UJobe 39 - iBhayibhili Elingcwele 1978

¹ Uyasazi yini isikhathi sokuzala kwamagogo na? Uyaqaphelisa ukuzala kwempala na?

² Ungazibala inyanga eziziqedayo, uyasazi isikhathi ezizala ngaso,

³ nxa zilala phansi zivule izisu zazo, zizale abantwana bazo na?

⁴ Amazinyane azo ayakhula egangeni aqine, asuke ahambe, angabuyi futhi.

⁵ Ngubani owakhulula ubabhemi weganga, wathukulula izibopho zikababhemi olejubane,

⁶ engimnike iganga libe ngumuzi wakhe, lelizwe letshwayi libe yindawo yakhe yokuhlala na?

⁷ Yena uyaklolodela umsindo womuzi, angakuzwa ukumemeza komtshayeli;

⁸ uyazula ezintabeni ezilidlelo lakhe, edinga konke okuluhlaza.

⁹ Inyathi iyavuma ukukusebenzela na? Izalala esibayeni sakho ebusuku na?

¹⁰ Ungayibophela ngemichilo, ingalima imifolo na?

¹¹ Ungathembela kuyo ngoba amandla ayo emakhulu, ungayiyekelela umsebenzi wakho na?

¹² Ungathemba ukuthi izabuya iletha amabele akho esizeni sakho na?

¹³ Impiko zentshe zimfitshane, impiko zayo zilensiba ezilutshwana.

¹⁴ Iyatshiya amaqanda ayo emhlabathini, akhudunyezwe ngumhlabathi,

¹⁵ iyakhohlwa ukuba unyawo lungawachoboza, lokuthi isilo seganga singawanyathela.

¹⁶ Iwaphatha kalukhuni amatsiyane ayo, kungathi kawasiwo awayo, ingakhathali ngokuthi umsebenzi wayo ulize.

¹⁷ Ngoba uNkulunkulu uyincitshile ukwazi, kayinikanga ukuqedisisa.

¹⁸ Lapho ibaleka iyalihleka ulunya ibhiza lomkhweli walo.

¹⁹ Nguwe Jobe, onika ibhiza amandla alo na? Uyalifaka umhlonga entanyeni yalo na?

²⁰ Uyalenza leqe njengentethe na? Ukukhala kwalo okukhulu kuyethusa indawo zonke.

²¹ Liyaphanda esihotsheni, lithokoze ngamandla alo, liphume ukuhlangabeza impi.

²² Liyakuhleka ulunya ukwesaba, ngoba kalesabi, kaliwubalekeli umkhonto.

²³ Phezu kwalo isamba semitshoko siyakhehlezela, kuphazime umkhonto lomdikadika.

²⁴ Liqhuqhiswa yikufutheka ligijime kakhulu, kalilakunqandwa nxa lisizwa ukukhala kophondo.

²⁵ Nxa uphondo lukhala lithi: Nankoke! likunuke ukulwa kusekhatshana, lizwe umsindo wezinduna lokumemeza kwazo.

²⁶ Yikuhlakanipha kwakho wena okufundisa ukhozi ukuphapha, lokuphaphela eningizimu na?

²⁷ Nguwe ofundisa ilinqe ukuqonga. lokwakha isidleke salo engqongeni na?

²⁸ Lihlala eliweni, lakhe khona, isidleke salo sisembalwini zeliwa.

²⁹ Lilapho liyakubona ukudla, amehlo alo ayakubona kukhatshana.

³⁰ Amatsiyane alo amunya igazi, lapho okukhona ababuleweyo likhona lalo.