UJohane 10 - iBhayibhili Elingcwele 1978

Umalusi olungileyo

¹ Ngiqinisile, ngiqinisile ngithi kini: Ongangeni ngesango esibayeni sezimvu, kodwa akhwele kwenye indawo, lowo ulisela lomphangi.

² Kodwa ongena ngesango ungumalusi wezimvu.

³ Umlindi wesango uyamvulela; lezimvu ziyalizwa ilizwi lakhe; uyazibiza ezakhe ngamabizo, aziholele phandle.

⁴ Nxa esezikhuphile zonke ezakhe, uhamba phambi kwazo, izimvu zimlandele, ngoba ziyalazi ilizwi lakhe.

⁵ Owemzini kazisoze zimlandele, kodwa zizakumbalekela, ngoba kazilazi ilizwi labemzini.

⁶ UJesu wakhuluma lumfanekiso kibo; kodwa kabaqedisisanga lokho akutshoyo kibo.

⁷ Ngakho uJesu waphinda wathi kibo: Ngiqinisile, ngithi kini: Mina ngilisango lezimvu.

⁸ Bonke abafika phambi kwami bangamasela labaphangi, ngakho izimvu kazibezwanga.

⁹ Mina ngilisango; uba umuntu engena ngami uzakusiliswa, angene aphume, afumane idlelo.

¹⁰ Isela liyeza kuphela ukweba lokubulala lokubhubhisa; mina ngizile ukuba babe lokuphila, kugcwale kuphuphume.

¹¹ Mina ngingumalusi olungileyo. Umalusi olungileyo udela ukuphila kwakhe ngenxa yezimvu.

¹² Oqatshiweyo engesuye umalusi, izimvu zingesizo ezakhe, ebona impisi isiza, utshiya izimvu, abaleke. Impisi izibambe, izichithe.

¹³ Uyabaleka ngoba engoqatshiweyo engazikhathaleli izimvu.

¹⁴ Mina ngingumalusi olungileyo; ngiyazazi ezami, lezami ziyangazi,

¹⁵ njengalokhu uBaba uyangazi, lami ngiyamazi uBaba; ngidela ukuphila kwami ngenxa yezimvu.

¹⁶ Ngilezinye izimvu ezingesizo zalesisibaya; lazo ngifanele ukuziletha; zizakuzwa ilizwi lami, ukuze zibe mhlambi munye lomalusi munye.

¹⁷ Ngenxa yalokhu uBaba uyangithanda, ngoba ngidela ukuphila kwami ukuba ngibuye ngikuthathe.

¹⁸ Kakho ongamuka khona, kodwa ngikudela ngokwami. Ngilamandla okukudela, ngilamandla okubuya ngikuthathe. Lumlayo ngiwamukele kuBaba.

¹⁹ Kwaba khona futhi ukwahlukana phakathi kwabaJuda ngenxa yalamazwi.

²⁰ Abanengi babo bathi: Ulomoya omubi, uyahlanya; limlalelelani na?

²¹ Abanye bathi: Lamazwi kawasiwo awomuntu olomoya omubi; umoya omubi angavula amehlo esiphofu na?

UJesu unguKristu

²² Kwakukhona umkhosi wokuhlanjululwa kwethempeli eJerusalema; kwakusebusika.

²³ UJesu wayehamba ethempelini ethulini likaSolomoni.

²⁴ AbaJuda basebemhanqa, bathi kuye: Koze kube nini usilibazisa na? Uba unguKristu, sitshele ngokucacileyo.

²⁵ UJesu wabaphendula wathi: Ngalitshela, kodwa kalikholwanga; imisebenzi engiyenza ebizweni likaBaba yiyo engifakazelayo.

²⁶ Kodwa lina kalikholwa, ngoba kalisibo abezimvu zami.

²⁷ Izimvu zami ziyalizwa elami ilizwi; lami ngiyazazi, ziyangilandela;

²⁸ ngizinika ukuphila okungapheliyo, kazisoze zabhubha kokuphela; kakho ongazihluthuna esandleni sami.

²⁹ UBaba ozinike mina mkhulu kulabo bonke; kakho ongazihluthuna esandleni sikaBaba.

³⁰ Mina loBaba simunye.

³¹ AbaJuda basebephinda bethatha amatshe ukuba bamkhande.

³² UJesu wathi: Ngilitshengise imisebenzi eminengi emihle evela kuBaba; yiwuphi umsebenzi kiyo elingikhandela wona na?

³³ AbaJuda bamphendula bathi: Kasikukhandi ngenxa yomsebenzi omuhle kodwa ngenxa yenhlamba, ngoba wena ungumuntu, uzenza uNkulunkulu.

³⁴ UJesu wabaphendula wathi: Kakulotshiwe yini emlayweni wenu ukuthi: Ngithe: Lingonkulunkulu na?

³⁵ Uba wababiza ngokuthi bangonkulunkulu bona eleza kibo ilizwi likaNkulunkulu — umbhalo ungephulwe —

³⁶ lithi kuye uBaba amahlukanisileyo, wamthumela emhlabeni, uyahlambaza, ngoba ngithe: NgiyiNdodana kaNkulunkulu na?

³⁷ Uba ngingenzi imisebenzi kaBaba, kalingakholwa kimi.

³⁸ Kodwa uba ngiyenza, lanxa lingakholwa kimi, kholwani imisebenzi, ukuze lazi, liqedisise ukuthi uBaba ukimi, lami ngikuBaba.

³⁹ Ngakho bafuna ukumbamba, kodwa waphunyuka ezandleni zabo.

⁴⁰ Wabuya wawelela ngaphetsheya kweJordani kuleyondawo lapho uJohane wayebhaphathiza khona kuqala, wahlala khona.

⁴¹ Abanengi beza kuye, bathi: UJohane kenzanga isibonakaliso, kodwa konke uJohane akutsho ngalumuntu kwakuqinisile.

⁴² Abanengi bakholwa kuye lapho.