UJobe 37 - iBhayibhili Elingcwele 1978

¹ Ngenxa yalokho inhliziyo yami iyathuthumela, isuke endaweni yayo.

² Zwana umdumo welizwi likaNkulunkulu, lokuvungama okuphuma emlonyeni wakhe.

³ Uyakukhupha ngaphansi kwalo lonke izulu, lombane wakhe uyafika ezingonsini zomhlaba.

⁴ Emva kwawo kuduma ilizwi lakhe, uyaduma ngelizwi lobukhosi bakhe, angawunqandi umbane lapho kuzwakala ilizwi lakhe.

⁵ UNkulunkulu uyaduma ngelizwi lakhe ngokumangalisayo, wenza izinto ezinkulu esingeke siziqedisise.

⁶ Ngoba kungqoqwane uthi: Khithikela emhlabeni; lakuzihlambo zezulu uthi: Yesabekani.

⁷ Uyabavalela bonke abantu ukuba bangasebenzi, ukuba bonke bazi ukusebenza kwakhe.

⁸ Zonke inyamazana ziya ezikhundleni zazo, zihlale emihomeni yazo.

⁹ Isivunguzane siphuma endaweni yaso, lomqando uphume enyakatho.

¹⁰ Umoya kaNkulunkulu uveza ungqoqwane, lamanzi abe lukhuni njengensimbi.

¹¹ Amayezi uyawagcwalisa ngamanzi, amayezi ayaphazima umbane.

¹² Ayazulazula ngokuqondisa kwakhe, ukuba enze konke awalaye khona, emhlabeni wonke owakhiweyo.

¹³ Wenza konke lokhu ukuba kufike, kube yisiqondiso, ingabe kufike ngenxa yelizwi lakhe loba ngenxa yomusa.

¹⁴ Lalela lokhu, wena Jobe, mana, ucabange ngemisebenzi emangalisayo kaNkulunkulu.

¹⁵ Uyazi yini ukuba uNkulunkulu uwalawula kanjani, enze umbane wamayezi akhe uphazime na?

¹⁶ Uyazi yini ukuba amayezi uwalengisa kanjani, ayisimangaliso sakhe yena ophelele ngokwazi,

¹⁷ nxa izigqoko zakho zikhudumeza umzimba wakho, lomhlaba uthule uthe zwi ngenxa yomoya waseningizimu na?

¹⁸ Ungatshombulula isibhakabhaka njengaye, siqine njengesibuko esibunjiweyo na?

¹⁹ Sifundise ukuba sizakuthini kuye; ngoba kumnyama, singeke silungise imicabango yethu.

²⁰ Umuntu angamlawula uNkulunkulu uba efuna ukukhuluma na? Angamlaya ukuba atsho ilizwi lakhe na?

²¹ Ngesinye isikhathi ukukhanya kakubonakali, lisibekele ngamayezi lezulu, umoya uyafika, uwaphephule aphele,

²² lokukhanya kuqhamuke ngasenyakatho. UNkulunkulu wambethe ubukhosi obesabekayo.

²³ uSomandla singemfumane, mkhulu ngamandla langokulunga, kayikuhlanekela ukulunga okukhulu.

²⁴ Ngakhoke abantu bayamesaba, bonke abahlakaniphileyo bathembele kuye.