UJohane 12 - iBhayibhili Elingcwele 1978

UJesu ugcotshwa eBethani

¹ Kwathi kusasele insuku eziyisithupha lingakafiki iPhasika, uJesu wafika eBethani, lapho wayekhona uLazaro, uJesu amvusa kwabafileyo.

² Basebemenzela ukudla khona; uMatha wayepheka, kodwa uLazaro wayengomunye walabo ababehlezi ekudleni laye.

³ UMariya wasethatha umfuma wamagcobo awenadi lodwa abiza imali enengi, wagcoba inyawo zikaJesu, wesula inyawo zakhe ngenwele zakhe; indlu yagcwala iphunga lamagcobo.

⁴ Kodwa uJudasi Iskariyothi, omunye wabafundi bakhe yena owayezakumnikela, wathi:

⁵ Kungani amafutha la engathengiswanga ngamadola angamatshumi amathathu, kwanikwa abayanga na?

⁶ Wakutsho lokhu kungesikho ukuba ukhathalele abayanga, kodwa ngoba wayelisela, ephatha isikhwama, eseba okwakufakwa phakathi kwaso.

⁷ Ngakho uJesu wathi: Myekeleni ukuba awalondolozele usuku lokumbelwa kwami.

⁸ Ngoba abayanga lihlala lilabo, kodwa mina kalihlali lilami.

⁹ Kwathi ixuku elikhulu labaJuda selizwile ukuthi ulapho leza, kungesikho ngenxa kaJesu kuphela, kodwa lokuba babone uLazaro ayemvusile kwabafileyo.

¹⁰ Ngakho abapristi abakhulu benza icebo lokuba babulale loLazaro,

¹¹ ngoba ngenxa yakhe abaJuda abanengi basuka bakholwa kuJesu.

UJesu ungena eJerusalema

¹² Kusasa ixuku elikhulu elalizile emkhosini wePhasika lezwa kuthiwa uJesu uyeza eJerusalema.

¹³ Ngakho lathatha amahlamvu elala, laphuma ukumhlangabeza, limemeza lisithi: Hosana! Ubusisiwe ozayo ebizweni leNkosi, yebo, iNkosi kaIsrayeli.

¹⁴ UJesu wafumana ithole likababhemi, wakhwela phezu kwalo njengokulotshiweyo ukuthi:

¹⁵ Ungesabi, wena Ziyone; khangela, inkosi yakho iyeza, ikhwele etholeni likababhemi.

¹⁶ Abafundi bakhe kabaqedisisanga lokhu ekuqaleni; kodwa uJesu esedunyisiwe, basebekhumbula ukuthi lokhu kwakulotshiwe ngaye lokuthi babekwenzile lokhu kuye.

¹⁷ Ngakho ixuku elalilaye mhla ebiza uLazaro ukuba aphume elibeni, emvusa kwabafileyo, lafakaza ngakho.

¹⁸ Ngenxa yalokhu ixuku laphuma ukumhlangabeza, ngoba lezwa ukuba usenzile lesisibonakaliso.

¹⁹ Ngakho abaFarisi bakhulumisana besithi: Liyabona ukuthi kalisizi lutho; khangelani, umhlaba wonke uyamlandela.

UJesu ukhuluma ngokufa kwakhe

²⁰ Kwakukhona amaGriki phakathi kwalabo ababekhuphukele ukuba bakhuleke emkhosini.

²¹ Wonake eza kuFiliphu owayengowaseBetsayida elaseGalili, athi kuye: Nkosi, sithanda ukubona uJesu.

²² UFiliphu wasuka wamtshela uAndreya. UAndreya loFiliphu basuka batshela uJesu.

²³ UJesu wathi kibo: Isikhathi sesifikile sokuba iNdodana yomuntu inikwe udumo.

²⁴ Ngiqinisile, ngiqinisile ngithi kini: Uba uhlamvu lwebele luwela emhlabathini lungafi, luhlala lodwa; kodwa aluba lusifa, luyathela izithelo ezinengi.

²⁵ Yena othanda ukusila kwakhe uyalahlekelwa yikho; lozonda ukusila kwakhe kulumhlaba uzakukulondolozela ukuphila okungapheliyo.

²⁶ Uba umuntu engikhonza, kangilandele; lalapho ngikhona, uzakuba khona umfokazi wami. Uba umuntu engikhonza, uBaba uzakumdumisa yena.

²⁷ Khathesi umphefumulo wami ukhathazekile, ngizakuthini na? Baba, ngisilise kulesisikhathi. Atshi, kodwa ngenxa yalokhu ngifikile kulesisikhathi.

²⁸ Baba, dumisa ibizo lakho. Kwasekuzwakala ilizwi livela ezulwini, lisithi: Ngilidumisile, ngizakuphinda ngilidumise futhi.

²⁹ Ngakho ixuku elalimi khona lakuzwa lathi: Liyaduma. Abanye bathi: Isithunywa sasezulwini sikhulume laye.

³⁰ UJesu waphendula wathi: Lelilizwi kalizanga ngenxa yami kodwa ngenxa yenu.

³¹ Khathesi yikwahlulelwa kwalumhlaba; khathesi umbusi walumhlaba uzakuxotshwa.

³² Minake, nxa ngiphakanyiswa emhlabeni, ngizakudonsela bonke abantu kimi.

³³ Watsho lokhu etshengisa ukufa abezakufa ngakho.

³⁴ Ngakho ixuku lamphendula lathi: Sizwile emlayweni ukuthi uKristu uhlala kokuphela; ungatsho kanjani ukuthi iNdodana yomuntu imele ukuphakanyiswa na? Ingubani iNdodana yomuntu na?

³⁵ UJesu wasesithi kibo: Kuseyisikhatshana ukukhanya lilakho. Hambani liselokukhanya, ukuze umnyama ungalahluli. Ohambayo emnyameni kazi ukuthi uya ngaphi.

³⁶ Liselokukhanya kholwani ukukhanya, ukuze libe ngabantwana bokukhanya. UJesu watsho lokhu, wasuka, wabacatshela.

Ukulahlwa kwabaJuda ngokungakholwa kwabo

³⁷ Lanxa wayenze izibonakaliso ezinengi kangaka phambi kwabo, kabakholwanga kuye,

³⁸ ukuze ligcwaliseke ilizwi elakhulunywa nguIsaya elokuthi: Nkosi, ngubani okholwe ukutshumayela kwethu na? Lamandla eNkosi ambulelwa bani na?

³⁹ Ngakho babengekholwe, ngoba uIsaya wabuya wathi:

⁴⁰ Uphumputhekisile amehlo abo, wayenza lukhuni inhliziyo yabo, funa babone ngamehlo abo, baqedisise ngenhliziyo yabo, baphenduke, ngibasilise.

⁴¹ UIsaya watsho lokhu ngoba wabona inkazimulo yakhe, wakhuluma ngaye.

⁴² Loba kunjalo abanengi bababusi bakholwa kuye, kodwa ngokwesaba abaFarisi kabakuvumanga, funa bakhutshwe esinagogeni;

⁴³ ngoba bathanda udumo lwabantu kulodumo lukaNkulunkulu.

UJesu weza ukusilisa umhlaba angawulahli

⁴⁴ UJesu wasememeza esithi: Okholwa kimi kakholwa kimi, kodwa ukholwa kongithumileyo.

⁴⁵ Obona mina ubona ongithumileyo.

⁴⁶ Ngizile ngiyikukhanya emhlabeni ukuba okholwa kimi angahlali emnyameni.

⁴⁷ Uba ekhona owezwayo amazwi ami angawagcini, kangimlahli, ngoba kangizanga ukulahla umhlaba kodwa ukusilisa umhlaba.

⁴⁸ Yena ongalayo engawamukeli amazwi ami, ulaye omlahlayo; ilizwi esengilikhulumile lizakumlahla ngosuku lokucina.

⁴⁹ Ngoba kangizikhulumelanga ngokwami, uBaba ongithumileyo nguye onginike umlayo wokuba ngizakuthini, ngikhulumeni.

⁵⁰ Ngiyazi ukuthi umlayo wakhe uyikuphila okungapheliyo. Ngakho lokhu engikukhulumayo ngikukhuluma njengalokhu uBaba angitshele khona.