UJohane 11 - iBhayibhili Elingcwele 1978

Ukuvuswa kukaLazaro

¹ Kwakukhona umuntu othile owayegula, othiwa nguLazaro owaseBethani emzini kaMariya lodadewabo uMatha.

² Kwakunguye uMariya owagcoba iNkosi ngamagcobo, wesula inyawo zayo ngenwele zakhe, omnewabo uLazaro wayegula.

³ Ngakhoke odadewabo bathumela kuye, besithi: Nkosi, lowo omthandayo uyagula.

⁴ UJesu esekuzwile wathi: Lokhukugula kakusikho okokufa, kodwa kungenxa yodumo lukaNkulunkulu ukuze iNdodana kaNkulunkulu idunyiswe ngakho.

⁵ UJesu wayebathanda oMatha lodadewabo loLazaro.

⁶ Ngakho esezwile ukuthi uyagula, wahlala insuku ezimbili endaweni lapho ayekhona.

⁷ Kwathi emva kwalokhu wathi kubafundi bakhe: Asibuye siye eJudiya.

⁸ Abafundi bathi kuye: Mfundisi, abaJuda basand’ukufuna ukukukhanda ngamatshe, usaya futhi khona na?

⁹ UJesu waphendula wathi: Kawakho ama‐awa alitshumi lambili emini na? Nxa umuntu ehamba emini, kakhubeki, ngoba uyabona ukukhanya kwalumhlaba.

¹⁰ Kodwa uba umuntu ehamba ebusuku, uyakhubeka, ngoba ukukhanya kakukho kuye.

¹¹ Wakhuluma lokhu; wasesithi kibo: Umngane wethu uLazaro uselele, kodwa ngiyahamba ukuba ngimvuse.

¹² Abafundi bakhe basebesithi kuye: Nkosi, uba eselele, uzakusila.

¹³ Kodwa uJesu wayekhuluma ngokufa kwakhe, kodwa bona babesithi ukhuluma ngokulala ubuthongo.

¹⁴ Ngakho uJesu wasebatshela ngokucacileyo, wathi: ULazaro usefile;

¹⁵ ngenxa yenu ngiyathokoza ukuthi bengingekho lapho, ukuze likholwe; kodwa asiye kuye.

¹⁶ UTomasi othiwa liPhahla wathi kwabanye abafundi: Asihambeni lathi, ukuze sife kanye laye.

¹⁷ Kwathi esefika uJesu, wafumana uLazaro eselensuku ezine elibeni.

¹⁸ IBethani yayiseduze leJerusalema, amakhilomitha amathathu.

¹⁹ Abanengi kubaJuda babefikile kuMatha loMariya ukuba babakhalele ngomnewabo.

²⁰ Ngakho uMatha esezwile ukuthi uJesu uyeza, wayakumhlangabeza, kodwa uMariya wahlala endlini.

²¹ UMatha wasesithi kuJesu: Nkosi, aluba ubukhona lapha, umnewethu ngakafanga;

²² lakhathesi ngiyazi ukuthi loba kuyini ongakucela kuNkulunkulu, uNkulunkulu uzakukunika khona.

²³ UJesu wathi kuye: Umnewenu uzakuvuka.

²⁴ UMatha wathi kuye: Ngiyazi ukuthi uzakuvuka ekuvukeni ngosuku lokucina.

²⁵ UJesu wathi kuye: Mina ngiyikuvuka lokuphila; okholwa kimi, loba esefile, uzakuphila.

²⁶ Lalowo ophilayo, ekholwa kimi, kasayikufa lanini. Uyakukholwa lokhu na?

²⁷ Wathi kuye: Yebo Nkosi, ngiyakholwa ukuthi wena unguKristu, iNdodana kaNkulunkulu, obezakuza emhlabeni.

²⁸ Esetshilo lokhu uMatha wasuka waya kudadewabo uMariya, wathi ngensitha: UMfundisi ulapha, uyakubiza.

²⁹ Yena esezwile lokhu wasuka masinyane, waya kuye.

³⁰ UJesu wayengakafiki emzini, kodwa wayesekuleyondawo lapho uMatha amhlangabeza khona.

³¹ AbaJuda ababesendlini laye bemkhalela, bebona uMariya esuka masinyane ephuma, bamlandela, besithi: Uya elibeni ukuba akhale khona.

³² Wathi uMariya esefike lapho uJesu akhona, embona, wawa ngasenyaweni zakhe, esithi: Nkosi, uba ubukhona lapha, umnewethu ngakafanga.

³³ Kwathi embona ekhala, labaJuda abafika laye bekhala, wabubula emoyeni, wakhathazeka;

³⁴ wathi: Limbeke ngaphi na? Bathi kuye: Nkosi, woza ubone.

³⁵ UJesu wakhala inyembezi.

³⁶ Ngakhoke abaJuda bathi: Khangelani ukumthanda kwakhe okungaka.

³⁷ Kodwa abanye babo bathi: Lo owavula amehlo esiphofu ubengekwenze yini ukuba lowomuntu angafi na?

³⁸ Ngakhoke uJesu, ebubula futhi phakathi kwakhe, wafika elibeni. Lalilubhalu, kukhona ilitshe emlonyeni walo.

³⁹ UJesu wathi: Susani ilitshe. UMatha udadewabo wofileyo wathi kuye: Nkosi, usenuka; ngoba uselensuku ezine efile.

⁴⁰ UJesu wathi kuye: Kangitshongo yini kuwe ukuthi: Uba ukholwa, uzakubona inkazimulo kaNkulunkulu na?

⁴¹ Balisusake ilitshe. Khona uJesu waphakamisa amehlo akhe, wathi: Baba, ngiyakubonga ngoba ungizwile.

⁴² Mina bengisazi ukuthi uyangizwa njalo, kodwa ngenxa yexuku elingiphahlileyo ngitshilo lokhu, ukuze bakholwe ukuthi ungithumile wena.

⁴³ Esetshilo lokhu wamemeza ngelizwi elikhulu, wathi: Lazaro, phuma.

⁴⁴ Waphuma ofileyo ebotshiwe izandla lenyawo ngamalembu, lobuso bakhe bugoqelwe ngelembu. UJesu wathi kubo: Mthukululeni, limyekele ahambe.

Umphakathi uquma ukumbulala uJesu

⁴⁵ Khonake abanengi kubaJuda ababeze kuMariya bebona akwenzileyo, bakholwa kuye.

⁴⁶ Kodwa abanye babo baya kubaFarisi, babatshela akwenzileyo uJesu.

⁴⁷ Ngakho abapristi abakhulu labaFarisi babiza umphakathi, bathi: Sizakwenza njani na? Ngoba umuntu lo wenza izibonakaliso ezinengi;

⁴⁸ uba simyekela njalo, bonke bazakukholwa kuye; amaRoma azakuza achithe lindawo lesizwe sakithi.

⁴⁹ Kodwa omunye wabo, uKayafasi, owayengumpristi omkhulu ngalowomnyaka, wathi kubo: Kalazi lutho lina;

⁵⁰ futhi kalinakani ukuthi kulilungele ukuba umuntu oyedwa afele abantu, ukuze isizwe sonke singabhubhi.

⁵¹ Kazitsholongo lokhu ngokwakhe, kodwa engumpristi omkhulu ngalowomnyaka wazisela ukuthi uJesu uzakufela isizwe;

⁵² angafeli isizwe kuphela, kodwa abuthele ndawonye abantwana bakaNkulunkulu abahlakazekileyo, babe munye.

⁵³ Ngakho kusukela kulolosuku benza icebo ukuba bambulale.

⁵⁴ Ngakho uJesu kabesahamba obala phakathi kwabaJuda, kodwa wasuka lapho, waya elizweni eliseduze lenkangala emzini othiwa iEfrayimi; wahlala khona labafundi bakhe.

⁵⁵ Laselisondele iPhasika labaJuda. Abantu abanengi bakhuphukela eJerusalema bevela emaphandleni lingakafiki iPhasika ukuze bazihlambulule.

⁵⁶ Babemfuna uJesu, bebuzana bemi ethempelini, besithi: Lithini na? Kayikuza impela emkhosini na?

⁵⁷ Abapristi abakhulu labaFarisi babekhuphe umlayo wokuthi uba ekhona owaziyo lapho akhona, ababikele ukuze bambambe.