UJohane 21 - iBhayibhili Elingcwele 1978

UJesu uzibonakalisa kubafundi bakhe ngasolwandle lwase Tiberiyasi

¹ Emva kwalokhu uJesu wazibonakalisa kubafundi bakhe futhi ngasolwandle lwaseTiberiyasi; wazibonakalisa ngalindlela.

² Babendawonye oSimoni Petro, loTomasi othiwa liPhahla loNathanyeli weKana elaseGalili, amadodana kaZebediya, labanye abafundi ababili.

³ USimoni Petro wathi kubo: Ngiyagola inhlanzi. Bathi kuye: Lathi sizahamba lawe. Basebephuma, bangena emkolweni; kodwa kababambanga lutho ngalobobusuku.

⁴ Kwathi emadabukakusa, uJesu wema okhunjini. Kodwa abafundi babengazi ukuthi nguJesu.

⁵ Ngakho uJesu wathi kubo: Bangane, lilakho nje ukudla na? Bamphendula bathi: Atshi.

⁶ Wasesithi kubo: Phosani imbule ngakwesokunene somkolo, lizakuzuza. Basebephosa; ngenxa yobunengi benhlanzi abazibambayo bahluleka ukulidonsa.

⁷ Khona lowomfundi owayethandwa nguJesu wathi kuPetro: YiNkosi. UPetro esezwile ukuthi yiNkosi, wagqoka izigqoko zakhe ngoba wayekhululele umsebenzi, weqela olwandle.

⁸ Kodwa abanye abafundi beza ngomkolo, bedonsa imbule ligcwele inhlanzi, ngoba babengekhatshana lomhlabathi, kodwa kungaba zingalo ezilikhulu.

⁹ Kwathi sebekhuphukele emhlabathini, babona umlilo wamalahle lapho, kulenhlanzi phezu kwawo, lesinkwa.

¹⁰ UJesu wathi kubo: Lethani ezinye inhlanzi elisand’ukuzibamba.

¹¹ USimoni Petro wasengena emkolweni, wahudulela emhlabathini imbule, ligcwele inhlanzi ezinkulu, ikhulu lamatshumi amahlanu lantathu; loba zazinengi kangaka imbule kalidabukanga.

¹² UJesu wathi kubo: Wozani lidle. Kodwa kakho kubafundi owaba lesibindi sokumbuza ukuthi: Ungubani wena na? Ngoba bakwazi ukuthi yiyo iNkosi.

¹³ UJesu weza, wathatha isinkwa, wabanika, lenhlanzi lazo njalo.

¹⁴ Lokhu sekungokwesithathu uJesu ezibonakalisa kubafundi, esevukile kwabafileyo.

Ukukholwa kukaPetro

¹⁵ Sebedlile, uJesu wathi kuSimoni Petro: Simoni, ndodana kaJohane, uyangithanda kulalaba na? Yena wathi: Yebo, Nkosi, uyazi ukuthi ngiyakuthanda. Wathi kuye: Phana amawundlu ami ukudla.

¹⁶ Wathi kuye ngokwesibili: Simoni, ndodana kaJohane, uyangithanda na? Wathi kuye: Yebo, Nkosi, uyazi ukuthi ngiyakuthanda. Wasesithi kuye: Yalusa izimvu zami.

¹⁷ Wathi kuye ngokwesithathu: Simoni, ndodana kaJohane, uyangithanda na? UPetro wadabuka ngoba wathi kuye ngokwesithathu: Uyangithanda na? Ngakho wathi kuye: Nkosi, uyakwazi konke, uyakwazi ukuthi ngiyakuthanda. UJesu wathi: Phana izimvu zami ukudla.

¹⁸ Ngiqinisile, ngiqinisile ngithi kuwe: Usemutsha wawuzigqokisa uhambe lapho uthanda khona; kodwa nxa usumdala, uzakwelula izandla zakho, omunye akugqokise, akuse lapho ongathandi ukuya khona.

¹⁹ Watsho lokhu etshengisa ukufa ayezakudumisa uNkulunkulu ngakho. Esetshilo lokhu wathi: Ngilandela.

²⁰ UPetro ephenduka wabona umfundi uJesu amthandayo elandela, yena futhi owayeyeme esifubeni sakhe ekudleni owathi: Nkosi, ngubani ozakukunikela na?

²¹ Kwathi uPetro embona wathi kuJesu: Nkosi, loke?

²² UJesu wathi kuye: Uba ngithanda ukuba ahlale ngize ngifike, kulani lokho lawe na? Ngilandela wena.

²³ Ngakhoke lelilizwi laphumela kubazalwane ukuthi lowomfundi kayikufa. Kanti uJesu katshongo ukuthi kayikufa, kodwa wathi: Uba ngithanda ukuba ahlale ngize ngifike, kulani lokho lawe na?

Isicino

²⁴ Nguye lowomfundi ofakaza ngalezizinto, lozilobileyo; siyazi ukuthi ubufakazi bakhe buliqiniso.

²⁵ Kodwake zikhona ezinye izinto ezinengi uJesu azenzayo; uba bezilotshiwe zonke ngazinye, ngithi umhlaba wonke ubungezanele incwadi ebezingalotshwa.