UJohane 17 - iBhayibhili Elingcwele 1978

Umkhuleko kaJesu

¹ UJesu wakhuluma lamazwi; waphakamisela amehlo akhe ezulwini, wathi: Baba, isikhathi sesifikile; dumisa iNdodana yakho, ukuze iNdodana ikudumise wena.

² Ngoba uyinikile amandla phezu kwabantu bonke ukuze ibanike ukuphila okungapheliyo bonke oyinike bona.

³ Ukuphila okungapheliyo yilokhu ukuba bakwazi wena Nkulunkulu wedwa ongoweqiniso, loJesu Kristu omthumileyo.

⁴ Ngikudumisile emhlabeni, ngiwuqedile umsebenzi obunginike wona ukuba ngiwenze.

⁵ Khathesike akungidumise, wena Baba, ngaphambi kwakho ngobukhosi engangilabo kanye lawe, ungakenziwa umhlaba.

⁶ Ngilibonakalisile ibizo lakho ebantwini onginike bona emhlabeni; babengabakho, wanginika bona; baligcinile ilizwi lakho.

⁷ Sebesazi ukuthi konke onginike khona kuvela kuwe.

⁸ Ngoba amazwi onginike wona ngibanikile wona, bawamukela, bayazi isibili ukuthi ngivela kuwe, bakholiwe ukuthi ungithumile wena.

⁹ Ngiyabakhulekela bona; kangikhulekeli umhlaba kodwa labo onginike bona, ngoba bangabakho.

¹⁰ Konke okwami kungokwakho lokwakho kungokwami; ngidunyisiwe kibo.

¹¹ Kangisekho emhlabeni mina, basemhlabeni bona, mina ngiyeza kuwe. Baba oNgcwele, balondoloze ebizweni lakho labo onginike bona, ukuze babe munye njengathi simunye.

¹² Lapho ngiselabo ngabalondoloza ebizweni lakho, labo onginike bona, ngibalindile; kakho kibo olahlekileyo, kuphela indodana yokulahlwa, ukuba kugcwaliseke umbhalo.

¹³ Sengisiza kuwe khathesi; lezizinto ngizikhuluma emhlabeni ukuba babe lokuthokoza kwami, kugcwale kibo.

¹⁴ Ngibanikile ilizwi lakho; umhlaba ubazondile, ngoba bengesibo abomhlaba, njengokuba lami ngingesuye owomhlaba.

¹⁵ Kangiceli ukuba ubasuse emhlabeni, kodwa ukuba ubalondoloze komubi.

¹⁶ Kabasibo abomhlaba, njengalokhu lami ngingesuye owomhlaba.

¹⁷ Bahlukanise ngeqiniso, ilizwi lakho liliqiniso.

¹⁸ Njengalokhu wangithumela emhlabeni, lami ngibathumela emhlabeni.

¹⁹ Ngenxa yabo ngiyazahlukanisela ukuze labo bahlukaniselwe ngeqiniso.

²⁰ Kangiceleli laba bodwa kodwa lalabo abazakholwa kimi ngelizwi labo,

²¹ ukuba bonke babe munye, njengalokhu wena Baba ukimi, lami ngikuwe, ukuba labo babe kithi, ukuze umhlaba ukholwe ukuthi ungithumile wena.

²² Inkazimulo onginike yona ngibanikile bona, ukuze babe munye njengathi simunye.

²³ Mina ngikibo, lawe ukimi, ukuze bapheleliswe babe munye, ukuba umhlaba wazi ukuthi nguwe ongithumileyo, lokuthi ubathandile bona, njengalokhu ungithandile mina.

²⁴ Baba, ngithanda ukuba labo onginike bona labo babe kanye lami lapho ngikhona, ukuze babone inkazimulo yami onginike yona; ngoba wangithanda kungakadatshulwa umhlaba.

²⁵ Baba olungileyo, umhlaba kawukwazanga, kodwa mina ngikwazile, lalaba bayazi ukuba ungithumile wena.

²⁶ Ngibazisile ibizo lakho, njalo ngizakubazisa lona ukuba uthando ongithande ngalo lube kibo, lami ngibe kibo.