhu ukutsho uqinisile.

¹⁹ Owesifazana wathi kuye: Nkosi, ngiyabona ukuthi wena ungumprofethi.

²⁰ Okhokho babekhonza kulintaba; kodwa lina lithi eJerusalema yindawo lapho kufanele abantu bakhonze khona.

²¹ UJesu wathi kuye: Mama, kholwa kimi, isikhathi siyeza, lapho lingasayikukhonza uBaba kulintaba ingabe eJerusalema.

²² Lina likhonza elingakwaziyo, thina sikhonza esikwaziyo; ngoba ukusiliswa kuvela kubaJuda.

²³ Kodwa isikhathi siyeza, njalo sesifikile, lapho abakhonzi abaqotho bazakukhonza uBaba ngomoya langeqiniso; ngoba uBaba ufuna abamkhonzayo babe njalo.

²⁴ UNkulunkulu unguMoya; labo abamkhonzayo bafanele ukukhonza ngomoya langeqiniso.

²⁵ Owesifazana wathi kuye: Ngiyazi ukuthi uMesiya uyeza, yena okuthiwa nguKristu; nxa esefikile, uzakusitshela konke.

²⁶ UJesu wathi kuye: Mina engikhuluma lawe nginguye.

²⁷ Ngalesosikhathi bafika abafundi bakhe; bamangala ngoba ekhuluma lowesifazana; kodwa kakho owathi: Ufunani na? Ukhulumelani laye na?

²⁸ Owesifazana wasetshiya imbiza yakhe, waya emzini, wathi ebantwini:

²⁹ Wozani libone umuntu ongitshele konke engikwenzileyo; kungaba nguye uKristu lo, kambe?

³⁰ Baphuma emzini beza kuye.

³¹ Kusenjalo abafundi bamncenga besithi: Mfundisi, dlana.

³² Kodwa wathi kibo: Ngilakho ukudla engikudlayo elingakwaziyo.

³³ Basebekhulumisana abafundi, besithi: Ukhona yini omlethele ukudla na?

³⁴ UJesu wathi kibo: Ukudla kwami kuyikwenza intando yongithumileyo, lokuqeda umsebenzi wakhe.

³⁵ Kalitsho yini ukuthi kusasele inyanga ezine kufike ukuvuna na? Khangelani, ngithi kini: Phakamisani amehlo enu, libone ukuthi amabele asemhlophe, aselungele ukuvunwa.

³⁶ Ovunayo wamukela umvuzo, abuthe isithelo esiba yikuphila okungapheliyo ukuze ohlanyelayo lovunayo bathokoze bebonke.

³⁷ Ngoba kulokhu ilizwi liqinisile elokuthi: Omunye uyahlanyela, lomunye uyavuna.

³⁸ Ngalithuma ukuvuna lokho elingakusebenzelanga; abanye basebenzile, lina selingenile emsebenzini wabo.

³⁹ AmaSamariya amanengi akulowomuzi akholwa kuye ngenxa yobufakazi bowesifazana obokuthi: Ungitshele konke engikwenzileyo.

⁴⁰ Kwathi esefikile kuye amaSamariya amcela ukuba ahlale lawo; wahlala khona insuku ezimbili.

⁴¹ Abanye abanengi bakholwa ngenxa yelizwi lakhe.

⁴² Bathi kowesifazana: Kasisakholwa ngenxa yamazwi akho nje, ngoba sesizizwele thina, siyazi ukuba isibili lo unguMsilisi womhlaba.

Ukusiliswa kwendodana yenduna eKapenawume

⁴³ Kwathi ngemva kwensuku ezimbili wasuka lapho waya eGalili.

⁴⁴ Ngoba yena uJesu uqobo wafakaza ukuthi umprofethi kadunyiswa elizweni lakibo.

⁴⁵ Wathi esefikile eGalili, abaseGalili bamamukela bebonile konke akwenzayo eJerusalema emkhosini; ngoba labo babeyile emkhosini.

⁴⁶ Wafika futhi eKana elaseGalili, lapho enza khona amanzi aba liwayini. Kwakukhona induna ethile yenkosi eyayilendodana egulayo eKapenawume.

⁴⁷ Yathi isizwile ukuba uJesu ufikile eGalili evela eJudiya, yaya kuye yamncenga ukuba eze asilise indodana yayo, ngoba yayisiphela.

⁴⁸ Ngakho uJesu wathi kuyo: Uba lingaboni izibonakaliso lezimangaliso, kaliyikukholwa.

⁴⁹ Induna yenkosi yathi kuye: Nkosi, woza engakafi umntanami.

⁵⁰ UJesu wathi kuyo: Hamba, indodana yakho izakusila. Indoda yakholwa ilizwi uJesu alikhuluma kuyo, yasuka yahamba.

⁵¹ Kwathi iseza, inceku zayo zayihlangabeza, zayitshela ukuthi umntanayo usilile.

⁵² Yasizibuza isikhathi aqale ngaso ukuba ngcono. Zasezisithi kuyo: Izolo ngokwephuka kwelanga umkhuhlane umyekele.

⁵³ Ngakho uyise wazi ukuthi yiso lesosikhathi lapho uJesu wathi kuye: Indodana yakho izakusila. Wakholwa yena lendlu yakhe yonke.

⁵⁴ Lesi yisibonakaliso sesibili uJesu asenza efikile eGalili evela eJudiya.