UJobe 8 - iBhayibhili Elingcwele 1978

Inkulumo yokuqala kaBilidadi: uthi uNkulunkulu uphatha abantu ngokufaneleyo

¹ Wasephendula uBilidadi waseShuhi esithi:

² Koze kube nini ukhuluma lezizinto, lamazwi akho abe njengomoya omkhulu na?

³ Kambe uNkulunkulu uyakuhlanekela okufaneleyo na? USomandla uyahlanekela ukulunga na?

⁴ Uba abantwana bakho bonile kuye, yena ubanikela emandleni eziphambeko zabo.

⁵ Uba umdinga uNkulunkulu, ucele kuSomandla,

⁶ uhlambulukile, uqotho, impela yena uzakuvuka ngenxa yakho, akubuyisele umuzi wakho ube ngumvuzo wakho.

⁷ Lanxa ukuqala kwakho bekukuncinyane, insuku zakho zokucina zizakuba zinkulu kakhulu.

⁸ Ake ubuze ezizukulwaneni zakuqala, ubone lokho okwafunyaniswa ngobaba;

⁹ ngoba thina singabezolo nje, kasazi lutho, lensuku zethu emhlabeni ziyisithunzi.

¹⁰ Bona kabayikukufundisa, bakutshele, bakhulume amazwi okwazi kwabo na?

¹¹ Kambe imihlanga ingahluma lapho kungelaxhaphozi khona na? Lebhuma likhule lapho kungelamanzi khona na?

¹² Nxa liseluhlaza lingakakhiwa, liyabuna kuqala kwazo zonke izihlahlana.

¹³ Injaloke indlela yabo bonke abamkhohlwayo uNkulunkulu, ithemba longamesabiyo uNkulunkulu lizaphela.

¹⁴ Ithemba lakhe kaliqinanga, lesisekelo sakhe sinjengendlu yobulembu.

¹⁵ Uyeyama endlini yakhe, kodwa kayimi, abambelele kiyo, kodwa kayiqini.

¹⁶ Njengesihlahlana esiluhlaza ekukhanyeni kwelanga wamilisela amahlumela akhe okuqala ensimini,

¹⁷ kodwa impande zakhe zazithandele ematsheni, waphila phakathi kwamadwala.

¹⁸ Uba echithwa endaweni yakhe, leyondawo izakumphika ithi: Kangizange ngikubone.

¹⁹ Injaloke indlela yokuthokoza kwakhe; kuzavela abanye emhlabathini.

²⁰ Khangela, uNkulunkulu kayikumlahla umuntu ongelasici, kazelekeleli izandla zabenza okubi.

²¹ Impela uzagcwalisa umlomo wakho ngohleko, lezindebe zakho ngokumemeza kokuthokoza;

²² kuthi labo abakuzondayo babanjwe zinhloni, lethente lababi lingabe lisaba khona.