UJobe 41 - iBhayibhili Elingcwele 1978

¹ Ungayibamba ingwenya ngengwegwe, uhitshele ulimi lwayo ngentambo na?

² Ungafaka umkhala emakhaleni ayo, ubhoboze imihlathi yayo ngengwegwe na?

³ Izakukuncenga kakhulu na? Izakhuluma lawe amazwi athambileyo na?

⁴ Izakwenza isivumelwano lawe ukuba uyithathe ibe yinceku yakho kokuphela na?

⁵ Uzayidlalisa njengenyoni, uyibophelele amantombazana akho ngentambo na?

⁶ Abathengi bazathengiselana ngayo na? Bazakwahlukaniselana ngayo na?

⁷ Ungasibhoboza isikhumba sayo ngendlendla, lekhanda layo ngengwegwe zenhlanzi na?

⁸ Uba ungayiphakamisela isandla, khumbula ubunzima ongahlangana labo, uyiyekele.

⁹ Ofuna ukuyahlula ithemba lakhe liyaphela, ngoba ephelelwa yisibindi ngokuyibona nje.

¹⁰ Yeka ukwesabeka kwayo lapho isithukuthele! Ngubani ongamelana layo na?

¹¹ Ngubani ongayihlasela angalimali na? Kakho loyedwa emhlabeni.

¹² Kangiyikuthula mayelana lezitho zayo, langamandla ayo amakhulu langesimo sayo esihle.

¹³ Ngubani ongakhumula isambatho sayo sangaphandle na? Ngubani ongabhoboza isigogo sayo esiqatha na?

¹⁴ Ngubani ongavula umlomo wayo na? Emazinyweni ayo kukhona okwesabekayo.

¹⁵ Umhlana wayo unjengezinhlu zezihlangu ezibekeleleyo zasondelelana,

¹⁶ esinye sisondele kwesinye, kungangeni umoya phakathi kwazo.

¹⁷ Zinamathelene, zabambana, kazilakwahlukaniswa.

¹⁸ Ukuthimula kwayo kuphazima ukukhanya, lamehlo ayo akhanya njengokudabuka kokusa.

¹⁹ Emlonyeni wayo kuphuma amalangabi, kuqhatshe inhlansi zomlilo,

²⁰ Emakhaleni ayo kuthunqa intuthu, njengembiza esemlilweni ovuthayo.

²¹ Umoya wayo uvuthela amalahle, lelangabi liphume emlonyeni wayo.

²² Amandla asentanyeni yayo, lokwesabeka kuhamba phambi kwayo.

²³ Isigogo sayo sangaphansi sinamathelene, sabunjelwa kiyo, kasilakususwa.

²⁴ Inhliziyo yayo ilukhuni njengelitshe, ilukhuni njengelitshe lokuchola elingaphansi.

²⁵ Ekuvukeni kwayo amaqhawe ayesaba, bethuswe yikubhulana komsila wayo.

²⁶ Umhedla lomkhonto lembemba lomdikadika, uba ziyihlaba, kazenzi lutho.

²⁷ Insimbi iyitshaya utshani, lethusi ilitshaya ugodo olubolileyo.

²⁸ Umtshoko kawulakuyixotsha, lamatshe esavutha aphenduka izibi nje.

²⁹ Izagila izitshaya izibi, ihleke ukugenqeza komdikadika.

³⁰ Ingaphansi layo linjengendengezi ezibukhali, ihamba odakeni njengesileyi.

³¹ Yenza inziki zamanzi zibile njengembiza, itshaye amanzi esiziba avubeke njengamafutha emganwini.

³² Umzila wayo umhlophe ngemva kwayo, lamanzi anjengenwele ezimhlophe emzileni wayo.

³³ Kakukho okufana layo emhlabeni, iyisilo esingesabiyo.

³⁴ Konke okuphakemeyo kuyayesaba, iyinkosi yazo zonke inyamazana eziphakemeyo.