UJobe 42 - iBhayibhili Elingcwele 1978

UJobe uyazithoba

¹ UJobe waseyiphendula iNkosi esithi:

² Ngiyazi ukuthi ungazenza zonke izinto, lokuthi kakulacebo lakho elingavinjelwa.

³ Ngikhulumile lokho engingakuqedisisiyo, izinto ezimangalisayo engingazaziyo.

⁴ Ake ungizwe, ngikhulume lami. Ngizakukubuza, lawe ungiphendule.

⁵ Bengikuzwa ngendaba, kodwa khathesi amehlo ami asekubona.

⁶ Ngakhoke sengizisola, ngiyaphenduka ngihlale othulini lasemlotheni.

⁷ Kwathi iNkosi isikhulume lamazwi kuJobe, yathi kuElifazi waseTemani: Ngiyakuthukuthelela wena kanye labangane bakho ababili, ngoba kalikhulumanga ngami okuqondileyo njengenceku yami uJobe.

⁸ Ngakhoke thatha inkunzi eziyisikhombisa lenqama eziyisikhombisa, uye encekwini yami uJobe, linikele ngazo zibe ngumnikelo wokutshiswa; inceku yami uJobe izalikhulekela, ngoba ngizakuzwa umkhuleko wakhe ngingenzi kini njengobuthutha benu; ngoba kalikhulumanga ngami okuqondileyo njengenceku yami uJobe.

⁹ Ngakho uElifazi waseTemani loBilidadi waseShuhi loZofari waseNama, basuka benza njengokutsho kweNkosi; leNkosi yawuzwa umkhuleko kaJobe.

Ukubusiswa kukaJobe

¹⁰ INkosi yabuya yamphumelelisa uJobe lapho esekhulekele abangane bakhe, yamnika okuphindwe kabili kulokho ayelakho kuqala.

¹¹ Kwasekufika kuye bonke abafowabo labo bonke odadewabo, labo bonke ababesazana laye ngaphambili, badla laye endlini yakhe; bamkhalela, bamduduza ngakho konke okubi iNkosi eyayimehlisele khona. Bonke bamnika imali lesongo legolide.

¹² INkosi yazibusisa insuku zokucina zikaJobe kulezakuqala. Waba lezimvu ezizinkulungwane ezilitshumi lane, lamakamela azinkulungwane eziyisithupha, lenkabi ezizinkulungwane, lobabhemi abasikazi abayinkulungwane.

¹³ Waba lamadodana ayisikhombisa lamadodakazi amathathu.

¹⁴ Eyokuqala wayitha ibizo wathi nguJemima, eyesibili wayitha ibizo elithiwa nguKeziya, leyesithathu wayitha ibizo elithiwa nguKerenihapuki.

¹⁵ Elizweni lonke kwakungekho abesifazana abahle njengamadodakazi kaJobe; uyise wawanika ilifa kanye labanewabo.

¹⁶ Emva kwalokho uJobe wahlala iminyaka elikhulu lamatshumi amane; wabona amadodana akhe, lamadodana amadodana akhe, kwaze kwaba yizizukulwana ezine.

¹⁷ Wafa uJobe esemdala, eseluphele.