UJobe 38 - iBhayibhili Elingcwele 1978

INkosi iyamphendula uJobe: uJobe kaqedisisi

¹ INkosi yasimphendula uJobe isesivunguzaneni isithi:

² Ngubani lo ofiphaza iseluleko sami ngamazwi angelakwazi na?

³ Qina njengendoda, ngizakukubuza, lawe ungiphendule.

⁴ Wawungaphi lapho ngimisa izisekelo zomhlaba na? Ngitshela uba ulokuqedisisa.

⁵ Ngubani owamisa izilinganiso zawo, ngoba uyakwazi phela! Ngubani owelulela intambo yokulinganisa phezu kwawo na?

⁶ Izisekelo zawo zabekwa phezu kwani na? Ngubani owabeka ilitshe lawo lengonsi,

⁷ lapho inkanyezi zokusa zahlabela kanyekanye, lamadodana wonke kaNkulunkulu ajabula na?

⁸ Ngubani owavalela ulwandle ngezivalo, lapho lubhoboka kungathi luphuma esiswini na?

⁹ Yimi engenza amayezi aba yisambatho salo, lomnyama omkhulu waba yimbeleko yalo,

¹⁰ ngalumisela umkhawulo, ngaluvalela ngemigoqo langezivalo,

¹¹ ngathi: Uzafika lapho, kodwa ungadluli, amavinqo akho azigqajayo azaphelela lapha.

¹² Lokhu wena waba khona wake walawula ukusa, wenza ukudabuka kokusa ukuba kuyazi indawo yakho,

¹³ ukuba kubambe imiphetho yomhlaba, kuthintithe ababi kuwo na?

¹⁴ Umhlaba uphenduke njengebumba liphenduka ngaphansi kophawu lokunamathisela, imibala yawo ikhanye njengelembu.

¹⁵ Ababi okwabo ukukhanya kuyasuswa, lengalo ephakanyiselwe ukutshaya yaphulwa.

¹⁶ Wake wangena emithonjeni yolwandle, wahamba phansi enzikini na?

¹⁷ Amasango okufa wawavulela, wabona amasango ethunzi lokufa na?

¹⁸ Ubuqedisisile ububanzi bomhlaba na? Tshono uba ukwazi konke lokhu.

¹⁹ Ingaphi indlela eya lapho kuhlala khona ukukhanya, ingaphi lendawo yomnyama,

²⁰ ukuze ikuse elizweni lakho, uyazazi indlela eziya emzini wakho na?

²¹ Uyazi phela, ngoba wawusuzelwe, lensuku zakho zinengi.

²² Wake wangena eziphaleni zikangqoqwane, wabona iziphala zesiqhotho,

²³ engizibekele isikhathi sokuhlupheka, losuku lokulwa lolwempi na?

²⁴ Yiphi indlela eya lapho ukukhanya kwabiwa khona, lalapho umoya wasempumalanga uhlakazwa khona emhlabeni na?

²⁵ Ngubani ogebhe imisele yezihlambo zezulu, lendlela yokuduma lombane,

²⁶ ukuba anise izulu emhlabeni lapho kungelamuntu khona, lasenkangala engahlali muntu,

²⁷ ukugcwalisa inkangala logwadule, ukuba utshani buhlume emhlabeni na?

²⁸ Izulu liloyise yini, futhi ngubani owazala amathonsi amazolo na?

²⁹ Ungqoqwane wavela esiswini sikabani, leliqhwa laphezulu lazalwa ngubani na?

³⁰ Amanzi aphenduka abe lukhuni njengelitshe, lolwandle lujiye phezulu.

³¹ Ungawabopha amaketane esiLimela, uthukulule izintambo zenkanyezi ezithiwa yiziNja na?

³² Ungakhupha izinkanyezi ngesikhathi sazo, ukhokhele inkanyezi ezithiwa ziNgulube kanye labantwana bazo na?

³³ Uyazazi izimiso zasezulwini na? Ungazimisa emhlabeni na?

³⁴ Ungawalawula amayezi amnyama ukuba akunethise ngamanzi awo amanengi na?

³⁵ Ungakulawula ukuphazima kombane ukuba kuze kuwe, kufike kuthi: Sesifikile, na?

³⁶ Ngubani owabeka ukuhlakanipha enzikini zomnyama, wafihla ukuqedisisa ensitha na?

³⁷ Ngubani ongabuthanisa amayezi ezulu, athulule imithombo yasezulwini,

³⁸ ukuba uthuli lubuthane lube yizigaqa, lamagade abumbane?

³⁹ Ungasizingelela isilwane ukudla, ungayisuthisa imidlwane yesilwane,

⁴⁰ lapho zilele ezikhundleni zazo, zicatheme emihomeni yazo na?

⁴¹ Ngubani onika iwabayi ukudla kwalo, lapho amatsiyane alo ekhala kuNkulunkulu, ezulazula ngokuswela ukudla na?