UJohane 14 - iBhayibhili Elingcwele 1978

Inkulumo yokuvalelisa kukaJesu

¹ Inhliziyo zenu kazingakhathazeki. Kholwani kuNkulunkulu, likholwe lakimi.

² Ekhaya likaBaba kukhona izindlu ezinengi; uba kwakungenjalo, ngabe ngalitshela ukuthi ngiya ukulilungisela indawo na?

³ Nxa ngihamba ukuyalilungisela indawo, ngizakubuya futhi, ngilamukele ukuze kuthi lapho ngikhona libe khona lani.

⁴ Lalapho ngiya khona liyayazi indlela.

⁵ UTomasi wathi kuye: Nkosi, kasikwazi lapho uya khona; siyazi kanjani indlela na?

⁶ UJesu wathi kuye: Yimi indlela, leqiniso lokuphila; kakho oza kuBaba engezi ngami.

⁷ Uba belingazile, belizakumazi loBaba; kusukela khathesi liyamazi, ngoba selimbonile.

⁸ UFiliphu wathi kuye: Nkosi, sitshengise uBaba, kusanele.

⁹ UJesu wathi kuye: Sengilani isikhathi eside kangaka, kodwa kawukangazi Filiphu? Yena obone mina ubone uBaba; ungatsho kanjani ukuthi: Sitshengise uBaba?

¹⁰ Kawukholwa ukuba ngikuBaba, loBaba ukimi na? Amazwi engiwakhuluma kini kangizikhulumeli ngokwami; kodwa uBaba ohlezi kimi wenza umsebenzi wakhe.

¹¹ Kholwani kimi ukuthi ngikuBaba, loBaba ukimi; uba kungenjalo, kholwani ngenxa yemisebenzi ngokwayo.

¹² Ngiqinisile, ngiqinisile ngithi kini: Okholwa kimi, imisebenzi engiyenzayo uzakuyenza laye, lemikhulu kulale uzakuyenza; ngoba ngiya kuBaba.

¹³ Loba yini elikucelayo ngebizo lami ngizakukwenza ukuze uBaba adunyiswe eNdodaneni.

¹⁴ Uba licela ulutho ebizweni lami, ngizakulwenza.

UMoya uyathenjiswa

¹⁵ Uba lingithanda, lizakugcina imilayo yami.

¹⁶ Ngizakucela uBaba aliphe omunye uMsizi ukuba ahlale lani kokuphela,

¹⁷ uMoya weqiniso, ongemamukele umhlaba, ngoba ungamboni, ungamazi; kodwa lina liyamazi, ngoba uhlala lami, uzakuba kini.

¹⁸ Kangiyikulitshiya liyizintandane; ngizakuza kini.

¹⁹ Ngesikhatshana umhlaba kawusayikungibona, kodwa lina lizangibona; ngoba ngiyaphila, lani lizakuphila.

²⁰ Ngalolosuku lizakukwazi ukuba ngikuBaba, lani likimi, lami ngikini.

²¹ Olemilayo yami ayigcine, nguye ongithandayo; yena ongithandayo uzakuthandwa nguBaba, lami ngizakumthanda, ngizibonakalise kuye.

²² UJudasi, ongesuye uIskariyothi, wathi kuye: Nkosi, kwenziwa yini ukuthi uzakuzibonakalisa kithi, kodwa ungazibonakalisi kuwo umhlaba?

²³ UJesu wamphendula wathi: Uba umuntu engithanda, uzakulondoloza ilizwi lami; uBaba uzakumthanda yena; sizakuza kuye, sihlale laye.

²⁴ Yena ongangithandiyo kagcini amazwi ami; lelizwi elilizwayo kayisilo elami kodwa ngelikaBaba ongithumileyo.

²⁵ Lezizinto ngizikhulumile kini ngisahlezi lani.

²⁶ Kodwa uMsizi, uMoya oNgcwele, azakumthumela uBaba ebizweni lami, yena uzakulifundisa zonke izinto, alikhumbuze konke engakutshoyo kini.

²⁷ Ukuthula ngikutshiya kini, ukuthula kwami ngilinika khona. Kakunjengokunika komhlaba ukulinika kwami. Inhliziyo zenu kazingakhathazeki, zingesabi.

²⁸ Lingizwile ngisithi kini: Ngiyahamba, lokuthi ngizakubuya kini. Uba belingithanda, belizakuthokoza, ngoba ngiya kuBaba, ngoba uBaba mkhulu kulami.

²⁹ Khathesi ngilitshelile kungakenzeki ukuba lapho sekusenzeka likholwe.

³⁰ Kangisayikukhuluma okunengi lani, ngoba umbusi walumhlaba uyeza. Yena kalamandla phezu kwami,

³¹ kodwa lokhu kwenzelwe ukuba umhlaba wazi ukuthi ngiyamthanda uBaba lokuthi ngenza njengokuba uBaba engilayile. Sukumani sisuke lapha.