UJohane 18 - iBhayibhili Elingcwele 1978

Ukubotshwa kukaJesu

¹ UJesu esekhulumile lamazwi waphuma kanye labafundi bakhe, waya ngaphetsheya kwesifudlana iKidroni, lapho kwakukhona insimu angena kuyo yena labafundi bakhe.

² LoJudasi owamnikelayo laye wayeyazi indawo, ngoba uJesu wayejwayele ukuya khona labafundi bakhe.

³ Ngakho uJudasi wathatha isigaba samabutho lamanye amanxusa avela kubapristi abakhulu labaFarisi, waya khona, belezibane lezikhali.

⁴ Kwathi uJesu ekwazi konke okwakuzamehlela waphuma, wathi kubo: Lifuna ubani na?

⁵ Bamphendula bathi: UJesu waseNazaretha. UJesu wathi kubo: Nginguye. UJudasi owamnikelayo wayemi labo.

⁶ Kuthe ukuba athi kubo: Nginguye; bahlehla nyovane, bawela phansi.

⁷ Waphinda wababuza wathi: Lifuna ubani na? Bathi: UJesu waseNazaretha.

⁸ UJesu wathi: Ngilitshelile ukuba mina nginguye; ngakhoke uba lifuna mina, yekelani lababantu bahambe.

⁹ Lokhu wakwenza ukuze ligcwaliseke ilizwi ayelikhulumile elokuthi: Kulabo owanginika bona kakulahlekanga lamunye wabo.

¹⁰ USimoni Petro elomhedla wawuhwatsha, wageca inceku yompristi omkhulu, waquma indlebe yayo yokunene. Ibizo lenceku lalinguMalikusi.

¹¹ UJesu wathi kuPetro: Buyisela umhedla wakho esikhwameni sawo. Kanti kangiyikunatha inkezo uBaba anginike yona na?

¹² Ngakho isigaba samabutho lenduna yaso lamanxusa abaJuda bambamba uJesu, bambopha;

¹³ bamusa kuqala kuAnasi, ngoba wayenguyisezala kaKayafasi owayengumpristi omkhulu ngalowomnyaka.

¹⁴ Kwakunguye uKayafasi owayecebise abaJuda ukuthi kulungile ukuba umuntu oyedwa afe ngenxa yesizwe.

UPetro ulandula uJesu. Ukuthethwa kwecala likaJesu

¹⁵ USimoni Petro wamlandela uJesu lomunye umfundi. Lowomfundi wayesaziwa ngumpristi omkhulu, wangena loJesu egumeni lompristi omkhulu;

¹⁶ kodwa uPetro wayemi ngaphandle emnyango. Waphuma lowomfundi omunye owayesaziwa ngumpristi omkhulu, wakhuluma lentombazana eyayilinde umnyango, wamngenisa uPetro.

¹⁷ Intombazana elinda umnyango yathi kuPetro: Imbala lawe ungomunye wabafundi balumuntu na? Yena wathi: Kangisuye.

¹⁸ Izinceku lamanxusa babebasile umlilo wamalahle, ngoba kwakumakhaza, babemi besotha; loPetro laye wayemi labo esotha.

¹⁹ Umpristi omkhulu wasembuza uJesu ngabafundi bakhe langemfundiso yakhe.

²⁰ UJesu wamphendula wathi: Ngikhulume obala emhlabeni. Ngezikhathi zonke bengifundisa emasinagogeni lasethempelini, lapho abaJuda bonke babuthana khona, kangikhulumanga lutho ensitha.

²¹ Ubuzelani kimi na? Buza labo abakuzwayo lokho engakukhuluma kibo; khangela, bayakwazi bona engakutshoyo.

²² Esetshilo lokhu, omunye wamanxusa owayemi khona wamwakala esithi: Uphendula umpristi omkhulu kanjalo na?

²³ UJesu wamphendula wathi: Uba ngikhulume kubi, fakaza ngalobobubi; kodwa uba ngikhulume kuhle, ungitshayelani na?

²⁴ UAnasi wamthumela ebotshiwe kuKayafasi umpristi omkhulu.

²⁵ Kodwa uSimoni Petro wayemi esotha. Abanye bathi kuye: Imbala wena kawusuye omunye wabafundi bakhe na? Walandula yena, wathi: Kangisuye.

²⁶ Omunye wezinceku zompristi omkhulu, oyisinini salowomuntu uPetro aquma indlebe yakhe, wabuya wathi: Kangikubonanga yini ensimini ulaye na?

²⁷ UPetro wabuya walandula; lakhala masinyane iqhude.

UJesu uphambi kukaPilatu

²⁸ Basebemkhupha uJesu kuKayafasi, bamusa endlini yombusi; kwakusekuseni. Kodwa kabangenanga bona endlini yombusi ukuze bangangcoli, kodwa babe lokudla iPhasika.

²⁹ Ngakho uPilatu waphumela kubo wathi: Limmangalela ngani lumuntu na?

³⁰ Bona bamphendula bathi: Uba lumuntu ubengesuye owenza okubi, ngakasimlethanga kuwe.

³¹ UPilatu wasesithi kubo: Mthatheni lina, limthonisise ngomlayo wakini. AbaJuda bathi kuye: Kasivunyelwa ukubulala umuntu.

³² Lokhu kwenziwa ukuba kugcwaliseke ilizwi uJesu alikhulumayo ukutshengisa ukufa ayezakufa ngakho.

³³ Ngakho uPilatu wabuye wangena endlini yombusi, wambiza uJesu, wathi kuye: Wena uyiNkosi yabaJuda na?

³⁴ UJesu wamphendula wathi: Uyazitsholo lokhu wena, kumbe kutshiwo ngabanye kuwe ngami na?

³⁵ UPilatu waphendula wathi: Kanti ngingumJuda mina na? Isizwe sakini labapristi abakhulu bakunikele kimi; wenzeni wena na?

³⁶ UJesu waphendula wathi: Umbuso wami kawusiwo walumhlaba. Uba umbuso wami ubungowalumhlaba, izinceku zami bezizakulwa ukuba nginganikelwa kubaJuda. Kodwa umbuso wami kawusiwo owomhlaba.

³⁷ Ngakho uPilatu wathi kuye: Kanti uyinkosi na? UJesu waphendula wathi: Kutsho wena ukuthi ngiyinkosi; ngazalelwa lokho, ngizele lokho emhlabeni ukufakazela iqiniso. Bonke abeqiniso bayalizwa ilizwi lami. UPilatu wathi kuye: Iqiniso liyini na?

³⁸ Esetshilo lokhu wabuya waphumela kubaJuda wathi kubo: Kangifumani cala kuye.

³⁹ Kodwa lilomkhuba wokuba ngilikhululele omunye ngePhasika; liyathanda ukuba ngilikhululele iNkosi yabaJuda na?

⁴⁰ Basebememeza futhi bathi: Atshi lumuntu, kodwa uBarabasi. Kodwa uBarabasi wayengumphangi.