UJobe 5 - iBhayibhili Elingcwele 1978

¹ Ake umemeze, wena Jobe; ukhona ongakuphendula na? Uzaphendukela kusiphi sezithunywa na?

² Impela ukuthukuthela kuyasibulala isithutha, lomhawu uchithe isiphukuphuku.

³ Minake sengike ngazibonela onje ephumelela, umuzi wakhe wasusehlelwa yibubi.

⁴ Abantwana bakhe balahlekelwa lusizo, bahlupheka enkundleni, kungekho obasizayo.

⁵ Isivuno sakhe sidliwa ngabalambileyo, besithatha ngitsho lasemeveni, abomileyo banxwanele inotho yakhe.

⁶ Ngoba usizi kaluveli othulini, lokuhlupheka kakuphumi emhlabathini.

⁷ Ngoba umuntu uzalelwe ukuhlupheka njengoba inhlansi ziqhatshela phezulu.

⁸ Kodwa mina bengizafuna uNkulunkulu, kuNkulunkulu bengizabeka indaba yami.

⁹ Yena owenza izinto ezinkulu ezingelakuhlolwa, izimangaliso ezingelakubalwa.

¹⁰ Yena unisa izulu emhlabeni, athumele amanzi emasimini,

¹¹ aphakamise abaphansi, labalilayo abaphakamisele ekusileni.

¹² Uchitha amacebo alabo abalobuqili, ukuze izandla zabo zingaphumeleli.

¹³ Yena ubamba abahlakaniphileyo ebuqilini babo, lamacebo abalobuqili achithwe masinyane.

¹⁴ Bahlangana lomnyama emini, baphumputhe emini njengasebusuku.

¹⁵ Yena ukhulula abahluphekayo ebuhwabeni babo, labaswelayo esandleni sabalamandla.

¹⁶ Ngakhoke abayanga sebelethemba, lobubi sebuzavala umlomo wabo.

¹⁷ Ubusisiwe lowomuntu uNkulunkulu amlayayo; ngalokhoke ungakudeleli ukukhuza kukaSomandla.

¹⁸ Ngoba uyalimaza, abuye abophe amanxeba, atshaye, abuye apholise.

¹⁹ Uzakukukhulula enhluphekweni eziyisithupha, lakweziyisikhombisa kawuyikuthintwa yibubi.

²⁰ Endlaleni uzakukuhlenga ekufeni, lasempini emandleni omkhonto.

²¹ Uzafihlwa ebubini bokunyeya, kawuyikwesaba ukuchitheka lapho kufika.

²² Ukuchitheka lendlala uzakukuhleka, ungesabi izilo zasemhlabeni.

²³ Ngoba uzakuba lesivumelwano lamatshe asegangeni, lezilo zasegangeni zihlalisane kuhle lawe.

²⁴ Uzakwazi ukuba umuzi wakho uvikelekile, uhlole isibaya sakho kungasweleki lutho.

²⁵ Uzakwazi futhi ukuthi inzalo yakho izakuba nengi, labantwana bakho babe ngangotshani bomhlaba;

²⁶ ufinyelele elibeni lakho usuluphele, njengenqumbi zamabele zifika esizeni ngesikhathi zaso.

²⁷ Yebo, lokhu sesikuhlolile; kunjalo. Kuzwe, ukulalele.