UJobe 6 - iBhayibhili Elingcwele 1978

Impendulo kaJobe: usola abangane bakhe

¹ UJobe wasephendula esithi:

² Kungathi ukucaphuka kwami kungalinganiswa, lakho konke ukuhlupheka kwami kufakwe ezilinganisweni!

³ Ngoba kungaba nzima ukwedlula itshebetshebe lolwandle. Ngakhoke amazwi ami aseyikubhuda.

⁴ Imitshoko kaSomandla ingihlabile; umoya wami uyanatha ubuhlungu bayo; okwesabisayo kukaNkulunkulu kuyangehlela.

⁵ Ubabhemi weganga uyakhala yini nxa elotshani, lenkabi iyakhonya yini ekudleni kwayo na?

⁶ Kambe okuduma kungadliwa kungelatshwayi na? Kulokuhlabusa kokumhlophe kweqanda na?

⁷ Umoya wami uyala ukukuthinta, kunjengokudla okunengekayo kimi.

⁸ Kungathi isicelo sami singenziwa, uNkulunkulu anginike engikufisayo,

⁹ kumthokozise uNkulunkulu ukungichoboza, elule isandla sakhe angiqede.

¹⁰ Lokhu kungaba yinduduzo kimi, ngingajabula ebuhlungwini bami obungakhawuliyo; ngoba kangiwaphikanga amazwi oNgcwele.

¹¹ Ayini amandla ami ukuba ngilinde na? Ukuphela kwami kuyini ukuba ngibekezele na?

¹² Amandla ami angamandla amatshe yini, lenyama yami ilithusi na?

¹³ Kambe kukhona amandla kimi na? Konke okusizayo kakungitshiyanga na?

¹⁴ Abangane bomuntu bafanele ukumhawukela lapho elahlekelwa lithemba kuSomandla.

¹⁵ Abafowethu kabathembekanga njengomfula ogelezayo, njengezifula ezitshayo,

¹⁶ ezimnyama ngeliqhwa, lapho sezigcwele ungqoqwane.

¹⁷ Kodwa ngesikhathi sokutshisa amanzi ayanyamalala, atshe lapho selibalele.

¹⁸ Indwendwe ezihambayo, ziyaphambuka, zingene enkangala zibhubhe.

¹⁹ Indwendwe zaseTema zidinga kuzo amanzi, lezihambi zaseSheba zithembela kuzo;

²⁰ zidane ngoba bezithembile, zifike kuzo zidideke.

²¹ Linjaloke lani kimi, liyabona ukuhlupheka kwami, liyesaba.

²² Kambe ngake ngatsho yini ukuthi: Ngiphani lokhu kumbe lokhuyana, livule imixhaka yenu lisize ukuphila kwami na?

²³ Lokuthi: Ngikhululani ezitheni zami, lingihlenge ezandleni zabacindezeli bami na?

²⁴ Ngifundisani, ng’khona ngizathula; lingitshengise lapho ngiduhe khona.

²⁵ Ukukhuluma okuqotho kulamandla; kodwa ukusolwa yini kusizani na?

²⁶ Lithi lingasola amazwi na? Ngoba ukukhuluma komuntu ophelelwe lithemba kungumoya nje.

²⁷ Lizakwenza inkatho ngentandane, lithengise umngane wenu na?

²⁸ Khathesi, ake lingikhangele, ngoba kangiyikuqamba amanga kini.

²⁹ Ake liyekele, kungabi khona okungaqondanga. Yekelani bo, indaba yami ilungile.

³⁰ Kambe kukhona okungaqondanga olimini lwami na? Kangikwazi yini okubi na?