UJohane 15 - iBhayibhili Elingcwele 1978

Ivini lezingatsha

¹ Mina ngilivini eliqotho, uBaba ungumlimi.

² Lolo lalologatsha olukimi, olungatheliyo izithelo, uyalususa. Lolo lalologatsha oluthela izithelo uyaluthena ukuze luthele kakhulu.

³ Selihlambululekile lina ngelizwi engilikhulume kini.

⁴ Hlalani kimi, lami ngihlale kini. Njengalokhu ugatsha lungethele izithelo ngokwalo, uba lungahlali evinini, kunjalo lani, uba lingahlali kimi.

⁵ Mina ngilivini, lina lizingatsha; lowo ohlala kimi, lami ngihlale kuye, yena uyathela izithelo ezinengi; ngoba ngaphandle kwami lingenze lutho.

⁶ Uba umuntu engahlali kimi, ulahlwa njengogatsha olubunileyo; bazibuthe, baziphose emlilweni, zitshe.

⁷ Uba lihlala kimi, lamazwi ami ehlala kini, celani elikuthandayo, lizakukwenzelwa.

⁸ UBaba uyadunyiswa ngalokhu ukuba lithele izithelo ezinengi, ukuze libe ngabafundi bami.

⁹ Njengalokhu uBaba engithandile, lami ngilithandile; hlalani othandweni lwami.

¹⁰ Uba ligcina imilayo yami, lizakuhlala othandweni lwami, njengalokhu lami ngigcine imilayo kaBaba ngihlala othandweni lwakhe.

¹¹ Lezizinto ngizikhulume kini, ukuze ukuthokoza kwami kube kini lokuze ukuthokoza kwenu kugcwale.

Umlayo wokuthandana

¹² Lo ngumlayo wami ukuba lithandane, njengalokhu ngilithandile mina.

¹³ Kakho olothando olukhulu kulalolu lokuthi umuntu adele ukusila kwakhe ngenxa yabangane bakhe.

¹⁴ Lina lingabangane bami, uba lisenza lokhu engililaya khona.

¹⁵ Kangisalibizi ngokuthi liyizinceku, ngoba inceku kayikwazi ukuthi inkosi yayo yenzani; kodwa sengilibiza ngokuthi lingabangane, ngoba konke engikuzwileyo kuBaba ngilazise khona.

¹⁶ Kalingikhethanga lina, kodwa yimi engilikhethileyo, ngilimisele ukuba lihambe, lithele izithelo, lezithelo zenu zihlale njalo, ukuba loba yini eliyicela kuBaba ngebizo lami alinike yona.

¹⁷ Ngililaya ngalokhu ukuze lithandane.

Inzondo yomhlaba

¹⁸ Uba umhlaba ulizonda, yazini ukuthi wangizonda mina ngaphambi kwenu.

¹⁹ Uba belingabomhlaba, umhlaba ubuzakuthanda abawo, kodwa ngoba lingesibo abomhlaba kodwa ngalikhetha mina emhlabeni, ngakho umhlaba uyalizonda.

²⁰ Khumbulani ilizwi engalitsho kini elokuthi: Inceku kayinkulu kulenkosi yayo. Uba bengizingele mina, bazakulizingela lani; uba belondoloza ilizwi lami, bazakulondoloza ilizwi lenu.

²¹ Kodwa bazakukwenza konke lokhu ngenxa yebizo lami, ngoba bengamazi ongithumileyo.

²² Uba bengingafikanga, ngakhuluma labo, ngabe kabalasono; kodwa khathesi kabalazaba ngesono sabo.

²³ Ongizondayo uzonda loBaba.

²⁴ Uba bengingenzanga phakathi kwabo imisebenzi engenziwanga ngomunye, ngabe kabalasono, kodwa khathesi babonile, bangizondile mina loBaba.

²⁵ Kodwa kunjalo ukuba ligcwaliseke ilizwi elilotshiweyo emlayweni wabo elokuthi: Bangizonda ngeze.

²⁶ Kodwa nxa esefikile uMsizi engizakumthumela kini evela kuBaba, uMoya weqiniso, ophuma kuBaba, uzakungifakazela.

²⁷ Lani lingofakazi bami, ngoba belilami kusukela ekuqaleni.