UJohane 20 - iBhayibhili Elingcwele 1978

Ukuvuka kukaJesu

¹ Kwathi ngosuku lokuqala lweviki uMariya Magadalena wafika elibeni ekuseni kusesemnyama, wabona ilitshe lisusiwe elibeni.

² Ngakho wagijima waya kuSimoni Petro lakulowomfundi omunye owayethandwa nguJesu, wathi kibo: Bayisusile iNkosi elibeni, kasazi lapho bayibeke khona.

³ Ngakho uPetro wasephuma lomunye umfundi, baya elibeni.

⁴ Bagijima bobabili kanyekanye; kodwa lomunye umfundi wagijima kakhulu wamtshiya uPetro, wafika kuqala elibeni.

⁵ Elunguza wabona amalembu ekhona, kodwa kangenanga.

⁶ USimoni Petro laye wafika emlandela, wangena elibeni, wabona amalembu ekhona,

⁷ lelembu elalisekhanda lakhe lingekho emalenjini amanye, kodwa libekwe lodwa.

⁸ Wasengena laye umfundi omunye owayefike kuqala elibeni, wabona, wakholwa;

⁹ ngoba babengakaqedisisi umbhalo othi ubefanele ukuvuka kwabafileyo.

¹⁰ Basebesuka abafundi, babuyela ekhaya.

Ukuzibonakalisa kukaJesu

¹¹ Kodwa uMariya wema elibeni phandle ekhala; esakhala walunguza elibeni.

¹² Wabona izithunywa ezimbili zambethe okumhlophe, zihlezi lapho isidumbu sikaJesu besilele khona, esinye singekhanda lesinye singenyaweni.

¹³ Zona zathi kuye: Mama, ukhalelani na? Wathi kuzo: Bayithethe iNkosi yami, kangazi lapho bayibeke khona.

¹⁴ Esetshilo lokhu waphenduka, wabona uJesu emi, kodwa wayengamazi ukuthi nguJesu.

¹⁵ UJesu wathi kuye: Mama, ukhalelani na? Ufuna ubani na? Kodwa yena esithi ngumphathi wensimu wathi kuye: Nkosi, uba esuswe nguwe, ngitshele lapho umbeke khona, ngizakumthatha.

¹⁶ UJesu wathi kuye: Mariya! Yena waphendula wathi kuye ngesiHeberu: Raboni! okuyikuthi: Mfundisi.

¹⁷ UJesu wathi kuye: Ungangibambi, ngoba angikenyukeli kuBaba. Kodwa yana kubafowethu, uthi kibo ngiyenyukela kuBaba lakuYihlo, kuNkulunkulu wami loNkulunkulu wenu.

¹⁸ UMariya Magadalena wasuka wababikela abafundi wathi: Ngiyibonile iNkosi. Njalo wabatshela amazwi ayo.

¹⁹ Kwathi kusihlwa ngalolosuku, usuku lokuqala lweviki, iminyango ivaliwe lapho abafundi babekhona ngenxa yokwesaba abaJuda, uJesu wafika wema phakathi kwabo, wathi kibo: Ukuthula akube kini.

²⁰ Esetshilo lokhu wabatshengisa izandla zakhe lohlangothi lwakhe. Ngakhoke bathokoza abafundi beyibona iNkosi.

²¹ UJesu wabuya wathi kibo: Ukuthula akube kini. Njengokuba uBaba engithumile mina, lami ngiyalithuma lina.

²² Kwathi esetshilo lokhu waphephetha phezu kwabo wathi kibo: Yamukelani uMoya oNgcwele.

²³ Labo elibathethelela izono zabo zithethelelwe; lezono zalabo elizibambayo zibanjiwe.

²⁴ Kodwa uTomasi, othiwa liPhahla omunye wabalitshumi lambili, wayengekho kibo mhla uJesu efika.

²⁵ Ngakhoke abanye abafundi bathi kuye: Siyibonile iNkosi. Kodwa yena wathi kibo: Uba ngingaboni ezandleni zakhe amanxeba ezipikili, ngifake umunwe wami enxebeni lezipikili, ngibeke izandla zami ohlangothini lwakhe, kangiyikukholwa.

²⁶ Emva kwensuku ezificaminwembili abafundi bakhe babesendlini futhi, loTomasi elabo. UJesu wafika iminyango ivaliwe, wema phakathi kwabo, wathi: Ukuthula akube kini.

²⁷ Wasesithi kuTomasi: Beka umunwe wakho lapha, ubone izandla zami; yelula isandla sakho, usifake ohlangothini lwami; ungabi ngongakholwayo kodwa okholwayo.

²⁸ UTomasi wamphendula wathi: Nkosi yami, Nkulunkulu wami!

²⁹ UJesu wathi kuye: Usukholiwe ngoba usungibonile na? Babusisiwe labo abakholwa bengabonanga.

Umsebenzi wevangeli leli

³⁰ UJesu wazenza ezinye izibonakaliso ezinengi phambi kwabafundi bakhe, ezingalotshwanga kulolugwalo.

³¹ Kodwa lezi zilotshelwe ukuba likholwe ukuthi uJesu unguKristu iNdodana kaNkulunkulu, lokuba lithi likholwe, libe lokuphila ebizweni lakhe.