UJobe 40 - iBhayibhili Elingcwele 1978

Impendulo kaJobe

¹ INkosi yasisithi kuJobe:

² Osolayo uzaphikisana loSomandla na? Ophikisana loNkulunkulu kaphendule.

³ UJobe waseyiphendula iNkosi esithi:

⁴ Khangela, kangisilutho lwalutho, ngingakuphendula ngithini na? Ngibamba umlomo wami ngesandla sami.

⁵ Ngikhulumile kanye, kangiyikuphendula futhi; ngakhuluma okwesibili, kangisayikuqhubeka.

INkosi ibonakalisa amandla ayo

⁶ INkosi yasimphendula uJobe isesivunguzaneni yathi:

⁷ Qina njengendoda, ngizakukubuza, lawe ungiphendule.

⁸ Lembala, uzachitha ukwahlulela kwami, ungilahle, ukuba wena ube ngolungileyo na?

⁹ Ulamandla njengoNkulunkulu na? Ungaduma ngelizwi elinjengelakhe na?

¹⁰ Nxa kunjalo, yambatha ubukhosi lobuqotho, uzambese ngodumo langenkazimulo;

¹¹ uthulule ukuvutha kolaka lwakho, ukhangele bonke abazigqajayo ubathobise.

¹² Khangela bonke abaziphakamisayo, ubehlisele phansi, unyathelele phansi ababi endaweni zabo,

¹³ ubafihle bonke othulini lomhlaba, ubagoqele, ubafake elibeni elingaziwayo.

¹⁴ Ng’khonake lami ngizavuma ukuthi isandla sakho sokunene silamandla okukusiza.

¹⁵ Ake ukhangele imvubu engayenza kanye lawe; idla utshani njengenkabi.

¹⁶ Khangela amandla ayo okhalweni lwayo, lamandla ayo emisipha yesisu sayo.

¹⁷ Iyenza umsila wayo uqine njengesihlahla somkusu, lemisipha yemilenze yayo yalukene.

¹⁸ Amathambo ayo anjengembobo zethusi, lezitho zayo zinjengemigoqo yensimbi.

¹⁹ Ingowokuqala wezidalwa zikaNkulunkulu, yenziwa ibe yingqwele yezinye.

²⁰ Intaba ziyayivezela ukudla, lapho kudlala khona inyamazana zonke zeganga.

²¹ Ilala phansi kwesihlahla esiluhlaza, ekusithekeni kwemihlanga yasemaxhaphozini.

²² Isihlahla esiluhlaza siyayenzela umthunzi, lemidubu yomfula iyayiphahla.

²³ Lanxa umfula uphuphuma, kayethuki, ilesibindi lanxa amanzi ephuphumela emlonyeni wayo.

²⁴ Kukhona ongayibamba ngengwegwe, ayifake umkhala emakhaleni ayo na?