UJobe 36 - iBhayibhili Elingcwele 1978

UElihu ukhuluma ngobukhulu bukaNkulunkulu

¹ UElihu waqhubeka wathi:

² Ake ungibekezelele kancinyane, ngizakukubonisa, ngoba ngiselelizwi lokumela uNkulunkulu.

³ Ngizathatha izinto ezinengi ukusekela ukukhuluma kwami, lapho ngimela ukulunga koMenzi wami.

⁴ Ngoba impela amazwi ami kawasiwo amanga, ulawe yena olokwazi okupheleleyo.

⁵ Ngithi uNkulunkulu uyabalahla abakhulu labalamandla,

⁶ kamyekeli omubi aphumelele, kodwa uyabanika okulungileyo abayanga labahluphekayo,

⁷ kamamuki ilungelo lakhe ohluphekayo. Ake ukhangele amakhosi ezihlalweni zawo zobukhosi, lapho uNkulunkulu ewanika amandla, ayazikhukhumeza.

⁸ Kuthi usuwabona futhi esebotshiwe ngezibopho, esebotshwe ngamaketane abathunjiweyo;

⁹ uNkulunkulu abesewabonisa izenzo zawo leziphambeko zawo zokuthi aziphakamisile.

¹⁰ Ukhuluma amazwi okulaya endlebeni zawo, awalaye ukuba asuke ebubini.

¹¹ Uba elalela, amkhonze, ayaqeda insuku zawo ephumelela, leminyaka yawo phakathi kokunengi.

¹² Kodwa uba engalaleli ayabhujiswa, afe engelakwazi.

¹³ Abangamesabiyo uNkulunkulu bahlala bethukuthele, kabaceli ukusizwa nxa ebabopha.

¹⁴ Bayafa ebutsheni babo, ukuphila kwabo kuphelele phakathi kwabangcolileyo.

¹⁵ Ukhulula abahluphekayo ngokuhlupheka kwabo, abafundise ngenkathazo.

¹⁶ Lawe wakukhupha osizini, ukuba ulondolozeke; ube lokudla okunengi okumnandi esithebeni sakho.

¹⁷ Kodwa khathesi wena wehlelwe yikuthonisiswa komubi, ukuthonisisa lokulunga kukubambile.

¹⁸ Qaphela, funa ulaka lukuhugele ekuklolodeni, lobukhulu benhlawulo bukuphambukise.

¹⁹ Inotho yakho leyo loba inengi ingakusiza yini, kanye lawo wonke amandla esikhundla sakho esiphakemeyo na?

²⁰ Ungesabi nxa ubona izinto ezesabekayo ebusuku, labantu bechithwa endaweni zabo.

²¹ Qaphela, ungaphambukeli ebubini, ngoba ngenxa yalokho uyahlolwa ngokuhlupheka.

²² UNkulunkulu mkhulu ngamandla akhe, ngubani ongafundisa njengaye na?

²³ Ngubani ommisele indlela yakhe na? Ngubani ongatsho kuye ukuthi: Wena wonile?

²⁴ Khumbula ukukhulisa izenzo zakhe, abahlabela ngazo abantu.

²⁵ Bonke abantu bazibonile, bazibona bekhatshana.

²⁶ UNkulunkulu mkhulu, kasimazi, leminyaka yakhe kayilakubalwa.

²⁷ Uyakhupha amathonsi amanzi olwandle, anise izulu enkungwini ayenzileyo;

²⁸ amayezi alehlisele phansi, litheleke kakhulu ebantwini.

²⁹ Kukhona ongaqedisisa ukwendlaleka kwamayezi, lokuduma okuvela endaweni yakhe na?

³⁰ Uyendlala inkungu azizingelezele ngayo, agubuzele ingqonga zentaba ngayo.

³¹ Ngoba ngakho uyondla abantu, aphane kakhulu ngokudla,

³² Uyathatha umbane ngezandla zakhe, akhethe indawo angatshaya kuyo.

³³ Ekuthukutheleni kwakhe ubiza isiphepha, lokuduma kubika ukuza kwaso.