UJobe 4 - iBhayibhili Elingcwele 1978

Inkulumo yokuqala kaElifazi: uthi uNkulunkulu ulungile

¹ Wasephendula uElifazi waseTemani wathi:

² Uba kukhulunywa lawe, uzathukuthela na? Kodwa ngubani ongathula angakhulumi na?

³ Khangela, uqondisile abanengi, waqinisa izandla zababuthakathaka.

⁴ Amazwi akho amsekela okhubekayo, waqinisa amadolo axegayo.

⁵ Kodwa khathesi sekufikile kuwe, uyakhathazeka; kuyakuthinta wena, utshaywa luvalo.

⁶ Ukumesaba kwakho uNkulunkulu kakusilo ithemba lakho yini, lobuqotho bendlela yakho kabusiso isisekelo sakho na?

⁷ Akucabange, ngubani owake wachithwa engelacala na? Olungileyo wake wabhujiswa ngaphi na?

⁸ Njengengikubonileyo, abalima ububi behlanyela inkathazo, bavuna khona lokho.

⁹ Babhujiswe ngokuphephetha kukaNkulunkulu, langokuthukuthela kwakhe bayaphela.

¹⁰ Ukubhonga kwesilwane lelizwi lesilwane esesabekayo kuthule, amazinyo emidlwane yesilwane aphukile.

¹¹ Isilwane esilamandla siyabhubha ngokuswela ukudla, lemidlwane yesilwane ichitheke.

¹² Nganyenyezelwa yilizwi, lendlebe yami yezwa ukunyenyeza kwalo.

¹³ Emicabangweni evela emibonweni yasebusuku, lapho abantu sebehlelwe yibuthongo obukhulu,

¹⁴ ngafikelwa yikwesaba lokuthuthumela okwenza wonke amathambo ami aqhaqhazela.

¹⁵ Kwedlula umoya ebusweni bami, loboya bomzimba wami bavuka.

¹⁶ Kwema othile, wathula, kodwa angisiqondanga isimo sakhe; isimo sasiphambi kwami, kwathula, ngasengisizwa ilizwi lisithi:

¹⁷ Kambe umuntu angalunga phambi kukaNkulunkulu na? Umuntu angahlambuluka phambi koMenzi wakhe na?

¹⁸ UNkulunkulu kazithembi inceku zakhe, lezithunywa zakhe uzibeka icala;

¹⁹ kuzakuba njani, pho, kulabo abahlala ezindlini zebumba, abalezisekelo ezisothulini, abachotshozwa njengenondo.

²⁰ Bayabhujiswa ngosuku lunye nje, bachithwe kuze kube nininini bengananzwa muntu.

²¹ Uba intambo yokuphila kwabo iqanyulwa, bafa bengakafumani ukwazi.