UJobe 7 - iBhayibhili Elingcwele 1978

UJobe ukhala kuNkulunkulu ngobunzima bokuhamba komuntu

¹ Umuntu kakho empini yini emhlabeni, lensuku zakhe kazinjengensuku zoqatshiweyo na?

² Njengesigqili esifisa umthunzi, lanjengesiqatshwa esilindele iholo laso,

³ ngokunjalo nginikiwe inyanga eziyize, ngabelwa ubusuku bezinhlupheko.

⁴ Lapho ngilala phansi ngithi: Kuzakusa nini na? Ngoba ubusuku bude, ngitshukuma kuze kuse.

⁵ Inyama yami igcwele impethu; isigogo sami siyaphola, sibuye sibhibhidle.

⁶ Insuku zami ziyaphangisa kulesalukiso somaluki, ziphele ngingelathemba.

⁷ Nkulunkulu, khumbula ukuba ukuphila kwami kungumoya, kangiyikuphinda ngibone okuhle.

⁸ Lelihlo longibonayo kaliyikungibona futhi; lapho usangibona, ngizakusuka.

⁹ Njengeyezi linyamalala liphele, kunjaloke loya endaweni yabafileyo kaphumi futhi,

¹⁰ kaphindi abuyele emzini wakhe, lendawo yakhe kayisayikumazi futhi.

¹¹ Ngalokho kangisayikuthula; ngizakhuluma ekudabukeni komoya wami, ngisole ebuhlungwini bomphefumulo wami.

¹² Ngilulwandle yini, kumbe isilo solwandle, ukuba lingibekele abalindi na?

¹³ Lapho ngisithi: Umbheda wami uzangiduduza, lecansi lami lithulise ukukhala kwami;

¹⁴ uyangesabisa ngamaphupho, angethuse ngemibono,

¹⁵ ukuze ngikhethe ukuklinywa, lokufa kulokuhlupheka kwami.

¹⁶ Ngiyanengwa yikuphila kwami, kangifisi ukuhlala kokuphela. Akungiyekele, ngoba insuku zami zingumoya nje.

¹⁷ Uyini umuntu ukuba umnike udumo, lokuba ucabange ngaye,

¹⁸ lokuba umhlole ekuseni njalo, umlinge izikhathi zonke na?

¹⁹ Koze kube nini ulokhu ungiqaphele na? Kawuyikungiyekela ngize ngiginye amathe ami na?

²⁰ Uba ngisona, ngingenzani kuwe, wena mlindi wabantu na? Ungenzeleni into yakho yokunenjwa na? Ungenzeleni ngibe ngumthwalo wakho na?

²¹ Kawungithetheleli ngani isiphambeko sami, ususe isono sami na? Ngoba khathesi ngizalala phansi elibeni; uzangidinga, kodwa kangiyikuba khona.