UJohane 2 - iBhayibhili Elingcwele 1978

Isimangaliso sokuqala sikaJesu

¹ Kwathi ngosuku lwesithathu kwaba khona umthimba eKana elaseGalili; wayekhona unina kaJesu lapho.

² LoJesu labafundi bakhe babemenyiwe emthimbeni.

³ Kwathi ukuba liphele iwayini, unina kaJesu wathi kuye: Kabaselalo iwayini.

⁴ UJesu wathi kuye: Mama, kuqondene ngaphi lawe lokhu na? Isikhathi sami kasikafiki.

⁵ Unina wathi kubafokazi: Alibokwenza loba yikuphi azakulitshela khona.

⁶ Kwakukhona lapho imbiza zamatshe zimi khona ngokwesiko lokuhlambulula labaJuda, inye ilamagokoko amahlanu ingabe layisikhombisa.

⁷ UJesu wathi kibo: Gcwalisani imbiza ngamanzi. Bazigcwalisake zathi kliki.

⁸ Wasesithi kibo: Khaninike, lise kumphathi wokudla; besake.

⁹ Umphathi wokudla esizwa amanzi asephendulwe iwayini, engazi ukuthi livela ngaphi, lanxa abafokazi ababewakhile amanzi babesazi, umphathi wokudla wabiza umyeni,

¹⁰ wathi kuye: Wonke umuntu uletha iwayini elimnandi kuqala, kuthi lapho sebenathile kakhulu, alethe elibi; wena ugcinile iwayini elimnandi kwaze kwaba khathesi.

¹¹ Lokho ukuqala kwezibonakaliso uJesu wakwenza eKana elaseGalili ebonakalisa ubukhosi bakhe, okwenza abafundi bakhe bakholwa kuye.

Abathengisi ethempelini

¹² Emva kwalokho waya eKapenawume, elonina, labafowabo, labafundi bakhe, bahlala khona insukwana.

¹³ IPhasika labaJuda lalisondele; uJesu wenyukela eJerusalema.

¹⁴ Wafumana ethempelini labo abathengisa inkomo lezimvu lenkwilimba, labahleziyo bentshintshisa imali.

¹⁵ Wasesenza umchilo wentambo, wabaxotsha bonke ethempelini, lezimvu lenkomo, wachitha imali yabantshintshisayo wagenqula amatafula abo,

¹⁶ wathi kwabathengisa inkwilimba: Susani lezizinto, lingayenzi indlu kaBaba ibe yindlu yokuthengisela.

¹⁷ Abafundi bakhe bakhumbula ukuba kulotshiwe ukuthi: Ukutshisekela indlu yakho kuyangidla.

¹⁸ Ngakho abaJuda bathi kuye: Usitshengisa isibonakaliso bani sokwenza lezizinto na?

¹⁹ UJesu waphendula wathi kibo: Dilizani lelithempeli, ngizakulivusa ngensuku ezintathu.

²⁰ AbaJuda basebesithi: Lelithempeli lathatha iminyaka engamatshumi amane lesithupha ukwakhiwa, wenake uzakulivusa ngensuku ezintathu na?

²¹ Kodwa wayekhuluma ngethempeli lomzimba wakhe.

²² Kwathi esevukile kwabafileyo, abafundi bakhe bakhumbula ukuthi watsho njalo kibo; bakholwa umbhalo lelizwi ayelitshilo uJesu.

²³ Kwathi eseJerusalema emkhosini wePhasika, abanengi bebona izibonakaliso zakhe azenzayo, bakholwa ebizweni lakhe;

²⁴ kodwa uJesu kaneliswanga yikukholwa kwabo,

²⁵ ngoba wayebazi abantu bonke, langoba engadingi lobani ukuba amfakazele ngomuntu; wayekwazi yena okusemuntwini.