UJobe 9 - iBhayibhili Elingcwele 1978

Impendulo kaJobe: wehluleka ukumphendula uNkulunkulu

¹ UJobe wasephendula esithi:

² Impela ngiyazi ukuba kunjalo. Kodwa umuntu angalunga yini phambi kukaNkulunkulu?

³ Uba umuntu efisa ukuphikisana laye, uNkulunkulu kayikuphendula lowodwa emibuzweni eyinkulungwane.

⁴ Ulenhliziyo ehlakaniphileyo, ulamandla amakhulu. Ngubani ongamelana laye aphumelele na?

⁵ UNkulunkulu uyasusa izintaba lanxa zingakwazi, azigenqule lapho esethukuthele.

⁶ Unyikinya umhlaba, awususe endaweni yawo, kunyikinyeke lensika zawo,

⁷ alawule ilanga ukuba lingaphumi, avalele inkanyezi ngophawu lwakhe.

⁸ Nguye yedwa owendlala izulu, ohamba phezu kwamavinqo olwandle.

⁹ Inkanyezi ezithiwa ziNgulube leziNja zenziwa nguye, lesiLimela lenkanyezi zaseningizimu.

¹⁰ Nguye owenza izinto ezinkulu ezingelakuqedisiswa, lezimangalisayo ezingelakubalwa.

¹¹ Yebo, uyedlula phansi kwami ngingamboni, edlule ngingamuzwa.

¹² Uba ebamba ulutho, ngubani ongamkhalimela na? Ngubani ongathi kuye: Wenzani na?

¹³ UNkulunkulu kayinqandi intukuthelo yakhe. Abasizi bakaRahabi bawela phansi ngasenyaweni zakhe.

¹⁴ Phoke, mina ngingamphendula ngithini, ngikhethe amazwi ami okuqondana laye na?

¹⁵ Loba bengilungile, bengingeke ngamphendula; ngizacela isihawu kongibeka icala.

¹⁶ Uba bengimbizile, wangisabela, bengingayikukholwa ukuba ulilalele ilizwi lami.

¹⁷ Uyangilimaza ngesiphepho, andise amanxeba ami ngeze,

¹⁸ engavumi ukuba ngiphefumule, kodwa engigcwalisa ubuhlungu.

¹⁹ Uba ngizama ngamandla, ulamandla kakhulu. Uba ngimmangalela, ngubani ongambiza na?

²⁰ Loba ngingelacala, umlomo wami uzangilahla; uba ngiqondile, uzakuthi ngonakele.

²¹ Kangilacala, kangizikhathaleli; ngiyanengwa yikuphila kwami.

²² Kanti ukuphela kunye nje; ngakho ngithi: Uyabhubhisa olungileyo kanye lomubi.

²³ Lapho umkhuhlane omkhulu uletha ukufa, uyahleka ukuhlupheka kwabangelacala.

²⁴ Umhlaba unikelwe ezandleni zababi; uvala amehlo abahluleli bawo. Uba kungesuye, pho, ngubanike?

²⁵ Insuku zami zilejubane kulesigijimi, ziyabaleka, kaziboni okuhle.

²⁶ Ziyantsheza njengezikepe zemihlanga, njengokhozi olutheleka empangweni yalo.

²⁷ Uba ngisithi: Ngizakhohlwa ukusola kwami, ngiqede ukunyukumala kwami, ngincibilike;

²⁸ ngiyesaba bonke ubuhlungu bami, ngoba ngiyazi ukuthi kawuyikungiphatha njengongelacela.

²⁹ Ngizalahlwa mina, phoke, ngizatshikatshikelani na?

³⁰ Uba ngizigezisa ngongqoqwane, ngihlambulule izandla zami ngesepa,

³¹ kanti uzangiphosela emgodini, ngize ngenyanywe yizigqoko zami.

³² Ngoba kasuye umuntu onjengami ukuba ngimphendule, lokuba siye ekuthonisweni sonke.

³³ Kakukho umqamuli phakathi kwethu ongabeka izandla zakhe phezu kwethu sobabili,

³⁴ ukuba uNkulunkulu asuse intonga yakhe kimi, ukuze ngingehlelwa luvalo lokumesaba.

³⁵ Ng’khona ngizakhuluma ngingamesabi, ngoba ngiyazi ukuthi inhliziyo yami injani.