UJohane 3 - iBhayibhili Elingcwele 1978

UJesu ukhuluma loNikodima

¹ Kwakukhona umuntu wakubaFarisi, uNikodima ibizo lakhe, isikhulu sabaJuda.

² Yena weza kuye ebusuku, wathi kuye: Mfundisi, siyazi ukuthi ungumfundisi ovela kuNkulunkulu, ngoba kakho ongenza lezizibonakaliso ozenzayo uba uNkulunkulu engelaye.

³ UJesu wamphendula wathi: Ngiqinisile, ngiqinisile ngithi kuwe: Uba umuntu engazalwa ngokutsha, angewubone umbuso kaNkulunkulu.

⁴ UNikodima wathi kuye: Umuntu angazalwa kanjani esemdala na? Angangena ngokwesibili esiswini sikanina, azalwe na?

⁵ UJesu wathi: Ngiqinisile ngithi kuwe: Uba umuntu engazalwanga ngamanzi langoMoya, angengene embusweni kaNkulunkulu.

⁶ Lokho okuzelwe yinyama kuyinyama; lalokho okuzelwe nguMoya kungumoya.

⁷ Ungamangali ngoba ngithe kuwe: Ngabe lizalwa ngokutsha.

⁸ Umoya uphephethela lapho uthanda khona; uyaluzwa udumo lwawo, kodwa kawazi lapho uvela khona lalapho uya khona; banjalo bonke abazelwe nguMoya.

⁹ UNikodima wamphendula wathi: Lokhu kungenzeka kanjani na?

¹⁰ UJesu wamphendula wathi: Wena ungumfundisi wakoIsrayeli, kawukwazi lokhu na?

¹¹ Ngiqinisile, ngiqinisile ngithi kuwe: Sikhuluma ngesikwaziyo, sifakaze ngesikubonileyo; kodwa kalikwamukeli ukufakaza kwethu.

¹² Nxa ngilitshelile ngezinto zomhlaba, lingakholwa; lingakholwa kanjani, uba ngilitshela ngezinto zezulwini na?

¹³ Kakho owenyukela ezulwini, kuphela yena owehla ezulwini, iNdodana yomuntu ehlala ezulwini.

¹⁴ Njengokuba uMose waphakamisa inyoka enkangala, kunjaloke iNdodana yomuntu imele ukuphakanyiswa,

¹⁵ ukuba ilowo lalowo okholwa kiyo abe lokuphila okungapheliyo.

¹⁶ Ngoba uNkulunkulu wawuthanda umhlaba kangaka, waze wanikela ngeNdodana yakhe ezelwe yodwa ukuba ilowo lalowo okholwa kiyo angabhubhi, kodwa abe lokuphila okungapheliyo.

¹⁷ Ngoba uNkulunkulu kayithumelanga iNdodana emhlabeni ukuba iwulahle umhlaba, kodwa ukuba umhlaba usiliswe ngayo.

¹⁸ Okholwa kiyo kalahlwa; kodwa ongakholwayo uselahliwe, ngoba engakholwanga ebizweni leNdodana kaNkulunkulu ezelwe yodwa.

¹⁹ Ukulahlwa kuyilokhu ukuthi ukukhanya kufikile emhlabeni, kodwa abantu bathanda umnyama kulokukhanya, ngoba imisebenzi yabo imibi.

²⁰ Ngoba ilowo lalowo owenza okubi uzonda ukukhanya, kezi ekukhanyeni ukuba imisebenzi yakhe ingasolwa.

²¹ Kodwa owenza iqiniso uyeza ekukhanyeni, ukuze imisebenzi yakhe ibonakale ukuthi yenziwe kuNkulunkulu.

Ubufakazi bokucina bukaJohane

²² Emva kwalokhu uJesu labafundi bakhe bakhuphukela elizweni laseJudiya; wahlala khona kanye labo, wabhaphathiza.

²³ UJohane laye wayebhaphathiza eEnoni eduze leSalima, ngoba kwakulamanzi amanengi khona; abantu babelokhu besiza, babhaphathizwa.

²⁴ Ngoba uJohane wayengakafakwa entolongweni.

²⁵ Kwaba khona ukuphikisana phakathi kwabafundi bakaJohane lomJuda ngokuhlambulula.

²⁶ Basebesiza kuJohane, bathi kuye: Mfundisi, lowo owawulaye ngaphetsheya kweJordani, owamfakazelayo, khangela, uyabhaphathiza, bayeza kuye bonke.

²⁷ UJohane waphendula wathi: Umuntu angemukele ulutho, engalunikwanga luvela ezulwini.

²⁸ Lina ngokwenu liyangifakazela ukuthi ngathi: Kangisuye uKristu mina, kodwa ngithunyiwe ngaphambi kwakhe.

²⁹ Olomlobokazi ungumyeni, kodwa isinini somyeni esimiyo simuzwa, sithokoza kakhulu ngelizwi lomyeni. Ngakhoke lintokozo yami isiphelele.

³⁰ Umele ukukhula yena, mina nginciphe.

Ovela ezulwini

³¹ Ovela phezulu uphezu kwabo bonke; ovela emhlabeni ungowomhlaba, ukhuluma okomhlaba. Ovela ezulwini uphezu kwabo bonke.

³² Lokho akubonileyo lakuzwileyo ufakaza ngakho; kodwa kakho owamukela ubufakazi bakhe.

³³ Owamukele ubufakazi bakhe ulubekile uphawu lwakhe lokuthi uNkulunkulu uqinisile.

³⁴ Ngoba lowo uNkulunkulu amthumileyo ukhuluma amazwi kaNkulunkulu; ngoba kaniki uMoya ngesilinganiso.

³⁵ UYise uyayithanda iNdodana, unikele izinto zonke esandleni sayo.

³⁶ Yena okholwa eNdodaneni ulokuphila okungapheliyo; kodwa yena ongakholwayo eNdodaneni kayikukubona ukuphila, kodwa ulaka lukaNkulunkulu luhlezi phezu kwakhe.