UJohane 16 - iBhayibhili Elingcwele 1978

Isicino senkulumo kaJesu. Ukuhlupheka okuzayo

¹ Ngilitshela konke lokhu ukuba lingakhubeki.

² Bazakulikhupha emasinagogeni, yebo, isikhathi siyeza lapho olibulalayo ezakuthi ukhonza uNkulunkulu.

³ Bazakwenza lokhu ngoba bengamazanga uBaba lami;

⁴ kodwa ngikhulume lezizinto kini, ukuze lapho sesifikile lesosikhathi likhumbule ukuthi ngalitshela ngazo; kangilitshelanga lezizinto ekuqaleni, ngoba bengilani.

⁵ Kodwa khathesi ngiyahamba, ngiya kongithumileyo; kanti kakho kini ongibuza ukuthi: Uya ngaphi na?

⁶ Ngoba ngikhulume lezizinto kini, inhliziyo zenu zigcwele usizi.

⁷ Kodwa ngilitshela iqiniso lokuthi kulilungele ukuba ngihambe; ngoba nxa ngingahambi, uMsizi kayikuza kini; kodwa uba ngihamba, ngizakumthumela kini.

⁸ Nxa esefikile yena, uzakuqondisa umhlaba ngesono, langokulunga, langokulahlwa;

⁹ ngesono ngoba kabakholwa kimi;

¹⁰ ngokulunga, ngoba ngiya kuBaba, kalisayikungibona futhi;

¹¹ ngokulahlwa, ngoba umbusi walumhlaba uselahliwe.

¹² Ngiselezinto ezinengi zokulitshela, kodwa lingezithwale khathesi.

¹³ Nxa uMoya weqiniso esefikile, yena uzakuliholela eqinisweni lonke; ngoba kayikuzikhulumela ngokwakhe, kodwa lokho akuzwayo uzakukukhuluma, alibikele izinto ezizayo.

¹⁴ Uzakungidumisa, ngoba uzakuthatha okungokwami alibikele khona.

¹⁵ Konke uBaba alakho kungokwami; yikhoke ngisithi uzakuthatha okungokwami, alibikele khona.

Ukuvalelisa kukaJesu

¹⁶ Emva kwesikhatshana kalisayikungibona, kubuye kube yisikhatshana lingibone.

¹⁷ Ngakho abanye kubafundi bakhe bakhulumisana besithi: Kutshoni kambe ukuthi: Emva kwesikhatshana kalisayikungibona, kubuye kube yisikhatshana lingibone; lokuthi: Ngoba ngiya kuBaba?

¹⁸ Basebesithi: Kuyini futhi lokhu akutshoyo ukuthi: Emva kwesikhatshana? Kasazi ukuba utshoni.

¹⁹ UJesu wayesazi ukuthi babethanda ukumbuza. Wathi kibo: Liyabuzana ngalokho engikutshiloyo kokuthi: Emva kwesikhatshana kalisayikungibona, kubuye kube yisikhatshana lingibone, na?

²⁰ Ngiqinisile, ngiqinisile ngithi kini: Lizakukhala lilile, kodwa umhlaba uzakuthokoza; lizakuba losizi lina, kodwa usizi lwenu luzakuphenduka intokozo.

²¹ Nxa owesifazana esabeletha, ulobuhlungu, ngoba isikhathi sakhe sesifikile; kodwa nxa esebelethe umntwana, angabe esakhumbula ubuhlungu ngenxa yentokozo yokuba kuzelwe umuntu emhlabeni.

²² Lanike lilosizi khathesi, kodwa ngizakubuya ngilibone, inhliziyo zenu zithokoze; kakho ongalamuka intokozo yenu.

²³ Ngalolosuku kaliyikungibuza lutho. Ngiqinisile, ngiqinisile ngithi kini: Lokho elikucela kuBaba uzakulinika khona ngebizo lami.

²⁴ Kuze kube khathesi kalicelanga lutho ngebizo lami. Celani, lizakwamukeliswa ukuba intokozo yenu igcwale.

²⁵ Ngikhulume izinto lezi kini ngemifanekiso; kodwa isikhathi siyeza, lapho ngingasayikukhuluma kini ngemifanekiso; kodwa ngizakulitshela ngoBaba ngokusobala.

²⁶ Ngalolosuku lizakucela ebizweni lami; kangitsho kini ukuthi ngizakulicelela mina kuBaba;

²⁷ ngoba uBaba uqobo uyalithanda, ngoba lingithandile mina, likholiwe ukuba ngivele kuBaba.

²⁸ Ngivele kuBaba, ngeza emhlabeni; ngiyasuka emhlabeni khathesi, ngiya kuBaba.

²⁹ Abafundi bakhe bathi: Khathesi, usukhuluma ngokusobala, kawusakhulumi ngemifanekiso.

³⁰ Khathesi siyazi ukuthi uyazi izinto zonke, kawudingi ukuba umuntu akubuze; ngalokhu siyakholwa ukuba uvele kuNkulunkulu.

³¹ UJesu wabaphendula wathi: Selikholwa khathesi na?

³² Khangelani, isikhathi siyeza, yebo, sesifikile sokuba lihlakazeke, ilowo lalowo aye kibo, lingitshiye ngingedwa; kanti kangingedwa, ngoba uBaba ulami.

³³ Ngikhulume lokhu kini ukuba libe lokuthula kimi. Emhlabeni lizakuba losizi, kodwa manini isibindi, mina ngiwunqobile umhlaba.