UJobe 34 - iBhayibhili Elingcwele 1978

UElihu uvikela ukulunga kukaNkulunkulu

¹ Wasesithi uElihu:

² Zwanini amazwi ami, lina zihlakaniphi, lingilalele, lina zazi;

³ ngoba indlebe iyawezwa amazwi njengolwanga lusizwa ukudla.

⁴ Asikhetheni okulungileyo, sazi phakathi kwethu okuhle.

⁵ Ngoba uJobe usethe: Ngilungile, Kodwa uNkulunkulu ungithathele ilungelo lami;

⁶ lanxa ngiqondile, ngitshaywa olamanga, inxeba lami kalipholi, loba ngingelasiphambeko.

⁷ Nguwuphi umuntu onjengoJobe, onatha ukuklolodelwa njengamanzi,

⁸ ohamba labangane abenza okubi, avakatshe labantu ababi.

⁹ Ngoba uthi: Kakumsizi umuntu ukwazana loNkulunkulu.

¹⁰ Ngakhoke, ngizwani, lina bantu abaqedisisayo: kakube khatshana loNkulunkulu ukuba enze okubi, lakuSomandla ukuba one.

¹¹ Ngoba ubuyisela umuntu njengokwenza kwakhe, amnike okufanele ukuhamba kwakhe.

¹² Impela uNkulunkulu kenzi okubi, uSomandla kahlanekeli ukulunga.

¹³ Ngubani owabeka uNkulunkulu ukulondoloza umhlaba na? Angithi nguye yedwa owamisa umhlaba wonke na?

¹⁴ Uba ewubuyisa umoya wakhe kuye, abuyisele lomphefumulo wakhe,

¹⁵ konke okuphilayo bekuzakufa, umuntu abuyele othulini.

¹⁶ Uba lilokuqedisisa, zwanini lokhu, lilalele engikutshoyo.

¹⁷ Lembala ozonda ukulunga uzabusa na? Lizamlahla olungileyo lolamandla,

¹⁸ othi enkosini: Muntu ongelamsebenzi; lakuzikhulu: Bantu ababi;

¹⁹ ongazazisi izikhulu, engananzi isinothi ukwedlula umyanga, ngoba bonke bengumsebenzi wezandla zakhe na?

²⁰ Bayafa ngesikhatshana; phakathi kobusuku abantu bayatshaywa, baphele, labalamandla banyamalala bengathintwanga langesandla.

²¹ Ngoba amehlo akhe akuzo indlela zabantu, uyazibona zonke izinyathelo zabo.

²² Kakulandawo elomnyama omkhulu lapho ababi bangacatsha khona.

²³ Kakukho insuku ezimiselwe abantu ukuma phambi kukaNkulunkulu, bahlulelwe.

²⁴ Uyaphahlaza abalamandla kungahlolwanga, amise abanye endaweni zabo.

²⁵ Ngoba eyazi imisebenzi yabo uyabagenqula ebusuku, bachobozeke.

²⁶ Uyabatshaya phambi kwabantu ngenxa yobubi babo,

²⁷ ngoba bephambukile ekumlandeleni, bengananzanga leyodwa yezindlela zakhe,

²⁸ baze benza ukukhala komyanga kufinyelele kuye, wakuzwa ukukhala kwabahluphekayo.

²⁹ Lapho yena ethula, ngubani ongamlahla na? Lalapho efihla ubuso bakhe, ngubani ongambona na?

³⁰ Kuzakuba njani lapho ebeka umuntu ongamesabiyo uNkulunkulu abe yinkosi yesizwe esilukhuni leyabo bonke abantu baso na?

³¹ Uba umuntu esithi kuNkulunkulu: Ngaduhiswa, kangisayikona futhi;

³² uba ngonile, ungitshele ngakho, uba ngenze okubi kangisayikukwenza futhi.

³³ Kokunje lithi ufanele ukumtshaya, lina elala izimiso zakhe na? Ngoba yini elikhetha lokhu, kungeyisimi; asihlanganyele sonke ukwazi kwenu.

³⁴ Kodwa abantu abalokuqedisisa bazakutsho kimi, lezihlakaniphi lapho zingizwa zitsho zithi:

³⁵ UJobe ukhuluma engelakwazi, lamazwi akhe kawalakuqonda.

³⁶ Kungathi ngabe uJobe uyahlolwa kuze kube sekupheleni! ngoba ephendula njengabantu ababi.

³⁷ Ngoba esonweni sakhe uyengezelela ukuhlamuka, esola ukwahlulelwa phakathi kwethu, esandisa ukuthuka kwakhe uNkulunkulu.