UJobe 35 - iBhayibhili Elingcwele 1978

¹ Wasesithi uElihu:

² Uzaqhubeka ngokuqinisa ukuthi uqondile, wena Jobe, uqhubeke ngokubambelela ekutheni kawulacala phambi kukaNkulunkulu

³ uze uthi: Kungangisizani na? Ngingazuza okungakanani ngokona na?

⁴ Ngizakukuphendula wena kanye labangane bakho.

⁵ Khangela iphezulu ubone, ukhangele amayezi angaphezu kwakho.

⁶ Uba wonile, wenzani kuye na? Uba iziphambeko zakho zizinengi, wenzani kuye na?

⁷ Uba ulungile, umnikani wena na? Wamukelani esandleni sakho na?

⁸ Ububi bakho buqondana lomuntu onjengawe, lokulunga kwakho kuthinta umuntu nje.

⁹ Abantu bayakhala ngenxa yobunzima bokucindezelwa; bacele ukusizwa ngenxa yezandla zabalamandla.

¹⁰ Kodwa kakho othi: Ungaphi uNkulunkulu uMenzi wami, owenza amahubo okuthokoza azwakale ebusuku,

¹¹ osinika ukwazi okwedlula okwenyamazana zomhlaba, asiphe ukuhlakanipha okwedlula okwenyoni zaphezulu na?

¹² Ngakho lapho bekhala, kaphenduli, ngoba bezigqaja, bebabi.

¹³ Impela uNkulunkulu kakuzwa ukukhala okuyize, loSomandla kakunanzi.

¹⁴ Kuzakuba kubi kuwe uba usithi: UNkulunkulu kangiboni. Uzithobe phambi kwakhe, ulindele ilizwi lakhe,

¹⁵ Phoke, ngoba uNkulunkulu engathukutheli, atshaye, ngoba eyekela ububi bedlule engabunanzi,

¹⁶ uJobe uyakhuluma ize nje, akhulume amazwi amanengi engelakwazi.